O Le Mea Ua Tatou Talitonu I Ai

E Faaali mai e le Atua ia Upu Moni i Ana Perofeta ma i Tatou

O se perofeta o se molimau faapitoa mo Iesu Keriso ma e molimau i Lona paia. E valaauina e le Atua se perofeta e fai ma Ona sui i le lalolagi. O se perofeta e aoao mai le upu moni, faamatala le afioga a le Atua, ma a le o lea, e mulimuli i le taitaiga a le Atua i le faamanuiaina o o tatou olaga. A saunoa se perofeta mo le Atua, ua pei lava o le Atua lea ua fetalai mai (tagai i le MFF 1:38). Ua i ai perofeta i le lalolagi i aso nei e pei lava ona sa i ai anamua.

O faaaliga mo le Ekalesia atoa e ala mai i le Peresitene O Le Ekalesia a Iesu Keriso o le Au Paia o Aso e Gata Ai, o Thomas S. Monson. O ia o se perofeta a le Atua. A talanoa tagata o le Ekalesia e uiga “i le perofeta,” o loo latou faatatau i le Peresitene o le Ekalesia. Ae peitai, o loo i ai isi perofeta i le lalolagi i aso nei. O fesoasoani e toalua a Peresitene Monson, o Peresitene Henry B. Eyring ma Peresitene Dieter F. Uchtdorf, o ni perofeta foi. O isi tamalii e toasefululua—o le Korama a Aposetolo e Toasefululua—e ta’ua foi o perofeta.

I le avea ai ma fanau a se Tama Faalelagi alofa, e mafai foi ona tatou maua faaaliga mai ia te Ia mo o tatou lava olaga patino. E ui o faaaliga o nisi taimi e oo mai ai e ala i faaaliga vaaia, miti, po o asiasiga a agelu, ae o le auala masani lava e talanoa mai ai le Atua ia i tatou, e ala mai i musumusuga malu faaleagaga a le Agaga Paia. O faaaliga faaletagata lava ia e mafai ai ona tatou maua le malosi ma tali ia tatou tatalo.

O fea e mafai ona tatou faitau ai i aoaoga musuia mai perofeta o aso nei?

1. O le Mataupu Faavae ma Feagaiga o se tuufaatasiga o faaaliga na tuuina mai i perofeta o onapo nei. E mafai ona maua i le initoneti i le www.scriptures.lds.org.

2. O se savali mai le Peresitene o le Ekalesia po o se tasi o ona fesoasoani o loo lomia i masina taitasi i le mekasini o le Liahona (o loo maua i nisi gagana i le LDS.org).

3. “O Le Aiga: O Se Folafolaga i le Lalolagi” ma le “O Le Keriso Soifua: O Le Molimau a le Au Aposetolo” o folafolaga faaperofeta i upumoni e uiga i le aiga ma le Faaola. O loo i ai uma i le LDS.org.

4. O sui uma o le Au Peresitene Sili ma le Korama a Aposetolo e Toasefululua e ta’i ono masina ma saunoa i konafesi aoao a le Ekalesia. Faitau i anotusi pe matamata i vitio o a latou saunoaga i le www.conference.lds.org.

E faapefea ona tatou maua faaaliga faaletagata lava ia?

1. Anapogi, mafaufau loloto, ma tatalo mo le taitaiga.

2. Faitau tusitusiga paia. O auala ia e mafai ai e le Tama Faalelagi ona tali mai ia tatou talosaga ma tuuina mai le taitaiga, a o fesoasoani mai le Agaga Paia ia tatou malamalama i mea tatou te faitauina.

3. Auai i le lotu i Aso Sa taitasi ma, pe afai e mafai, auai atu i le malumalu.

4. Tausi poloaiga ina ia mafai ona e agavaa e maua musumusuga mai le Agaga Paia.

Mo nisi faamatalaga, tagai i le Dallin H. Oaks, “O Laina e Lua o Fesootaiga,” Liahona, Nov. 2010, 83; Mataupu Faavae o le Talalelei (2009), “Perofeta a le Atua,” 41–46; ma le Faamaoni i le Faatuatua (2004), “Faaaliga,” 32–37.

“O le a ou faaali atu ia te oe i lou mafaufau ma lou loto i le Agaga Paia, e oo atu ia te oe ma o le a tumau i lou loto.

“O lenei, faauta, o le agaga lenei o faaaliga” (MFF 8:2–3).

E ao ina tatou matua faafetai aua o loo tatala pea le lagi, ua toefuatai mai le Ekalesia a Iesu Keriso i luga o le fogaeleele i ona po nei, ma o loo faavae le Ekalesia i luga o le papa o faaaliga. O i tatou o se nuu faamanuiaina, ua i ai aposetolo, ma perofeta i luga o le fogaeleele i ona po nei.”

Peresitene Thomas S. Monson, “Tuleiga Faaiu,” Liahona, Nov. 2009, 109–10.

Ata na tusia e David Stoker