Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.

“Tuueseeseina e se Lologa, Faatasia e le Tatalo,” itulau e 14: A uma ona faitau le tusiga, atonu o le a e manao e faamamafa atu le mataupu faavae o le tatalo i le faitau faatasi o le Alema 34:18–27. Ia valaaulia tagata o le aiga e faasoa mai ni aafiaga o ni taimi na tali mai ai a latou tatalo.

“O Le Faatufugaga a Le Faamalolo,” itulau e 18: A uma ona faitau ma talanoaina vaega o le tusiga, e mafai ona e valaaulia lou aiga e usu le pese “Fa’aola e ia ‘Ou Alofa”(Viiga, nu. 150). I le avea ai o se aiga, ia talanoa e uiga i ni auala lelei e mafai ona e tali atu ai pe afai e faatiga se tagata ia te oe. Ia talanoaina pe mafai faapefea e le malamalama ma le faaaogaina o le Togiola i lou olaga ona “faamalolo i loto ua faamanualia, feeseeseaiga, ma le ita.”

“Aoaoina Atu o le Aoaoga Faavae o le Aiga,” itulau e 32: A o faasoa atu le savali a Julie B. Beck, ia valaaulia tagata o le aiga e talanoaina le taua o le aoaoga faavae o le aiga. Ia talanoaina mea e lamatia ai le aiga ma pe faapefea ona faatoilaloina nei mea e ala i le faatuatua. Fesoasoani e faaleleia soo se atugaluga po o lagona musua o i ai i lau fanau e uiga i le amataina o o latou lava aiga i le taimi e tatau ai.

“Faitau Ou Faamanuiaga,” itulau e 62: A o lei faitauina le tusiga lenei faatasi o se aiga, ia tuu solo ni mea faitino i totonu o le potu e faamanatu atu ai ia te oe ou faamanuiaga. O nei mea e ono aofia ai ni lavalava, meaai, tusitusiga paia, ata o le Faaola, ata o lou aiga, ma isi lava mea. Ia valaaulia lou aiga e sue nei “faamanuiaga” ma faasoa atu pe aisea ua latou faafetai ai mo na mea. Atonu e te valaaulia tagata o le aiga e lisi ni mea latou te faafetai ai ma ia fautua atu ia iloilo e le aunoa le lisi.

Afiafi Faaleaiga a o Toesea Mai i le Aiga

E toatolu la’u fanau e le o nonofo i lo matou aiga ma aooga i le taimi nei, o lea matou te faasoa ai i afiafi faaleaiga e ala i le Initoneti. Ou te auina atu ia i latou ni i-meli e faamatala i ai aafiaga faaleagaga e tutupu i lo matou aiga ma lesona matou te fefaasoaai ai mai le Liahona po o tusitusiga paia—aemaise lava o le Tusi a Mamona. Afai e alu se vaiaso ma galo ai ona ou tusi, latou te fai mai uma lava, “Tina! Faamolemole! Matou te misia afiafi faaleaiga.” O lo matou fetufaai i lenei faiga, ua mafai ai ona latou faamalolosia i matou e ui lava latou te le o i ai iinei faaletino.

Ou te talitonu o afiafi faaleaiga o se polokalama musuia aua e fesoasoani ia i tatou e fausia ai se faavae i luga o le papa mausali o lo tatou Faaola, o Iesu Keriso. O afiafi faaleaiga e fesoasoani foi ia i tatou e ausia ai le mea ua finagalo ai le Alii mo i tatou—ia mafai ona avea i tatou o se aiga e faatasia e faavavau.

Norma Leticia Treviño de Taylor, Nuevo León, Mekisiko