Valavala ona o se Lologa, Faatasia e le Tatalo
O le maileia ai i totonu o o latou potumoe, o le polokaina e meafale, ma le pipii i lala o laau, na faia ai e tagata o le aiga o Torres le mea e tasi e mafai ona faasaoina ai i latou.
Na amataina le aso 25 o Setema, 2005, o se Aso Sa toamalie, ma toafilemu mo Victor Manuel Torres Quiros, lona faletua o Yamileth Monge Ureña, ma lo latou aiga. Ua latou foi mai le lotu ma sa malolo, faitau, ma fiafia i se aoauli filemu ma timuga i lo latou fale i atumauga o Costa Rica.
Sa tele ina timuga le faaiuga o le vaiaso, ma sa leai se mea na ese i le eria po o le vaitau foi. Pe tusa o le 5:00 i le afiafi, na matauina ai e Tuagane Torres, ua fai si maualuga o le vaitafe o loo tafe i talaane i lo latou fanua, nai lo le mea sa masani ai ma ua lata atu lava i lo latou fale. Sa ia logoina ma le toamalie lona aiga, ma o se faaeteetega sa amata ai ona la tuuina ma lona atalii e 11 tausaga o Eliki ni palanikeke i lalo o faitotoa e taofi ai le vai mai le sao mai i totonu.
O se taimi mulimuli ane, na pa ai le vaitafe ma oo ai i le tulaga ua sili atu ma le mita ma le afa (lima futu) le loloto faataamilo i fafo o le fale. E le’i umi ae gapā ai le vai i faamalama. (Na iloa mulimuli ane e le aiga o le solo o palapala na mafua ai le tafe faafuasei o le vai.) Sa alaga atu Tuagane Torres i lona aiga e taufetuli i tuafale, sa i ai ni laau ma na maualuga teisi le eleele. Sa vave ona tuua e ona afafine talavou e toatolu o Sofia, Korina, ma Monika le fale.
Ae sa le mafai ona sao atu Uso Torres i fafo. O lea sa la taufetuli atu ai ma Elisapeta, o se tamaitai laitiiti sa vaai e lo latou aiga i le faaiuga o le vaiaso lena, i totonu o se potumoe. Sa vave ona la tulioso i luga o le moega, lea, o se mea na ofo ai, sa opeopea. Sa le iloa e se isi o i laua poo fea na i ai le isi vaega ma pe o manuia foi i latou. Sa faamanatu atu e le teineitiiti laitiiti o Elisapeta ia Uso Torres, “Aua e te tagi. Manatua e alofa lo tatou Atua ia i tatou.” Ona amata ai lea ona la tatalo.
Sa mulimuli atu Tuagane Torres i fafo i ona afafine ae iloa ai e na te le o iloaina le mea o i ai Eliki. I lona tauivi atu ai ma le tatafe o le vai, sa toe foi atu ai o ia i totonu o le fale. Sa ia maua atu Eliki o tutu i luga o se faaputuga o mea ua faaleagaina—o se puipui ua malepe, o ni meafale, lapisi, ma nai lala laau na tulei atu e le vai agai i se faitotoa sa tapuni. Sa la o atu faatasi loa i le umukuka, lea sa faanofo ai loa e Tuagane Torres ia Eliki i se nofoaga saogalemu ma maualuga. Na iloa e Tuagane Torres na taaiai se uaea nailoni i ona vae ona o le tatafe o le vai, lea sa faigata ai ona ia minoi. E ui i lea, sa mafai lava ona ia tuleia ese le pusaaisa ma nisi meafale, ma taofi ai le faitotoa mai le tapunia ma loka ai i laua ma lona atalii.
Sa mafai e Eliki ma Tuagane Torres ona la iloa mai i le umukuka ia teineiti i tuafale, ae la te le’i iloa po o faapefea mai Uso Torres ma Elisapeta. Sa fautua atu Tuagane Torres ina ia la tatalo faatasi mo le fesoasoani a le Tama Faalelagi.
Ae o le taimi lea, i fafo ma luga o se kuava, sa tatalo ai foi teineiti ia. Sa iloa mai e Sofia, Korina, ma Monika le tafe malosi atu o le vai i totonu o le latou fale. Mai itu uma lava, na foliga mai e le mafai ona ola se tasi o totoe i totonu o le fale. O le popole mo lo latou aiga ma le lagonaina o le maalilili ma le fefefe, sa usuina faatasi ai e teineiti ni pese ma tatalo.
“Sa matou ole atu i le Tama Faalelagi ina ia faamaui le vai,” o le tala lea a Sofia. “Sa matou iloaina e tatau ona matou faatuatua; afai e leai, o le a le mafai ona tupu le vavega. O le taimi na sili ona matou fiafia ai o le taimi lea na pupula ai o matou mata ma vaaia ai le vai ua maui.”
Sa faaauau ai pea ona fai ifo le suavai. E lei umi ae sau i fafo lo latou tamā e fesili mai pe o manuia i latou. Ua oo nei ina pogisa, o lea na ia toe alu ai i totonu o le fale, maua se moliga’o, ma faaaoga le penisini, e fai ai se sulu ina ia iloa mai e tuaoi, o loo i ai lava le aiga i totonu o le fale.
Sa iloa mai e se tuaoi le sulu ma sau loa e fesoasoani mai. Sa fesoasoani o ia e aumai i lalo teineiti mai laau, ma fesoasoani ia Tuagane Torres i le aveeseina o mea sa poloka ai le faitotoa o le potumoe lea sa i ai Uso Torres ma Elisapeta. O lena po sa nonofo ai le aiga i se tasi o le latou auaiga.
Ona sa pogisa le taimi na latou o ese ai, sa le’i iloa ai e le aiga o Torres po o le a le tele o mea na faaleagaina o lo latou fale. I le taeao o le Aso Gafua sa latou toe foi ane ma iloa ai na faaleagaina a latou mea uma lava.
Ae ui i lea, latou te le’i faitio. “Sa matou iloaina ua foaiina mai e le Alii, ua aveeseina foi e le Alii,” na fai mai ai Tuagane Torres (tagai Iopu 1:21). E ui ina ua faaleagaina lo latou fale ma a latou meatotino, ae fai mai Uso Torres latou te “lagonaina le agaga faafetai aua sa matou vaaia le matala o pupuni o le lagi ia i matou,” i o latou olaga ua faasaoina faapea ma faamanuiaga na mulimuli mai ai.
O le tele o na faamanuiaga sa oo mai i le agalelei o tagata o le Ekalesia i Costa Rica atoa. E oo ane i le Aso Tofi, ua maua e le aiga ia moega ma isi meafale, meaai, lavalava, ma isi mea e manaomia mai tagata o siteki i le eria o San José. O le fa o aso mulimuli ane, na maua ai e le aiga se isi nofoaga e nonofo ai.
“Ua matou aoaoina, e faaali mai e le Alii Lona alofa mo i tatou i le faaaogaina o isi tagata,” o le tala lea a Uso Torres. “Sa matua toatele lava tagata, matua toatele tuagane ma uso, sa fesoasoani mai i lena taimi. E ese le tele o le alofa na matou lagonaina. Sa leai se mafuaaga matou te fesili ai, ‘Aisea ua tupu ai ia i matou?’”
“O se vavega lava lo matou ola uma,” o le tala lea a Tuagane Torres. “E le masalomia lava ua faateleina le faatuatua o lo matou aiga. Ua ou iloa e aunoa ma se masalosalo, o loo soifua le Atua ma e alofa ia i tatou.”
Sa faaopoopo mai Uso Torres, “Ua leva ona i ai se anavatau a lo matou aiga: ‘E i ai le Atua i mea uma o o matou olaga.’ Ina ua mavae lo matou aafiaga, ua matou iloaina moni ai lenei mea. E silafia i tatou e le Tama Faalelagi. E tali mai o Ia ia tatou talosaga.”
Ata na tusia e Bjorn Thorkelson