Faitau Ou Faamanuiaga

Saunia e Peresitene Henry B. Eyring

Fesoasoani Muamua i le Au Peresitene Sili

Mai se lauga o le konafesi aoao ia Oketopa 2007.

O le faagaloina o le Atua sa avea lava ma faafitauli o Lana fanau talu le amataga o le lalolagi. Mafaufau i le vaitaimi o Mose, ina ua foai mai e le Atua le manai ma taitai ma puipui Lana fanau i auala faavavega ma le iloa. Ae na lapataia pea e le perofeta ia tagata: “Tau ina faaeteete … ne’i galo ia te oe nei mea na iloa ai e ou mata” (Teuteronome 4:9).

Saili ni auala e iloa ma manatua ai le agalelei o le Atua. O le a fausiaina ai a tatou molimau. E te manatuaina lena pese lea tatou te usuina i nisi taimi: “Faitau ou manuia ua maua mai; faitau taitasi, e te ofo tele i mea ua Ia fai” (“Faitau Ou Manuia,” Viiga, nu. 151).

A o laiti la ma fanau, sa amata ona ou tusitusia ni nai mea e uiga i mea sa tutupu i aso uma. Ou te lei misia lava se aso e tusa lava po o le a lou le lava po o le vave ou te amata ai i le taeao e sosoo ai. Ae ou te lei tusia se mea, ou te mafaufau loloto lava i le fesili lenei: “Pe na ou vaaia le aao o le Atua o aapa mai e pa’i mai ia i maua po o la ma fanau po o lo matou aiga i le aso?” Pe a ou mafaufau i mea na tutupu i le aso, ou te vaaia faamaoniga o mea sa faia e le Atua mo se tasi o i matou ae ou te lei iloaina i taimi pisi o le aso. Sa ou iloaina o le taumafai e manatua, na mafai ai ona faailoa mai e le Atua ia te au le mea na Ia faia.

E fesoasoani le Agaga Paia ia tatou iloa le mea ua fai e le Atua mo i tatou. Ou te molimau atu e alofa le Atua ia i tatou ma faamanuiaina atili i tatou, lea e lei iloaina e le toatele o i tatou. Ou te iloa e moni lena mea, ma e aumaia le olioli ia te au i le manatuaina o Ia.

• 1. O; 2. A; 3. U; 4. I; 5. F; 6. E.

Ma o le A Faateia ai Oe!

E mafai ona e aoao e matau ia faamanuiaga lea e tuuina atu ia te oe e le Tama Faalelagi i le auala lava e tasi na faia e Peresitene Eyring—e ala i le tusiina i lalo.

1. Tuu se api po o se api o talaaga ma se peni po o se penitala i talaane o lou moega.

2. I po taitasi ae e te lei tatalo ma moe, tusi i lalo:

   • Le aso.

   • Ni mea lelei se lua pe tolu na tupu i lena aso.

   • O le a se auala e te manatu ai o nei mea lelei o ni faamanuiaga mai le Tama Faalelagi.

3. Pe a e tatalo, ia mautinoa e faafetai i le Tama Faalelagi mo mea lelei e te manatuaina. E mafai foi ona e tau atu i tagata o lou aiga e uiga i faamanuiaga ua e mauaina!

O Le Auala na Faamanuia ai e le Alii le Fanauga a Isaraelu

O loo taua i le tusi a Esoto i le Feagaiga Tuai le auala na fesoasoani ai le Alii i Lona nuu filifilia pe a i ai ni o latou faafitauli. Faafetaui faafitauli taitasi ma se faamanuiaga lea na auina atu e le Alii e fesoasoani ai i Lona nuu. Tali:

Faafitauli	Faamanuiaga
1. Na avea le nuu filifilia o le Alii ma pologa i Aikupito.	A. Na auina atu e le Alii le tele o mala i Aikupito, ma iu ai ina tuu e Farao le fanauga [a Isaraelu] e o.
2. E le i faatagaina e Farao, le tupu o Aikupito, ia latou e o ese.	E. Na tuuina atu e le Alii ia Mose ia Tulafono e Sefulu. Na Ia faatagaina tagata uma lava e faalogo i Lona siufofoga ma na faaalia o Ia lava i nisi o i latou.
3. Na tuu e Farao le fanauga [a Isaraelu] e o, ae na tuliloa e ana autau i latou ina ia toe faafoi mai.	I. Na fetalai atu le Alii ia Mose e ta le papa i lona tootoo, ma na puna mai ai le vai.
4. Na fia feinu le fanauga [a Isaraelu] i le vao.	O. Na fetalai atu le Alii ia Mose ia taitai ese le fanauga [a Isaraelu] mai Aikupito e agai atu i le nuu o le folafolaga.
5. Na leai ni meaai a le fanauga [a Isaraelu], ma na latou fia aai.	U. Na vaeluaina e le Alii le Sami Ulaula ina ia mafai ona sosola ese le fanauga [a Isaraelu].
6. Na manaomia e le fanauga [a Isaraelu] le fesoasoani e mulimuli ai i le Alii.	F. Na auina atu e le Alii i tagata se meaai na pei lona tofo o le falaoa ma le hani. Sa taua o le manai, ma na latou mauaina i luga o le eleele i taeao taitasi.

Ata pue na tusia e Weston Colton; ata na tusia e Keith Christensen