O Le Tali i le Aso o Gaoioiga
“Aua e le maua e outou se mau, seia uma le tofotofoina o lo outou faatuatua” (Eteru 12:6).
Oka se leaga o le aso! I le a’oga i le aso ou te le’i talanoa i se tasi, ou te le’i taalo ma se tasi i le malologa, ma e ou te le’i nofo faatasi ma se tasi i le taimi o le malologa. Ua atoa le lua vaiaso o matou nonofo ma lo’u aiga i lenei aai fou, ae e le’i maua lava ni au uo!
A o ou savali atu i lo’u fale fou, na ou vaai i lo’u uso laitiiti o taaalo ma se teineitiiti mai le isi itu o le auala. Na talotalo mai o ia. “Malo, Rosa!”
Na faliu atu i ai ae leai se tala na ou fai atua. E toatolu teineiti i lo matou auala e tutusa tausaga ma lou uso laitiiti. E toafia teineiti i lo matou auala e tutusa o ma tausaga? Leai. Leai ma se tasi!
Na ou tuleia le faitotoa i luma ma faapau la’u ato faafafa i le fola o le fale.
“O Sister Garcia mai le Peraimeri lea na vili mai e faamanatu atu ia te oe le tou aso o gaoioiga i le aso,” o le tala lea a Tina.
“Ou te le fia alu i le aso o gaoioiga,” o lau tomumu lea. “Sa ou faaaluina le aso atoa ma tamaiti ou te le iloaina. Ou te le toe fia faaaluina se isi itula ma ni teineiti ou te le iloa!” Atonu e faigofie mo nisi tagata le talatalanoa ma ni tagata e le masani ai, ae leai la mo au.
“Ou te iloa sa faigata le siitia mai iinei ma tuua le tele o au uo tuai,” o le tala lea a Tina. “Sa ou tatalo lava ina ia vave ona faia ni a tatou uo fou.”
“Ma au foi,” o lau tala lea. “Ou te tatalo mo lena mea i po uma, ae e oo mai lava i lenei taimi e le’i talia lava e le Tama Faalelagi au tatalo. E pei e le o faalogo mai o Ia.”
Na oomi e Tina lou lima. “Atonu o le valaau mai ia Sister Garcia o lau tali lea,” o lana tala lea.
“E mafai faapefea ona avea lena ma tali i au tatalo?” o lau fesili lea.
“O nisi taimi pe a tatou tatalo, e faamoemoe mai le Tama Faalelagi ia i tatou e fai se mea e fesoasoani e tali ai a tatou tatalo,” o le tala lea a Tina. “Ua taua o le galue i le faatuatua. E tatau ona tatou faia nisi mea nai lo le na o le tatalo. O nisi taimi e tatau ona tatou galue i le faatuatua ae tatou te le’i maua le faamanuiaga.”
“Faamata e mafai?” Sa ou mafaufau ifo ai. “Faamata o le alu i le aso o gaoioiga o le tali moni lea o lau tatalo?”
Mulimuli ane, na fesili mai Tina ia te au pe ou te manao e momoli au i le gaoioiga. Na ou manavanava loloa ma lulu atu lo’u ulu. E ui lava ina ou fefe, ae na foliga mai o se mea e tatau ona fai.
Na tatavale lo’u fatu ina ua ma taunuu i le falesa. Na faafeiloai au e Sister Garcia ma taitai atu au i se nofoa i le laulau. O lona leo malu ma lona agaalofa na fesoasoani ina ia ou maua le lagona lelei.
Na tilotilo mai ia te au se teine mai i le isi itu o le laulau. “Malo, o a’u o Teresa,” o lana tala lea. “E te fou mai?”
Sa ou tau faaletonu, o lea sa na o le lue atu ai o lou ulu.
“Pei lava na ou vaai ia te oe i le aoga,” o le tala lea a Teresa. “O le a le vasega e te i ai?”
Na ou fai atu ma le fefe. “O le vasega a Mrs Lee,” o lau tala lea.
“Ou te i ai i le vasega lea e sosoo atu!” na ia fai mai ai.
Na ma talanoa i a ma vasega ma mataupu ma te fiafia i ai. A o ma talanoa, na ou ofo i le tele o mea ma te tutusa ai. E oo lava foi i le faasee i seevae ma te fiafia uma lava i ai!
Ina ua piki au e Tina ua mae’a le gaoioiga, na ou oso i totonu o le taavale.
“Tina, e mafai ona ma taaalo ma lau uo fou o Teresa?” Na ou talotalo atu ia Teresa, ma na ia toe talotalo mai foi.
Na mafaufau Tina o se manatu lelei, ma na ma faasee i seevae pau taavalevale ma lau uo fou i luga ma lalo o lo matou auala, i le afiafi atoa.
I lena po a o ou tootuli i autafa o lou moega, sa ou faafetai atu i le Tama Faalelagi mo le taliina o au tatalo. I le taimi muamua lava sa ou fefe ou te alu i le aso o le gaoioiga, ae ua ou fiafia na ou alu. Ou te fiafia sa ou lototoa e galue i le faatuatua.
Ata na tusia e Natalie Malan