Ua Matou Liliu Atu i le Tatalo

Miguel Troncoso, Santa Cruz, Atenitina

I se tasi Aso Sa na maua ai e la matou siteki se tala fou manaia e faapea o Elder Carlos H. Amado o le Fitugafulu o le a malaga mai e lauga i la matou siteki i le afiafi o le Aso Lua. Sa matua faafiafiaina lou aiga, ae sa ou popole pe o le a faapefea ona matou auai i le sauniga.

Ona o au o se faiaoga i se aoga maualuga, sa i ai sau vasega e tatau ona aoao i le afiafi o le Aso Lua. Ae paga lea e seasea ou maua se avanoa faataga e maua ai se aso malolo. I le le mautinoa o le mea e fai ae sa i ai le naunau ia faalogo i le lauga a Elder Amado, sa matou liliu atu ma lou aiga i le tatalo, ma le faamoemoe o le a saunia e le Alii se ala.

O le aso a o lumanai le konafesi, sa uunaia au e talanoa i le puleaoga e uiga i lou aluese vave i le 20 minute ina ia mafai ona matou auai ma lou aiga i le sauniga. Na ou taunuu i lona ofisa ma ae ou te lei fai atu se tala, sa fesili mai ia te au pe afaina ae sui mai i luma i le 2 itula le taimi amata o lau vasega o le Aso Lua nai lo le taimi masani. O lona uiga o le a tuua lau vasega i le vave e 2 itula.

Oka se faamanuiaga o lenei mea mo matou. Sa matou taunuu e lei taitai oo i le taimi o le sauniga ma sa lagona le Agaga i le faatasi ma se tasi o soo o le Alii. E oo i lo ma atalii e lima tausaga sa ia maua se avanoa faapitoa e opoina ma talanoa ma Elder Amado a o lei amataina le sauniga. Sa matou matua olioli faatasi ma isi o le faapotopotoga i le liligi ifo o le Agaga. Ma o se faaopoopoga, sa matou maua se molimau faatasi o se aiga, e silafia e le Tama Faalelagi o tatou manaoga ma faafofoga mai ia tatou tatalo.