Seleseleina o Fua o le Faalagolago o le Tagata ia te Ia Lava i Avanoa Laiti
O le toatele o tagata o le Ekalesia e nonofo i falemautotogi po o fale e le tetele ma e leai se vaega o fanua e avanoa mo se togalaau. O isi e nonofo i itu e matutu lea e leai se mea e ola ai i le palapala. Ua manatu nisi e leai ni o latou taimi po o ni tupe e toto ai a latou lava meaai. Ae faatasi ai ma le faatuatua, maelega, onosai, ma sina fatufatuai e mafai ai e soo se tasi ona manuia i le faiga o togalaau.
A o manatunatu ma le agaga tatalo tagata o le Ekalesia i le fautuaga e toto ni togalaau ma saili mo auala e usitai ai i lenei mataupu faavae, o le a latou maofa i tali latou te maua. O nisi nei o aafiaga ma fautuaga mai tagata o le Ekalesia o e ua mulimuli i le fautuaga e toto se togalaau.
Fai Togalaau i se Paketi
A o nofo ai i se falemautotogi laitiiti i le taulaga, sa iloa e Noelle Campbell, o Houston, Texas, ISA, o le tele lava o mea sa ia manaomia mo le totoina o se togalaau sa i ai lava i lona fale. I le poletito o lona fale, sa ia amata totoina ai fualaau faisua i koneteina ua uma ona faaaoga—o soo se mea lava mai i koneteina o pauta tamea e oo i pakete mo otaota o tamai pusi.
Sa maofa o ia i le tele o meaai sa mafai ona ia totoina i koneteina laiti. Ona ia faatelēina lea o lana togalaau, i le faaaogaina pea lava o mea sa aoina mai lona fale. Sa avea ni fatatusi tuai ma ni paelo e fai ma se faatoaga e faatu agai i luga. Ua ia faaaogaina le faavaa o se pa’u osooso [trampoline] e faasosolo ai pi uumi ma pi pupuu ma isi laau sosolo. Ua ia faaaogaina foi ni meavalavala tuai mai mea fai papakiu e taofiofi ai ana tamato mai le mafulifuli.
“Ou te fiafia i le luitau o le toto o togalaau i koneteina, i le vaaia o la’u poletito ua suia mai sina sima laitiiti e 8-futu i le 8-futu (2.5 m i le 2.5 m) i se togalaau lanumeamata, ola, ma le fua,” o le tala lea a Noelle.
Faaaogaina o Koneteina
I Alberta, Kanata, ua iloa e Shirley Martin mai ona aafiaga e toetoe lava o soo se tamai laau e mafai ona e totoina i totonu o se koneteina faatauvaa e pei o atigi faguinu. Fai mai o ia o le ki i le faamanuiaina o se togalaau e toto i koneteina o le lava o le malamalama, e tusa lava pe na o se faamalama po o se moli ua mamanuina e fesoasoani i le ola o laau, ma ia le aunoa ona fui, aua o koneteina e vave matutu nai lo o se togalaau.
Fai mai Shirley “O le tausaga lenei, o loo ou totoina se togalaau e faaaoga i meaai a le matou aiga, i nai ipu toto laau i luma o le faatautau o le matou fale, ua i ai ni laau faamanogi meaai, latisi, tamato, aniani, sive [chives], ma se pepa fai meaai. Soo se mea lava e te mafaufau i ai e mafai ona e totoina.”
Aoao e ala i le Faia
Sa tonu muamua ia Kwan Wah Kam o Hong Kong e toto se togalaau e faaopoopo atu i ana meaai o loo ia teuina. Na te lei taumafai muamua e toto ni ana lava meaai ae sa manatu e mafai ona ia aoaoina mea uma e manaomia ona ia iloa i le faitau i tusi.
E ui ina sa aoga ia faamatalaga sa ia mauaina, ae sa le’i umi ae iloa e Kwan, o lesona sili lava sa ia aoaoina na maua mai i le faagasologa o le totoina lava o le togalaau. Faatasi ai ma tausaga faaopoopo taitasi o le poto masani, ua tele ai mea ua ia iloaina e uiga i palapala e sili ona lelei e faaaoga mo fatu laau eseese, o le auala e iloa ai fatu lelei ma fatu leaga, auala eseese e fui ma faafetalaisa ai laau, ma vaitau e sili ona lelei mo le totoina o fualaau faisua eseese.
Ae peitai, o lesona sa aoaoina e Kwan sa le’i gata ai i le totoina o se togalaau. I se tasi afiafi, sa faapea o ia ua faaleagaina e se matagi malosi lona togalaau. I le taeao, sa faateia o ia ina ua tau atu sa lei faaleagaina ia laau, ae, ua atili ai le malolosi o le ola o laau ona o le suavai faaopoopo.
“Mai lena aafiaga, ua ou iloa ai o le faatuatua i le Atua, e mafai ai ona tatou malolosi atili a o tatou faafetaiaia ma le lototele o tatou tofotofoga ma faigata,” o le tala lea a Kwan. “O faamanuiaga ua ou maua mai le totoina o togalaau e faaletino ma faaleagaga.”
O atigipusa, pakete, atigifagu, ma isi koneteina e mafai ona faaaogaina e liliu ai ni avanoa laiti e avea ma ni togalaau e fua tele.
ata na pueina e noelle campbell