O Le Faaaogaina o le Konafesi e Suia ai Olaga
E le’i leva ona uma le konafesi aoao o Oketopa 2010, ae tonu loa ia Iareto ma Katelina Samita o Iuta, ISA, e alu se latou tietiega ma le la fanau e toatolu e faataamilo i lo latou pitonuu e matamata i laulaau felanulanuai o le tautoulu. A o le’i o, sa momono e Uso Samita se tamai fagu suauu paia i lana taga. Sa mafaufau lava o ia i le saunoaga a Peresitene Henry B. Eyring i le sauniga perisitua ina ia saunia i taimi uma mo auaunaga faaleperisitua (tagai “Auauna Atu ma le Agaga,” Liahona ma le Ensign, Nov. 2010, 59).
A o latou toe foi atu i le fale, sa tau atu le au Samita i ni tagata o siomia se teineitiiti laitiiti o taatia i lalo, sa foliga mai sa tigaina i se mafatiaga o lona ulu. Sa latou faalogo atu o taualaga se tamaitai, “Faamolemole, e i ai se tasi o i ai se suauu paia? Faamolemole!” Sa vave ona afe i tua le taavale a Uso Samita ma tuu atu le suauu i le tama o le teineitiiti. Ina ua uma se faamanuiaga faaleperisitua, sa toe malamalama le teineitiiti ma amata ona tautala atu i ona matua. O se taimi mulimuli ane, sa taunuu ane ai ni fomai fesoasoani ma ave o ia i le falemai.
“Sa lagonaina i o matou loto se mafanafana ma se filemu ona o lo matou i ai i le nofoaga sao i le taimi sao, mo le aumaia o le suauu, ma e pei ona saunoa Peresitene Eyring, ua saunia,” o le tala lea a Uso Samita. “Sa vaai le ma fanau i le faamanuiaga o le mana o le perisitua, ma sa matou o ese mai ma le lagonaina o le alofa o le Tama Faalelagi mo i matou ma lenei teineitiiti laitiiti ma lona aiga.”
E pei foi o le au Samita, e tele aiga ua faamanuiaina ona o le mulimuli i fautuaga na maua i le taimi o konafesi aoao. A o sauniuni le au paia mo le isi konafesi aoao, e tolu ni aiga ua faasoa mai a latou tala o le faalogo i le siufofoga o le perofeta.
Mo nisi tala (i le gagana Peretania) po o le faasoa mai o ou lava aafiaga (i soo se gagana), faitau le vaega atoa o lenei tusiga i le vaega o Church News and Events o leLDS.org i le lds.org/church/news/how-general-conference-changed-my-life.
Anne Te Kawa, Tararua, Niu Sila
O le amataga o le 2010, sa ou feagai ai ma ni luitau ogaoga faaletagata lava ia. Sa fautuaina mai e lo’u epikopo atonu o le a aoga ia te au pe a ou talanoa i se faufautua faapolofesa. Sa faateia au i lea manatu. Ou te faigaluega ma aoga faamasani i le itu e faatatau i le fofoina o mausa o le tagofia o fualaau faasaina ma le ava malosi, o lea sa ou faapea ai, “Ua toeitiiti lava foi avea a’u ma se faufautua! Ou te le manaomia ni fesoasoani mai fafo atu.”
Sa ou tauivi lava pea ma nisi o o’u luitau—ma lo’u lava faamaualuga—ae oo mai loa le konafesi aoao o Aperila. Sa tuuina mai e Elder James B. Martino o le Fitugafulu se tautalaga na faaautuina, “E Galulue Faatasi Mea Uma mo le Lelei” (tagai i le Liahona ma le Ensign, Me 2010, 101), sa faatatau tonu i le taulimaina o mausa.
Sa ou lagonaina le faagaeetia i lana savali, ma sa ou naunau loa e tatalo mo le taitaiga i le mea e tatau ona ou faia. Sa ou tuua le konafesi ma le manao e saili le faatuatua ma faalagolago atu i le Faaola e taialaina au e ala i le Agaga Paia.
E lua vaiaso sa ou mafaufau loloto ai ma tatalo ma tomanatu ma sa iu loa ina ou filifili o le a ou taumafai e auai i talanoaga faafaufautua. Sa o se aafiaga aoga ma faamanuiaina. Ma le isi, o le toe faitauina o le saunoaga a Elder Martino, fesoasoani i ai ma le tatalo i le Tama Faalelagi, ma le faalagolago i le Togiola a Lona Alo o Iesu Keriso, ua tuuina mai ai ia te au le saogalemu tumau. Ou te molimau atu o le sailia ma le lotomaulalo o le Alii o le auala lava lea e faatoilaloina ai tofotofoga. O le a Ia taialaina i tatou ia iloa mea patino e tatau ona tatou faia.
Andrea Roueche, Texas, ISA
Sa avea i maua ma lo’u toalua o Kolini ma ni matua ia Oketopa 2009. E oo ane i le taimi ua atoa le lima masina o le ma tama o Elisa, ua amata ona ma talanoa pe o afea e amata ai ona faaaofia o ia i afiafi faaleaiga ma le suesueina o tusitusiga paia. Pe sa aoga ea le fai o afiafi faaleaiga a o ala o ia? Mata na te aoaoina moni ea se mea mai a matou faitauga leotele o le Tusi a Mamona?
I le taimi o le konafesi aoao o Aperila 2010, na saunoa mai ai Elder David A. Bednar o le Korama a Aposetolo e Toasefululua, “O talavou o vaitausaga uma, e oo lava i tamaiti laiti, e mafai ona tali atu i le agaga tulaga ese o le Tusi a Mamona” (“Ia Mataala Pea ma le Maelega Atoatoa,” Liahona ma le Ensign, Me 2010, 40).
O suiga sa matou faia sa faigofie ma faifaimalie. E masani ona ma tataina se tisiketi o pese a le Peraimeri mo Elisa. Matou te faitauina faatasi ma ia ni nai fuaiupu mai le Tusi a Mamona i le taimi o le taumafataga i le afiafi. Ua amata ona fai a matou tatalo faaleaiga a o lei alu Elisa e moe. A matou savalivali, ou te faasino atu i ai manulele ma fai atu i ai, “Na fai e Iesu ia manulele la mo tatou.” Atonu e le malamalama i ai i le taimi nei, ae o le a malamalama i ai [i se taimi].
Ua ou iloaina o nei mea ua aveese ai le tele o lo’u popole mo le lumanai. Ou te lagona afai e fai la’u vaega i le aoaoina o Elisa i mea e tatau ona ia iloa, ma mulimuli i fautuaga faaperofeta, o le a faamanuiaina o ia i le lumanai.
Sela Fakatou, West Midlands, Egelani
O lo matou aiga, e pisi lava tagata uma. O nisi taimi matou te le faaavanoa ai le taimi e faalogo atu ai ma le totoa i le tasi ma le isi pe faataitai foi ona faaali atu le agalelei po o le faaaloalo. O lea la, i a matou sauniuniga mo se konafesi aoao sa loma, sa matou tatalo ia iloa se auala ia matou ola vavalalata atili ai o se aiga.
O le saunoaga a Elder Robert D. Hales, “O Lo Tatou Tiute i le Atua: O Le Misiona a Matua ma Taitai i le Tupulaga Faia’e” (tagai i le Liahona ma le Ensign, Me 2010, 95), na taliina a matou tatalo ma a matou fesili.
Sa faapitoa ona faagaeetia au i le tala i le atalii o le atalii o Elder Hales lea na fesili, “Tamamatua! O e iina?” Sa faamatala mai e Elder Hales o le Korama a Aposetolo e Toasefululua, “O le i ai iina o lona uiga o le malamalama i loto o le autalavou ma fesootai ma i latou. Ma o le fesootai ma i latou o lona uiga e le na o le talanoa ma i latou ae o le faia foi o mea faatasi ma i latou.”
O loo matou galulue e faaleleia a matou fegalegaleaiga o le tasi ma le isi. I taumafataga i le afiafi, matou te talatalanoa e uiga i le aso. Matou te talatalanoa i luitau o loo matou feagai ma auala o loo fesoasoani ai mea o loo matou aoaoina mai tusitusiga paia i lo matou faafetauia ma le faatoilaloina o na luitau.
O le faasaosaoina o le taimi mo nei fetufaaiga sa tele se taumafaiga na alu ai. Ae a o avea nei tu ma masani lelei o se vaega o le olaga faaleaiga, ua ou lagonaina ai se alofa faapitoa mo lo’u aiga. A o ou mulimuli i le fautuaga faaperofeta sa ou mauaina i le konafesi, ua faatumulia lava lo’u mafaufau i tali o isi fesili, ma ua ou iloa ai auala e mafai ona avea atili ai a’u e faapei o le Faaola o Iesu Keriso. E leai se isi taimi muamua, ua ou lagonaina ai se lagona o le toafilemu nai lo le atuatuvale.
O se savali o le konafesi mai ia Elder James B. Martino na tuuina atu ai ia Anne Te Kawa o Niu Sila le lototele e tatalo ai mo le taitaiga sa ia manaomia.
Sa maua e Colin ma Andrea Roueche tali sa la sailia i se savali o le konafesi mai ia Elder David A. Bednar.