O Sē Puipuia le Faatuatua
O Kubangila Kasanza Celva o Kinshasa, Temokarasi Ripapelika o Congo, o se tagata taalo maoae i le tele o au.
Na vave le kikiina o le polo e le tagata taalo mai le isi au e agai atu i le mea e tini ai. Na foliga mai na te mautinoa e sikoa. Ae na maua o ia e Celva, ma faafetaui a la’ua laa, kiki ese le polo, ma tamoe i le isi itu.
“O au o sē puipuia,” o le faamalamalama mai lea a Celva e 12 tausaga. “O lo’u tulaga o le taofia lea o le isi au mai le mauaina o se sikoa.”
O Celva o se ituaiga tagata taalo e te fiafia e i ai i lau itu. E filemu ae malosi, ua sauni o ia e galue malosi, ma e fiafia e vaai ua manuia tagata uma o le au. O uiga ia o loo avea ai foi o ia ma se vaega sili o nisi au—o lana ekalesia ma lona aiga. Ma e faapena foi lona naunautaiga e puipuia le upu moni.
Celva ma Nifae
O le mau e sili ona fiafia i ai Celva o le 1 Nifae 3:7: “Ou te alu atu ma fai ia mea ua poloaiina e le Atua.” E pei ona faia e Nifae, e faatuatuaina foi e Celva le Alii. “Na te le tau mai ia te au se mea e faia e aunoa ma le saunia o se ala mo au ou te faia ai. Na te faamalosia au ma auina mai isi e fesoasoani mai ia te au.”
Alu ma Fai
“O le faalogo i mea ua aoaoina ai i tatou e uiga i le talalelei e taua,” o le tala lea a Celva. “Ae e taua foi le faia o mea ua aoaoina ai i tatou.” Na te manatuaina lona papatisoga ma e taumafai i aso taitasi e faaaoga le meaalofa o le Agaga Paia e faia ai ni filifiliga poto. E le’i leva ona maua lona Perisitua Arona, o loo tulimatai atu e alu i le malumalu i se aso e osia ai ni feagaiga faaopoopo ma le Alii, ma e fuafua e auauna atu i se misiona. E manao o ia e faatulaga se faataitaiga lelei mo ona uso ma fesoasoani i lona tina ma lona tama.
“Ou te faaaloalo i lou tina ma lou tama e ala i le faia o mea la te fai mai ia te au e fai ma e ala i le tausia o poloaiga a lo tatou Tama Faalelagi,” o lana tala lea. “I le avea ai ma ulumatua, ou te iloa e taua le faia o se faataitaiga lelei mo ou uso, aua o mea ou te faia atonu o le a latou faia foi.”
Tumau ai i le Malosi
E iloa e Celva le taua o le galue malosi, i taaloga faapea foi i le talalelei. O tatalo faaleaiga ma le tagata lava ia, suesueina o tusitusiga paia faaleaiga ma le tagata lava ia, o afiafi faaleaiga—o vaega uma ia o ana mea masani e fai. E i ai lana molimau i le Upu o le Poto ma e iloa o nisi mea e lelei mo le taumafa a o isi mea e le lelei. “E le tatau ona inu pia ia tagata taaalo,” na ia fai mai ai ma le malosi.
O Sē PuiPuia Moni
A o agai atu le Ekalesia i le lumanai, e ese le manaia o le iloaina o loo i ai ni alii talavou malolosi e pei o Celva o e naunau e faia le mea sao. “Ou te iloa o loo soifua lou Tama Faalelagi, e moni Iesu Keriso, ma o Iosefa Samita o le perofeta na toefuataiina le talalelei i luga o le fogaeleele,” o le tala lea a Celva. “Ua ia te au lena molimau ma o le a ou puipuia pea e le aunoa le Ekalesia i auala uma.”
Ata na pueina e Richard M. Romney