Ia Faamalolo i e ua Loto Momomo
I tausaga o le 1990 sa oo atu ai lo’u aiga i Aferika ona o la’u galuega i le Ekalesia, lea sa tofia ai au ou te fesoasoani i taumafaiga laveai i Burundi, Rwanda, ma Somalia. O se vaitaimi lenei o se periota faigata o le oge, sauaina, ma taua, ma o puapuaga sa matuai lofituina.
E faitau afe sa nonofo i nofoaga o tagata sulufai. E faitau selau tamaiti ua leai ni aiga sa nonofo i ni tamai fale sa fausia e i latou lava. Sa i ai pea i taimi uma faama’i o le kolela, taifoi, ma le tino vale. O le namu leaga o lapisi ma tagata oti sa faaopoopo atu i le leai o se faamoemoe.
Sa ou lagonaina le uunaia o a’u e ofoina atu uma le fesoasoani e mafai ona ou tuuina atu. Sa galulue faatasi le Ekalesia ma le Komiti Faavaomalo o le Koluse Mumu ma isi faalapotopotoga, ae sa le mafai ona tuua lo’u mafaufau i nisi taimi, pe o fai e a tatou taumafaiga se eseesega i le feagai ai ma le tele o le fasioti tagata ma le malaia. Sa faigata ona aveese lagona o le leai o se aoga ma le lotovaivai, ma e masani pe a ou moe i le po, ou te tagi.
O le vaitaimi lea o le lotovaivai na ou malamalama ai i le uiga loloto o se fuaitau masani. O le ta’ua ai o Isaia, o loo faamatala mai ai o le Faaola sa “faauuina e faamalolo i e ua loto momomo, e talai le saolotoga i e ua noatia, ma tatalaina le falepuipui ia i latou o e sa saisaitia” (MFF 138:42).
Sa ou vaai ma talanoa ma le toatele o tagata o e sa “loto momomo” i ni auala tulaga ese. Ua leai tagata sa pele ia i latou, fale, ma se olaga toafilemu. Ae o le toatele o i latou sa faaalia lava faailoga o le “faamaloloina.” Mo se faataitaiga, e masani lava pe a matou o atu i se fale faatauvaa, e fesili mai tagata e i ai, “E mafai ona outou tatalo mo i matou?” Na foliga mai sa maua e tagata le fiafia ma le toafilemu i le ole atu i le Alii.
Ioe, e le mafai ona tatou vaai mo le aafiaga o le Togiola i le na o le olaga nei. E oo mai foi i le olaga a sau. Ou te iloa e i ai le togiola mo e ua maliliu ma le toetu mo tagata uma ona o le Faaola. O le tiga tatou te oo i ai i lenei olaga—po o le a lava le ogaoga—o le a aveesea ma faamaloloina e ala i le Togiola.
O Mamona ma Moronae, o e sa soifua i taimi o le tele o le fasioti tagata ma le maliu, sa tusi e uiga i le taula o le faamoemoe i se Atua agaalofa, o lona alofa mutimutivale ma lana faamasinoga tonu e sili atu i le poto uma (tagai, mo se faataitaiga i le, Moronae 7:41–42). O le suesueina o tuleiga a nei perofeta na faamalosia ai lo’u lava faatuatua. A ou mafaufau pe o faia e a tatou taumafaiga se eseesega, ou te lagonaina le faamautinoaga e faapea, o le alofa tunoa o le Faaola o le mana faaola aupito taua lea. Atonu e tapulaa a tatou taumafaiga sili ona lelei, ae o Ana taumafaiga e le muta ma e faavavau.
E leai se masalosalo ua fatuina e tulaga o le lalolagi le tele o ituaiga faanoanoaga, ae e leai se mea e le mafai ona oo atu i ai le Faaola e faamalolo. E mafai e i tatou uma ona maua le faamoemoe mautinoa e faapea, o le Togiola a Keriso e mafai ai ona faamaloloina ma faaatoatoaina o tatou loto. Faatasi ai ma lenei malamalama, e mafai ai ona faatino la’u galuega, ma le iloa o Ana taumafaiga e faamanuiaina i taimi uma.
Lo’u Tama e, saunia e Simon Dewey