I lalo o le Perisitua ma e ala i le Mamanu o le Perisitua

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

O’u uso pele e, oka se faamanuiaina o i tatou! E le gata o i tatou o tagata o le Ekalesia, ae o i tatou foi o sui auai o le Aualofa—“o le faalapotopotoga a le Alii mo tamaitai.”¹ O le Aualofa o le faamaoniga o le alofa o le Atua i Ona afafine.

Pe le oso fiafia lou fatu pe a e manatua amataga fiafia o lenei faalapotopotoga? I le aso 17 o Mati, 1842, na faatulagaina ai e le Perofeta o Iosefa Samita ia uso “i lalo o le perisitua i le mamanu o le perisitua.”²

Ina ia faatulagaina “i lalo o le perisitua” na tuuina atu ai i uso le pule ma le taitaiga. Na aoao mai Eliza R. Snow, o le peresitene aoao lona lua o le Aualofa, o le Aualofa “e le mafai ona i ai e aunoa ma le Perisitua, mai le mea moni e faapea o iina i lena punavai e afua mai ai ona pule ma faatosinaga uma.”³ Sa faamalamalama mai e Elder Dallin H. Oaks o le Korama a Aposetolo e Toasefululua, “O le pule e faaaogaina e taitai ma faiaoga o le Aualofa … o le pule lea o le a oo atu ia i latou e ala i le fesootaiga a le latou faalapotopotoga i Le Ekalesia a Iesu Keriso o le Au Paia o Aso e Gata Ai ma e ala i le vaetofiaina taitoatasi o i latou i lalo o aao o taitai perisitua na valaauina i latou.”⁴

Ina ia faatulagaina “i le mamanu o le perisitua” ua tuuina mai ai i tuafafine ni tiutetauave paia. Na faamalamalama mai e Julie B. Beck, peresitene aoao o le Aualofa: “Tatou te galulue i le faatulagaga o le perisitua—o lona uiga, tatou te saili, maua, ma faatino i luga o faaaliga; e faia faaiuga i aufono; ma tatou popole i le tausiga o tagata taitoatasi. O lo tatou faamoemoega, o le faamoemoega foi lea o le perisitua ina ia saunia i tatou lava mo faamanuiaga o le ola faavavau e ala i le osia ma le tausia o feagaiga. O le mea lea, e faapei o o tatou tuagane o loo umia le perisitua, o la tatou galuega o le galuega o le faaolataga, auauna atu, ma le avea ma se nuu paia.”⁵

Barbara Thompson, fesoasoani lua i le au peresitene aoao o le Aualofa.

Mai Tusitusiga Paia

1 Korinito 11:11; Mataupu Faavae ma Feagaiga 25:3; 121:36–46

Mai lo Tatou Talafaasolopito

I le fausiga o le Malumalu o Navu, sa mananao ai se vaega o uso ina ia faatulagaina e lagolagosua i le taumafaiga e fausia le malumalu. Sa faapea ona tusia ai e Eliza R. Snow ni tulafono mo lenei vaega fou. Ina ua ia faaalia atu i le Perofeta o Iosefa, sa tali o ia: “Ta’u atu i tuafafine ua taliaina e le Alii la latou taulaga, ma o loo ia te Ia se mea e sili atu mo i latou. … O le a ou faatulagaina tamaitai i lalo o le perisitua i le mamanu o le perisitua.”⁶ O se taimi puupuu mulimuli ane, sa ta’u atu ai e le Perofeta i le Aualofa fou na faatulagaina: “Ou te tuuina atu nei le ki ia te outou i le suafa o le Atua, ma o le a olioli lenei Faalapotopotoga, ma o le a oo mai le poto ma le malamalama e mai lava i lenei taimi.”⁷ Sa faamoemoeina ia uso e tulai ae i se tulaga fou o le paia ma ia saunia mo sauniga o le perisitua o le a le toe umi ae faataunuuina i totonu o le malumalu.

Ata na tusia e Brandon Flint