O Le Taotoga o Eli
“O i latou uma o e maua lenei perisitua ua talia a’u, ua fetalai mai ai le Alii” (MFF 84:35).
Na tilotilo atu Eli i faaputuga o meaaoga na avatu e lana uo ina ua uma le aoga. Na misi e Eli le isi vaiaso o le aoga ona o se siama na aafia ai lona taliga.
I lena afiafi na o atu ai matua o Eli i lona potu. Na nofo lona tina i le pito o le moega o Eli ma uu lona lima. “Eli, ua manatu le fomai ua e manaomia se taotoga,” o lana tala lea.
“O le a le ituaiga taotoga?”
“E na te manao e tuu ni faagaau i lou taliga e taofia ai mai le mauaina o nisi siama,” o le tala lea a Tina. “E le tiga, ma o le a e tea i tua mai le falemai i se aso se tasi.” Na ia oomiina lona lima.
Na faatuatuaina e Eli ona matua. Ae o le manatu i le faia o se taotoga na fefe ai o ia. Na ia mafaufau e uiga i le tala na ia faalogo ai i le Peraimeri e uiga ia Iosefa Samita. Ina ua fitu tausaga o Iosefa, na aafia ai le ponaivi o lona vae i se siama. Na faateteleina le faaletonu o lona vae ma na tonu ai loa i le fomai e tatau ona aveese se vaega o le ponaivi, po o le aveese atoa o le vae o Iosefa pe e oo lava ina oti ai foi.
I le vaitaimi o Iosefa Samita, e avatu e fomai i tagata ia meainu malolosi e fesoasoani i le faagaseina o le tiga i le taimi o se taotoga, ae na tetee e Iosefa le meainu malosi lea na fautuaina atu e le fomai e na te inuina. Ma na tetee foi e nonoa o ia i le moega. Fai ma o ia, afai e opoina o ia e lona tama, o le a le minoi o ia. Na opomauina o ia i lima o lona tama i le taimi atoa o le taotoga tiga. Na manuia le taotoga, ma na manuia Iosefa.
Na mafaufau Eli i le lototoa o Iosefa ma le faatuatua i lona tama. “E mafai ona fai sou faamanuiaga, Tama?” na ia fesili mai ai. Na iloa e Eli e mafai ona fesoasoani se faamanuiaga faaleperisitua ia te ia. I le amataga o le tausaga aoga, na tuuina atu ai e le tama o Eli ia te ia se faamanuiaga.
“O se manatu lelei tele lena,” o le tala lea a lona tama.
Na piilima le tina o Eli ma punou lona ulu. Na faalogoina e Eli lima o lona tama i luga o lona ulu. Na oo ina leotele lona tama ua mautinoa, a o ia faamanuiaina Eli ina ia le fefe ma ia manuia atoatoa o ia.
Ina ua uma le faamanuiaga, e le’i toe fefe ia Eli. “E mafai ona fai lo’u taotoga i le taimi nei,” o lana tala lea.
O le tolu o aso mulimuli ane na alu ai o ia i le falemai ma toe foi ai i le fale i le aso na sosoo ai. Na vave ona taofia le siama i le taliga, ma na vave foi ona fai e Eli ia meaaoga ia na ia misia.
Na lagona le agaga faafetai o Eli i le avea ai o ia o se tagata O Le Ekalesia a Iesu Keriso o le Au Paia o Aso e Gata Ai ma na mafai ona faia lona faamanuiaga e ala i le perisitua.
Ata na tusia e Dilleen Marsh