Seia Tatou Toe Feiloai
Saogalemu i Lo’u Aiga Faaleuarota
Ina ua amata ona ou auai na o au i le ekalesia i le 12 o ou tausaga, na ou iloa ai le faamanuiaina o au e le Tama Faalelagi i se polokalama saogalemu ua uma ona mamanuina.
O se tasi o ou manatuaga sili ona pele a o ou laitiiti o le pa’o’o o seevae muliuumi o lo’u tina i le fola laupapa malo o le umukuka a o ia saunia le meaai a lo matou aiga mo le lotu. Na matua aofia lava o ia i lo matou uarota ma na galue o se peresitene o le Aualofa mo le tele o tausaga. Ou te lei moemiti lava o le a suia se mea.
Pe a ma le 12 o [ou tausaga] a o ma nonofo ai na o i maua, na ia aluese ai mai le Ekalesia mo mafuaaga ou te lei malamalama ai. E ui na filifili lou tina—o le na avea ma ou faataitaiga—e suia se isi ona ala, ae na ou iloa e moni le talalelei, ma na faaauau ai pea ona ou auai i le lotu. E ui lava e le o ia malie i lau filifiliga, ae momoli lava au e Tina i le lotu ma toe aumai mai i vaiaso uma.
Sa tele lava ina faigata faalelagona le auai atu i le lotu, aemaise lava i le taimi o le lotu faamanatuga lea, ou te maua ai i lou nofo i tua, se vaaiga manino i tina uma ma tama, ma a latou fanau o loo nonofo faatasi. O le tele lava o taimi ou te nofo faatasi ai ma le aiga o sau uo. O le a ou faafetai ai lava e le aunoa mo ou “Aiga Mamona” ma isi i lau uarota o e na vaaia lelei au ina ia faaaofia au i lenei taimi faigata.
Sa faamaoni ou faiaoga o aiga, mo se faataitaiga, e ui lava e na o au lea na la o mai e aoao ma na sili atu le mamao o le mea ou te nofo ai nai lo le toatele o tagata o le uarota. Na ou taulai atu i le avanoa e talanoaina ai le talalelei ma lagona le malosi o le perisitua ma le Agaga i lou aiga.
O le toatele o tagata o le uarota o tagata na ou iloa i lou olaga atoa. Faatasi ai ma o latou foliga masani, ataata faafeiloai, ma talanoaga faaleuo, na avea i latou ma ou tina, tama, tuagane, ma uso faaleuarota. O le lagonaina o le faalogoga o le faaauai ma le alofa na tuuitiitia ai le loto tiga o le auai i le lotu e aunoa ma lou aiga.
Ou te iloa e le o tuua na o au i le aafia ai i lenei tulaga. E toatele le au talavou e auai i le ekalesia e aunoa ma se tasi po o matua uma. Ae e ala i faataitaiga, faauoga, ma valaauga, e mafai ona tatou aapa uma atu i nei atalii ma afafine o le Tama Faalelagi ma fesoasoani ia latou lagona le faaaofia, aoao i latou i mataupu faavae o le talalelei, ma faamalosiau ia i latou ia avea o se vaega malolosi o sauniga ma gaoioiga.
“Na fuafuaina e le Tama Faalelagi ia tatou fananau mai i se aiga—e pito sili ona taua, sili ona paia, ma se vaega sili ona mamana i le lalolagi,” o le tala lea a Virginia H. Pearce, o le fesoasoani a le au peresitene aoao a Tamaitai Talavou na i ai muamua. “Ma o totonu o le aiga o le a faatino ai nisi o aoaoga sili ona taua. Faaopoopo i lena vaega o le aiga, ua tuuina mai foi e le Alii aiga i le uarota ma paranesi. … E le o mamanuina uarota ia suitulaga i iunite o le aiga, ae ia lagolagosua i le aiga ma ona aoaoga amiotonu. O le uarota o se isi lea o nofoaga o loo lava ai le tautinoga ma le malosiaga e fausia ai se ituaiga o ‘sulufaga o le saogalemu’ faaleaiga mo i tatou taitasi pe afai e le o mafai pe e le o tuuina mai e o tatou aiga ia aoaoga uma ma aafiaga tuputupu ae tatou te manaomia e toe foi atu ai i le Tama Faalelagi. E manaomia lo tatou faalauteleina o lo tatou agaga faafetai i le mana o le aiga faaleuarota ma toe faafou a tatou tautinoga ina ia auai ai ma le lelei i lena nuu o le Au Paia.”1
Ou te matua faafetai mo i latou na avea ma ou sulufaiga o le saogalemu, ua faatuina ai i totonu ia te au se manao ina ia faia lea lava mea e tasi mo isi.
Ata na saunia e Robert Casey