O Tatou Aiga, O Tatou Auaiga
Aoaoina atu le Mataupu Faavae o le Aiga
Mai se faasalalauga na tuuina atu i faiaoga faalelotu o seminare ma inisitituti i le aso 4 Aukuso, 2009.
O le a valaauina lenei augatupulaga e puipui ia sili nai lo se isi taimi muamua le mataupu faavae o le aiga. Afai latou te le iloa le mataupu faavae, e le mafai ona latou puipuia.
A o ou feiloai atu i le autalavou matutua nofo fua i le salafa o le lalolagi, ou te fesiligia i latou, “Aisea e popole tele ai le Au Peresitene Sili mo outou ma saunia le anoanoai o punaoa mo outou?” O nisi nei o tali ou te maua: “O matou o taitai o le Ekalesia i le lumanai.” “Matou te moomia ni aoaoga faamasani ia tumau ai lo matou malolosi.” “Ua faamalosia a matou molimau ia matou vasega o seminare ma inisitituti.” “E tatau ona matou feiloai i isi talavou maoae o le Au Paia o Aso e Gata Ai.” “O matou o le faamoemoe o le lumanai.” E seasea ou faalogo o faapea, “Ina ia avea au ma se tama sili po o se tina sili i se aso.” O a latou tali e matele lava i le tagata ia aua o le taimi lenei o le olaga o loo latou i ai.
E ui lava i lea, e manaomia matua, faiaoga, ma taitai o autalavou i le aoaoina o tupulaga faiae i le mataupu faavae o le aiga. E taua le fesoasoani ia i latou ia ausia le ola e faavavau (tagai i le Mose 1:39). E tatau ona latou iloa o le talitonuga i le aiga e faavae lea i le Foafoaga, le Pau, ma le Togiola. E moomia ia latou malamalama i tau faamatau i le aiga ina ia latou iloa mea o loo faafetaiaia i latou ma mafai ona saunia. E manaomia ia manino lo latou malamalama o le atoaga o le talalelei o loo iloatino i sauniga ma feagaiga o le malumalu.
O Le Talitonuga i le Aiga
I totonu o Le Ekalesia a Iesu Keriso o le Au Paia o Aso e Gata Ai, e i ai so tatou talitonuga i le aiga, lea e faavae i le Foafoaga, le Pau, ma le Togiola. Ua saunia e le Foafoaga o le lalolagi se nofoaga e nonofo ai le aiga. Na foafoaina e le Atua se tane ma se fafine o ni afa tutusa taua se lua o se aiga. O se vaega o le fuafuaga a le Tama Faalelagi ina ia faamauina Atamu ma Eva, ma gaosia se aiga faavavau.
O le Pau na saunia ai se ala mo le tuputupu ae o le aiga. Na avea Atamu ma Eva o ni taitai faaleaiga o e na filifili ina ia maua se aafiaga faaletino. Ona o le Pau ua mafai ai e i laua ona maua atalii ma afafine.
O le Togiola e mafai ai e le aiga ona faamau faatasi e faavavau. Ua mafai ai ona tuputupu ma atoatoa le aiga e faavavau. O le fuafuaga mo le fiafia, ua taua foi o le ata o le faaolataga, o se fuafuaga na foafoaina mo aiga. E moomia ona malamalama le augatupulaga faiae e faapea o poutu autu o lo tatou talitonuga e totonugalemu i le aiga.
A tatou talanoa e uiga i le agavaa mo faamanuiaga o le ola e faavavau, o lona uiga o le agavaa mo faamanuiaga o aiga e faavavau. O le mataupu faavae lenei a Keriso, ma na toefuatai e ala mai le Perofeta o Iosefa Samita. O loo tusia i le Mataupu Faavae ma Feagaiga 2:1–3:
“Faauta, ou te faaali atu ia te outou le Perisitua, e Elia le perofeta, a o lei oo mai le aso tele ma le matautia o le Alii.
“Ma o le a totoina e ia i loto o fanau o folafolaga na faia i tama, ma o loto foi o fanau o le a liliu i o latou tama.
“Ana le faapea, e matua faatafunaina lava le lalolagi atoa i lona afio mai.”
O lenei mau e faatatau i faamanuiaga o le malumalu—sauniga ma feagaiga a na le faapea “e matua faatafunaina lava le lalolagi atoa.”
“O le Aiga: O Se Folafolaga i le Lalolagi” na tusia ina ia toe faamalosia o le aiga o le totonugalemu lea o le fuafuaga a Le Foafoa.1 A leai le aiga, e leai se fuafuaga; e leai se mafuaaga o le olaga faaletino.
Tulaga Taufaamatau i le Aiga
I le faaopoopoga i le malamalamaaga o le talitonuga i le aiga, e manaomia e i tatou uma ona malamalama i tulaga taufaamatau i le aiga. Afai e leai, e le mafai ona tatou saunia i le taua. Ua siomia tatou i faamaoniga o le faaitiitia o le taua o le aiga. Ua faiifo le numera o faaipoipoga, ae ua siitia le fuainumera o faaipoipoga tatala. Ua faatupulaia le faananau ae lei faaipoipo. Ua maualuga le faapauu o pepe ma ua agai ina faateleina le talia faaletulafono. Ua maualalo le fananau mai. Ua tatou vaai i mafutaga le tutusa i le va o tane ma fafine, ma o loo tatou vaaia tu ma aga o loo faatinoina pea le sauaga i totonu o fegalegaleaiga faaleaiga. Ua matele ina sili atu le faatauaina o se galuega i lo le aiga.
O le toatele o a tatou talavou ua leai se talitonuga i le faavae o aiga. Ua latou faaopoopoina atu atili le faataua i aoaoga ma toesea pea lava pea le taua o le fausiaina o se aiga faavavau. O le toatele latou te le tilotilo i le fausiaina o aiga o se galuega e faavae i le faatuatua. Mo i latou, o se faiga fiilifiliga e pei o le faiga o faatauga. Ua toatele foi latou ua le toe talitonuina lo latou malosiaga i amioga lelei faapea ma o a latou lava tupulaga. Ona o le aasa o le saua o faaosoosoga, ua le mautonu ai le toatele pe mafai ona latou manuia i le tausia o feagaiga.
E toatele foi talavou e le lava ma maualalo le aoaoina o tomai lautele ua avea ma pa e faavaatuia ai le fausia o ni aiga faavavau. Ua latou matele ina talanoa lelei i se tasi e 50 maila (80km) le mamao, ae itiiti le mafai ona faaloaloa se talanoaga ma tagata o loo latou faatasi. E avea ai o se mea faigata mo i latou e fesootai ai ma isi.
Ua tatou feagai foi ma le faafitauli lea tatou te faitau i ai i le Efeso 6:12: “Aua tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” Ua fai i aso uma tulafono lautele e tetee ai i aiga, ma ua suia faaletulafono le uiga o le aiga i le lalolagi atoa. Ua tupu faamauga ata mataga tau feusuaiga. Ua avea tamaitai talavou ma taulaiga tulimataia e latou o loo faia nei ata mataga. O matua ua pei o e e suitulaga ma ua le toe amanaia. Ua i soo se mea faasalalauga faalauaitele o le tetee i le aiga. Ua faatauasoina tupulaga talavou e uiga i le tatau ona fausiaina o ni aiga faavavau.
Tatou te iloa le mafuaaga ua tupu ai lenei mea pe a tatou faitau i upu a Korioa, o se aneti-Keriso: “Sa faapea ona talai atu o ia ia te i latou, ua taitaieseina ai loto o nisi e toatele; ua faamaualuga i latou i la latou amioleaga; ioe, sa taitaieseina fafine e toatele, atoa ma tane, ia faitaaga ai,” (Alema 30:18). Ua iloa lelei e Satani e le mafai lava ona ia maua sona tino; e le mafai lava ona fai sona aiga. O le mea lea ua avea ai tamaitai talavou, o e o le a foafoaina tino mo augatupulaga o le lumanai ma ana manulauti.
O Korioa o se tagata sa le talitonu ia Keriso. O se tagata e le talitonu ia Keriso e le talitonu foi i aiga. Soo se aoaoga po o mataupu faavae e faalogo i ai a tatou talavou mai le lalolagi e le talitonu i le aiga, e le talitonu foi i le Atua. O loo manino lava. A le toe talitonu o tatou talavou i tu ma aga amiotonu a o latou tama pei o tagata o loo faamatalaina i le Mosaea 26, a le malamalama o tatou talavou i la latou sao i le fuafuaga, e mafai ona taitaieseina latou.
Aoaoina o le Tupulaga Faia’e
O le a se mea o tatou faamoemoe ia malamalama ma faia e nei tupulaga faiae ona o mea ua tatou aoao ai i latou? O loo maua tali o lena fesili faatasi ma vaega autu o le aoaoga faavae o le aiga i le folafolaga o le aiga. Sa saunoa faapea Peresitene Gordon B. Hinckley (1910–2008) o le folafolaga o se “faalauiloaga ma le toe faamautuina o tulaga faatonuina, aoaoga faavae, ma faatinoga” o loo i ai pea lava i lenei Ekalesia.”2
Na saunoa Peresitene Ezra Taft Benson (1899–1994), “O lenei faatulagaga… o le puleaga faaleaiga, lea e ulu atu ai se alii ma se tamaitai i osiga feagaiga ma le Atua—e pei foi o Atamu ma Eva—ina ia faamauina mo le faavavau, ma ia faauluolaina … ona pau lea o le ala e mafai ai i se aso ona tatou vaai i fofoga o le Atua ma ola ai.”3
E tatau foi ona malamalama le tupulaga faiae o le poloaiga ia “fanafanau ma uluola ia tumu ai le lalolagi” (Kenese 1:28; Mose 2:28) o loo tumau pea ona faamamafaina. O le fanauina o fanau o se galuega o le faatuatua. Sa saunoa Peresitene Spencer W. Kimball (1895–1985) “O se gaoioiga o le matua manatu faapito mo se ulugalii le mumusu e faia se fanau a o loo mafai ona la maua le avanoa.”4 O le tulaga faaletina ma le faaletama o ni matafaioi faavavau. E tauave e i laua uma le tiute a le o le tane po o le fafine i le fuafuaga. O le taimi o le talavou e sauniuni ai mo ia matafaioi ma tiute faavavau.
E mafai e matua, faiaoga ma taitai ona fesoasoani ia sauniuni le tupulaga talavou mo faamanuiaga o Aperaamo. O a ia faamanuiaga? Ua tau mai ia i tatou e Aperaamo i le Aperaamo 1:2. Faapea sa ia manao i “aia tatau e ao ina faauuina ai au ina ia ou galue i lea lava aia tatau; … ma fia maua le poto maoae silisili, … ma avea ma tama o atunuu e tele, ma alii o le filemu, ma naunau i faatonuga, ma tausi i poloaiga a le Atua; o lea na avea ai au ma suli moni, o se Faitaulaga Sili, o loo i ai le aia tatau lea sa i ai i augatama.”
O fea o loo i ai faamanuiaga ia na maua e Aperaamo? E na o latou ua faaipoipo ma faamauina i le malumalu latou te mauaina. E le mafai e se tane ona avea ma se “tama o nuu e tele” e aunoa ma le faamauina i lana ava. E faapea lava, e le mafai ona umia e Aperaamo aia tatau a tama e aunoa ma se ava lea sa i ai le aia tatau a tina.
O tala ia Aperaamo ma Sara ma Isaako ma Repeka o loo maua i le Kenese. E na o le toatasi le atalii o Aperaamo ma Sara, o Isaako. Afai sa fai Aperaamo ma tama o atunuu e tele, o le a le taua o Repeka, le ava a Isaako? Ona o lona taua, sa na ia auina atu ai lana auauna i le fia selau o maila e sailia se tamaitai talavou talafeagai—o se tasi o le a tausia ana feagaiga, o se tasi e malamalama i le uiga o le fausia o se aiga faavavau.
I leKenese 24:60, ua faamanuiaina Repeka e fai “ma tina o afe o mano.” O fea tatou te maua ai na ituaiga o faamanuiaga? O loo mauaina i totonu o le malumalu?
O le tala ia Isaako ma Repeka o se faataitaiga o le alii o loo i ai ki, ma le tamaitai o loo i ai faatosinaga, e galulue faatasi ia mautinoa le faataunuuina o o la faamanuiaga. E taua tele lo la tala. Sa faalagolago faamanuiaga o le aiga o Isaraelu i se alii ma se tamaitai na malamalama i o la tulaga i le fuafuaga, ma o la tiutetauave e fausia se aiga faavavau, ia maua ma aoao ia fanau.
I o tatou aso ua i ai lo tatou tiute o le auina atu lea o “Isaako” ma “Repeka” mai i o tatou aiga ma potu aoga. E tatau ona malamalama alii ma tamaitai talavou uma i lana matafaioi i lenei faipaaga maoae—o i latou taitoatasi o se “Isaako” po o se “Repeka.” Ona latou iloa lelei ai lea o le mea e tatau ona latou faia.
Ola i le Faamoemoe mo le Ola e Faavavau
Matua, faiaoga, ma taitai: ia ola ai i o outou aiga, i o outou auaiga, i o outou faaipoipoga ina ia atiina ae ai e le autalavou le faamoemoe mo le ola faavavau i le mataituina o outou. Ola ma aoao atu ma le matua manino ina ia atia mea o loo e aoao atu e ui i le malomaloa o loo faalogoina e talavou ma ia tuia ai o latou loto ma pai atu ia i latou.
Nofo i le fale ina ia e lelei i le ola i mataupu faavae, ina ia e maelega i le faiga o ou tiute ma matafaioi i le aiga. E te mafaufau ia e maelega ae le o le atoatoa. Afai e i ai au sini ma e te faaeteete i le faiga i totonu o lou aiga, e aoao mai ai le autalavou ia te oe. O le a latou aoaoina o loo e tatalo, suesue faatasi tusitusiga paia, fai afiafi faaleaiga, faamuamua taimi o taumafataga, ma talatalanoa ma le faaaloalo i lau paaga faaipoipo. Ona aoaoina mai lea e tupulaga faiae le faamoemoega maoae mai au faataitaiga.
Ua Ou Iloa Lea
O loo tatou tapenaina a tatou talavou mo le malumalu ma mo aiga faavavau. E tele taufaamatau ua oo ia i latou e mafai ona faavaivaia latou mai le fausiaina o se aiga faavavau. O la tatou matafaioi o le aoaoina lea o i latou ina ia le faaseseina i latou. E tatau ona tatou matua manino i manatu autu o aoaoga faavae, lea tatou te maua i le “O le Aiga: O Se Folafolaga i le Lalolagi.”
O le a valaauina lenei augatupulaga ia puipuia le mataupu faavae nai lo se isi taimi muamua. Afai latou te le iloa, e le mafai ona latou puipuia. E manaomia lo latou malamalama i malumalu ma le perisitua.
Sa saunoa Peresitene Kimball:
“O le tele o faigata masani na fesoasoani i aso ua mavae e faamalosia ma lagolago ai le aiga ua mou atu ma ua leai. E i ai le taimi e na o i latou lava e talitonu aiai i le aiga o le a faasaoina o latou aiga i le lotolotoi o le amioleaga ua lofia ai tatou. …
“… E i ai i latou e faauigaina le aiga i se auala e le masani ai o le a pei ai e le o i ai ni aiga… …
“O i tatou, uso e ma tuagane e le tatau ona tatou toilalo i finauga pepelo e faapea o le aiga e tau atu i se vaega faapitoa o le atiina ae o loo aafia ai sosaiete lelei. Tatou te saoloto e tetee atu i na aga e le faatauaina ai le taua o le aiga ae faataua ai tagata manatu faapito. Ua tatou iloa o le a faavavau le aiga.5
E moni le talalelei a Iesu Keriso. Na toefuataiina e ala mai i le Perofeta o Iosefa Samita. Ua ia i tatou le atoaga o le talalelei i le taimi nei. O i tatou o atalii ma afafine o ni matua faalelagi, na auina mai i tatou ia maua lenei aafiaga faalelalolagi tatou te saunia ai mo le faamanuiaga o ni aiga faavavau. E tuuina atu lau molimau i lo tatou Faaola o, Iesu Keriso, o Lana Togiola e mafai ai ona tatou atoatoa ma tutusa o tatou tiute i o tatou aiga faalelalolagi, ma o Lana Togiola ua tatou maua ai le folafolaga o le ola faavavau o ni aiga.
Ata na tusia e Steve Bunderson; ata o Sister Beck na pueina e le © Busath Photography
Agavale: faamatalaga auiliili mai leUniverse, saunia e Sidney King; faamatalaga auiliili mai le Tuua o le Faatoaga o Etena, saunia e Joseph Brickey; faamatalaga auiliili mai leAua Le Faia Lou Loto Ae O Lou Finagalo, saunia e Harry Anderson, faaaloaloga a le Pacific Press Publishing Association, Inc.; ata na tusia e Weston C. Colton ma Craig Dimond
Agavale: ata na tusia e Christina Smith; Taumatau: ata pue o le Malumalu o Navu Ilinoi ma ata na tusia e John Luke © IRI; ata o vae © Getty Images