Na saunoa Peresitene Monson o le auauna atu faamisiona o se tiutetauave faaleperisitua. O le a le uiga o lena mea?
I le konafesi aoao na maea nei na saunoa mai Peresitene Thomas S. Monson e faapea: “I alii talavou o le Perisitua Arona ma outou na alii talavou o le a avea ma toeaina: ou te toe fai atu i mea ua loa ona aoao mai e perofeta—o alii talavou agavaa uma lava, malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoe mai le Alii ia i tatou ua tele naua mea ua tuuina mai i ai.”1
O se vaega o le mauaina o le perisitua o le ioeina lea e tauave i ou lava luga le tiutetauave ma tiute lea e o mai faatasi ai. E pei o soo se meaalofa e tuuina mai e le Tama Faalelagi, e Na te faamoemoe o le a e faaaogaina le perisitua e faamanuia ai isi. “Aua o le ua foa’iina atu i ai mea e tele e su’eina mai ia te ia mea e tele” (MFF 82:3).
O e o loo umia le Perisitua Arona e tatau ona “lapatai, folafola, apoapoai, ma aoao, ma valaaulia tagata uma ia o mai ia Keriso” (MFF 20:59). E pei ona saunoa Peresitene Monson, o le auauna atu faamisiona o se tiute o ē umia le perisitua. I le misiona o le a tuuto atu lou malosi atoa, taimi, ma taulai atu i le faataunuuina o lena tiute: auauna atu, talai atu o le talalelei, ma valaaulia tagata uma e o mai ia Keriso. E moni, o le faataunuuina o lou tiute e masani lava ona o mai faatasi ma faamanuiaga. O le a avea lau misiona ma se taimi o le olioli tele ma le tuputupu ae faaleagaga.