O Le a Le Onosai?
Mai se saunoaga i le konafesi aoao ia Aperila 1994.
O le onosai o se uiga e manaomia tele i lo tatou lalolagi le mautonu. Ae e tatau ona tatou iloa e i ai le eseesega i le va o le onosai ma le faapalepale. O lou onosai faamaoni mo se tasi e le tuuina atu ai ia te ia se faatagaga e fai ai se mea sese, ma e le mafai foi e lou onosai ona faamalosi oe e tatalia ana mea sese. E manaomia tele lena eseesega ina ia malamalama ai i lenei uiga taua.
O Poloaiga Sili e Lua
O mea e sili ona ave i ai la tatou faamuamua i le olaga o le alofa lea i le Atua ma le alofa atu i o tatou tuaoi.1 Ua aofia lautele atu ai iina tuaoi i o tatou lava aiga, o tatou alalafaga, o tatou malo, ma lo tatou lalolagi. O le usiusitai i le poloaiga lona lua ua faigofie ai foi ona usiusitai i le poloaiga muamua. “Pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17).
O Le Papatisoga E Sili Atu I Talaaga
I konitineta uma ma motu i le moana, o loo ua faapotopotoina e faatuatua i totonu o Le Ekalesia a Iesu Keriso o le Au Paia o Aso e Gata Ai. O eseesega i tu ma aganuu, gagana, itupa, ma foliga ua mou ese atu le taua a o faagaloina e tagata o le ekalesia i latou lava i auaunaga a lo latou Faaola pele.
Ua na o le malamalama i le tulaga moni faaletamā o le Atua ua mafai ai ona aumaia le lagona talisapaia atoatoa o le tulaga moni o le usoga faaletagata. O lena malamalama e uunaia ai le naunau e fausia alalaupapa o le galulue faatasi nai lo le fausia o pa pupuni o le feeseeseaiga.
O le le onosai e tupu ai finauga; o le onosai e fo’ia ai finauga. O le onosai o le ki lea e tatala ai le faitotoa i le femalamalamaai ma le fealofani.
O Faigata o le le Lava o le Onosai
Ou te fia tuuina atu nei se lapataiga taua. E mafai ona oo mai se manatu sese e faapea, afai e i ai sina lelei i se mea, e tatau la ona sili atu le lelei o lona vaega tele. E le sa’o! O le soona inu o vailaau faafomai nai lo le mea ua faatonuina e mafai ona lamatia ai. O le alofa mutimutivale e le faatapulaaina e mafai ona teena ai le faamasinoga tonu. E faapea foi le onosai, a aunoa ma se tapulaa, o le a o’o atu ai i le soona tuufau.
Ua tusia e le Alii laina tuaoi e faailoa mai ai le mea e gata mai ai le onosai. E o’o mai faigata pe a le usitaia na tapulaa paia. E pei lava foi ona aoao atu e matua ia fanau iti e ‘aua le taufetuli ma taaalo i le alatele, ua aoaoina foi i tatou e le Faaola e le tatau ona tatou faatagaina le amioleaga. “Ua ulufale Iesu i le malumalu o le Atua, … ma fuli i lalo laulau o e na faatau tupe” (Mataio 21:12; tagai foi i le Mareko 11:15). E ui lava na Ia alofa i le tagata agasala, ae na fetalai mai le Alii “e le mafai ona vaai atu (o Ia) i le agasala ma faatagaina ai sina mea itiiti lava” (MFF 1:31).
O le alofa moni mo le tagata agasala atonu e mafai ona tupu ai ni finauga lototetele—ae le o se maliega! O le alofa moni e le lagolagoina se amioga e faatamaia ai e le tagata ia lava.
Onosai ma le Fefa’aaloaloai
O lo tatou faamaoni i le Faaola tatou te lafoa’i ai i le agasala, ae usitai i Lana poloaiga ina ia alolofa i o tatou tuaoi. O lo tatou nonofo faatasi i lenei lalolagi, lea e tatau ona tausia, faatoilalo, ma fetufaa’i ma le lotofaafetai.2 E mafai e i tatou taitoatasi ona fesoasoani e avea le olaga i lenei lalolagi o se aafiaga matagofie sili atu.
Na tuuina mai e le Au Peresitene Sili ma le Korama a Aposetolo e Toasefululua se faamatalaga faalauaitele lea ua ou siina mai:
“O se mea sese le talafeagai i soo se tagata po o se vaega o tagata le taofia mai i soo se tasi o lana aia tatau faaletagata lava ia e faatatau i lanu po o tu ma aganuu faamaualuluga.
“Matou te valaau atu i tagata uma i soo se nofoaga ina ia toe tuuto atu i latou lava i mataupu faavae ua masani ai o le onosai ma le fefaaaloaloai. Matou te talitonu ma le faamaoni, a tatou faaali atu sese o le tasi i le isi, ma mafaufau i ai ma le alofa, o le a tatou iloaina ai e mafai ona tatou ola faatasi ma le filemu e ui lava i o tatou eseesega loloto.”3
E mafai ona tatou tutu e tetee atu i le agasala ae ia faapalepale i tuaoi e i ai ni eseesega latou te faamamalu i ai. O o tatou uso ma tuafafine pele i le lalolagi atoa, o fanau uma a le Atua. O Ia o lo tatou Tama. O Lona Alo, o Iesu, o le Keriso. Ua toefuataiina mai Lana Ekalesia i le lalolagi i nei aso e gata ai ina ia faamanuia ai fanau uma a le Atua.
Ua aoaoina i tatou e le Faaola e le tatau ona tatou faatagaina le amioleaga. “Ua ulufale Iesu i le malumalu o le Atua, … ma fuli i lalo laulau o e na faatau tupe.”
Faamamaina e Keriso o le Malumalu, saunia e Carl Heinrich Bloch, faaaogaina i le faatagaga a le National Historic Museum i Frederiksborg i Hillerød, Tenimaka