Pagserbisyo diha sa Simbahan
“Kining Tanan Nakapanalangin Kanako”
Kon Sabado na, inyong makita si Elvira Guagliarello nagkapuliki sa pagtrabaho sa kusina sa iyang balay sa Puerto Madryn, anaa sa baybayon sa Argentina’s Nuevo Gulf sa habagatang probinsya sa Chubut.
Siya magtakos og harina ug tubig ug dayon kab-uton ang uban pang mga sagol. Siya mosulti lang og ginagmay samtang siya nagtrabaho, ang iyang mga buhat maoy mas pasultihon kaysa iyang mga pulong. Hinoon, siya anaa sa buluhaton sa Ginoo.
“Nindot ang akong gibati tungod kay ako nasayud nga ako nagbuhat og usa ka butang nga maayo,” miingon si Sister Guagliarello samtang iyang gisagol ang mga sagol. Siya naghunahuna sa Manluluwas samtang siya nagtrabaho, malipayon uban sa panghunahuna nga ang produkto sa iyang pagserbisyo makatabang sa ubang mga miyembro sa Simbahan nga makahinumdom Kaniya.
Si Sister Guagliarello, 82 anyos, nalingaw nga magserbisyo isip visiting teacher, motabang sa pagdirekta sa musika sa iyang ward, ug maghimo og tinapay nga gamiton sa ordinansa sa sakrament—usa ka calling nga iyang napalambo dul-an sa 10 ka tuig. Siya mag-andam og usa ka tibuok nga tinapay alang sa iyang kaugalingon sa sayo pa sa semana, apan matag Sabado siya mogahin og panahon sa paghimo og tinapay “nga para lang gyud sa Simbahan,” siya miingon. “Ako moingon sa akong kaugalingon, ‘Kinahanglan kong maghimo og tinapay, ug kinahanglan kong mosimba.’ Dili ko gustong mapakyas”
Itugot sa panglawas, siya motambong usab sa templo—sa usa ka tuig mobiyahe og 20 ka oras sa amihanan paingon sa Templo sa Buenos Aires Argentina.
“Si Sister Guagliarello kanunay malipay nga makaserbisyo sa tanang paagi nga iyang mahimo,” miingon ang iyang bishop, si Jesús Santos Gumiel. “Ang mga miyembro sa ward nasayud nga sila makasalig kaniya. Bisan pa sa iyang edad, siya matinud-anon sa pagpangandam og tinapay matag Sabado ug sa pagsimba matag Dominggo. Siya maayo nga ehemplo.”
Nahimamat ni Sister Guagliarello ang full-time nga mga misyonaryo niadtong 1962 sa Mar del Plata, habagatang bahin sa Buenos Aires, samtang nagtrabaho sa boarding house diin sila nagpuyo. Sa dihang siya nakaila kanila nga nanuktok sa mga pultahan 15 na ka tuig ang milabay, human nga siya mibalhin ngadto sa Puerto Madryn, siya naminaw sa mga hilisgutan, ug misugod sa iyang kinabuhi sa pagserbisyo sa Simbahan.
Karon siya nagpuyo nga siya rang usa, apan siya wala mobati nga nag-inusara. Anaa kaniya ang iyang mga kasulatan ug ang ward family, ug siya kanunay nakig-istorya uban sa iyang Langitnong Amahan pinaagi sa pag-ampo. Dugang pa, siya nagtagamtan sa pagpakig-uban sa Espiritu, nga gisaad sa Ginoo niadtong kinsa moserbisyo Kaniya pinaagi sa pagserbisyo sa uban.1
“Kining tanan nakapanalangin kanako,” miingon si Sister Guagliarello uban sa pahiyum. “Ang Simbahan mopalihok kanato, ug kana nakapalipay kanako. Kanunay nakong nakaplagan ang hingpit nga kalipay sa pagserbisyo sa atong Amahan sa Langit.”
Elvira Guagliarello
Sa ibabaw: gilitratohan ni Michael R. Morris