Ang Pagbansay sa Handbook Nagpasabut sa Buhat sa Kaluwasan

Ni Adam C. Olson

Mga Magasin sa Simbahan

Atol sa tibuok kalibutan nga miting sa pagbansay sa pagpangulo niadtong Pebrero 2011, ang mga sakop sa Unang Kapangulohan ug Korum sa Napulog Duha ka mga Apostoles mitudlo sa mga partisipante sa paggamit sa bag-ong mga handbook sa mas epektibo nga paagi. Ang miting mao ang follow-up niadtong Nobyembre 2010 nga tibuok kalibutan nga miting sa pagbansay sa pagpangulo diin ang mga handbook gipaila.

Ang mga mamumulong mipasabut kon unsaon sa paggamit sa mga handbook sa mas madasigon nga paagi, ang kaimportante sa pagsabut sa doktrinal nga pundasyon sa bag-ong mga handbook, kon unsaon sa paggamit sa mga baruganan sa pagpahaum ngadto sa mga programa sa Simbahan, sa unsang paagi nga ang mga kausaban sa mga handbook magamit sa pagpadayon sa buhat sa kaluwasan, ug ang tahas sa mga babaye diha sa mga council.

Miapil sa sibya mao sila si Presidente Henry B. Eyring, Unang Magtatambag sa Unang Kapangulohan; Elder Russell M. Nelson, Dallin H. Oaks, Richard G. Scott, Robert D. Hales, Jeffrey R. Holland, David A. Bednar, Quentin L. Cook, D. Todd Christofferson, ug Neil L. Andersen sa Korum sa Napulog Duha ka mga Apostoles; Elder Craig C. Christensen; Bruce D. Porter ug W. Craig Zwick sa Seventy; ug ang kinatibuk-ang mga presidente sa mga auxiliary.

Mas Dinasig nga Paggamit sa mga Handbook

Ginganlan ang miting og “ikaduhang kahigayunan sa pagkaplag unsaon sa paggamit sa handbook sa mas epektibong paagi,” si Presidente Eyring miawhag sa mga lider sa pagdugang sa ilang kapasidad sa pagdawat og pagpadayag.

“Pinaagi lamang sa Espiritu nga kamo masayud unsaon sa pagbuhat kon unsay inyong nabasahan diha sa handbook,” siya miingon. “… Mahimong para ninyo dili praktikal nga magdahum o gani maglaum sa pag-abut sa pagpadayag nga inyong gikinahanglan sa inyong matag adlaw nga pagserbisyo. Kini dili moabut kon walay hugot nga pagtuo ug paningkamot, apan kini posible.”

Si Presidente Eyring misaad nga samtang ang mga lider magtrabaho ug mag-ampo sa “pagsabut ug pagsunod sa mga pulong sa kinabuhi” nga gihatag ngadto kanila, ang Ginoo motabang kanila nga makaserbisyo ug mangulo lapas sa ilang kaugalingong mga gahum.

Doktrinal nga Pundasyon sa mga Handbook

“Ang handbook doktrinal,” miingon si Elder Oaks, ug “mas mubo kini kaysa unang handbook tungod kay diha sa daghang mga hilisgutan wala kini magpahayag og mga lagda o sa paghatag og mga direksyon. Hinoon, naghatag kini og mga baruganan nga mahimong gamiton sa dinasig nga mga lider … sumala sa ilang lokal nga kahimtang.”

Sila si Elder Bednar ug Elder Christofferson mipahimangno sa mga lider batok sa paglaktaw sa sinugdanan nga mga hugna sa Handbook 2 aron lang makabasa sa mga lagda sa nagsunod niana nga mga hugna. Ang mas una nga mga hugna nagpahimutang sa doktrinal nga pundasyon aron sa pagsabut ug paggamit sa mga baruganan ug mga lagda nga nagsunod.

Si Elder Bednar miingon nga aron ang mga handbook “mabase sa baruganan, nga ang pipila sa sulod niini [applications] giklaro, mas mahagiton sa espirituhanong paagi ug tukma ang gikinahanglan natong tanan.

Mga Baruganan sa Pagpahaum

“Sa mga butang kabahin sa doktrina, mga pakigsaad, ug mga lagda nga gitukod sa Unang Kapangulohan ug sa Napulog Duha, wala kami mosimang gikan sa handbook,” miingon si Elder Nelson. “Ang pagpahaum gitugot sa pipila ka laing mga kalihokan aron sa pagtubag sa lokal nga mga kahimtang.”

Sumala ni Elder Porter, ang kapitulo 17, “Pagkapareho ug Pagpahaum,” gilakip aron sa pagtabang sa lokal nga mga lider nga mosunod sa Espiritu ug modeterminar kon kanus-a kini angay nga gamiton ang piho nga mga programa. Ang kapitulo nagpasabut kon unsa ang dili mahimong usbon ug naghatag og lima ka kahimtang diin ang mga pagpahaum mahimong himoon: mga kahimtang sa pamilya, limitado nga transportasyon ug kumunikasyon, gagmayng mga korum o mga klase, dili paigong gidaghanon sa mga lider, ug kasiguroan sa mga kahimtang.

“Tukma nga mga pagpahaum dili makapaluya sa Simbahan; makapalig-on kini,” miingon si Elder Porter diha sa usa ka pakigpulong nga gibasa ni Elder W. Craig Zwick sa Seventy. Sa paghimo og dinasig nga mga pagpahaum, ang lokal nga mga lider dili gyud mobati nga sila nakig-uyon sa mas ubos kaysa modelo. “Ang matag unit sa Simbahan makagamit sa mga doktrina, mga ordinansa, gahum sa priesthood, ug mga gasa sa Espiritu nga gikinahanglan alang sa kaluwasan ug kahimayaan sa mga anak sa Dios,” misulat si Elder Porter.

Ang Buhat sa Kaluwasan

Ang mga kausaban nga gihimo sa tibuok Handbook 2 gituyo aron sa pagpalambo sa buhat sa kaluwasan. Si Presidente Eyring miingon: “Ang handbook mamahimo ninyong usa ka bahandi samtang kamo mogamit niini aron sa pagtabang ninyo nga mangulo sa uban sa pagpili sa dalan ngadto sa kinabuhing dayon. Mao kana ang katuyoan niini.”

Ang kapitulo 5 sa piho nga paagi gihugpong ubus sa ulohan “Ang Buhat sa Kaluwasan diha sa Ward ug Stake” daghang mga hilisgutan nga sa miagi gilain, lakip ang misyonaryo nga buhat sa miyembro, pagpabilin sa kinabig, pagpaaktibo, ug buhat sa templo ug family history, ug sa pagtudlo sa ebanghelyo.

“Si Pablo miingon nga karon, ang dispensasyon sa kahingpitan sa mga panahon, ang tanang butang pagahiusahon diha kang Kristo,” miingon si Elder Bednar (tan-awa sa Mga-Taga Efeso 1:10). “Adunay usa ka buhat.”

Sama pananglit, ang gikonsiderar sa pipila sa una nga managlahi nga mga misyon sa Simbahan kay “sama nga buhat sa lain-laing mga dapit,” siya miingon. Ang misyonaryo nga buhat sa pagsangyaw sa ebanghelyo ug pagdapit sa uban aron modawat sa sagrado nga mga ordinansa ug sa paghimo og mga pakigsaad. Ang paghingpit sa mga Santos—lakip na ang pagpabilin, pagpaaktibo, ug sa pagtudlo—mao ang buluhaton sa pagdapit sa katawhan sa pagtuman sa mga ordinansa ug mga pakigsaad. Ang pagtubos sa mga patay pinaagi sa buhat sa family history ug sa templo mao ang paghatag og kahigayunan nga makadawat sa mga ordinansa ug makahimo og mga pakigsaad niadtong kinsa namatay.

Si Elder Holland miingon nga sa kinatibuk-an ang mga kausaban sa handbook makapasabut nga ang mga lider sa korum ug auxiliary dili lamang maghunahuna sa ilang kaugalingong mga sakop sa korum ug auxiliary diha sa ward council, apan sila adunay responsibilidad sa espirituhanong kaayohan sa tanang mga miyembro.

Si Elder Cook mitabang sa pagpasabut kon sa unsang paagi nga ang pipila sa mga kausaban diha sa Handbook 2 nakatampo sa buhat sa kaluwasan.

Iyang gihatagan og gibug-aton ang kaimportante sa mga bishop ug mga ward council sa pagtubag sa mga panginahanglon sa welfare karon nga ang mga miting sa welfare dili na himoon. Iyang gipasabut ang dugang nga tahas sa mga lider sa Melchizedek Priesthood sa pagpakigtambag uban sa mga sakop sa korum. Gipasabut pa niya og dugang ang kausaban nga nagtugot sa mga amahan kinsa dili hingpit nga takus sa templo nga moapil sa mga ordinansa ug mga panalangin sa mga sakop sa pamilya diha sa piho nga mga kahimtang.

“Kita wala sa negosyo sa pagpalakaw og mga programa o pagdumala og usa ka organisasyon,” miingon si Elder Bednar. “Gikinahanglan kana, apan dili kana paigo. Kini mao buhat sa kaluwasan. Ug kon magsugod kita sa paghunahuna kabahin sa mga ordinansa ug mga pagkigsaad, dayon ang mga lider sa priesthood angay lang nga mangutana, unsay sunod nga ordinansa nga gikinahanglan sa kinabuhi niini nga indibidwal o niini nga pamilya, ug sa unsang mga paagi nga kita makatabang niana nga pagpangandam?”

Mga Babaye diha sa Council

Si Elder Scott mipahayag og kabalaka nga sa daghang mga dapit, ang mga lider wala mohatag og mga kahigayunan sa paglakip sa mga babaye panahon sa miting. “Kon [ang mga babaye] madasig nga moapil gyud sa mga miting sa ward council, ang ilang mga ideya kanunayng makatabang ug makadasig,” siya miingon.

Ang mga lider makaawhag sa pagpaapil pinaagi sa pagtawag sa mga sister sa ilang pangalan ug sa pagpasalamat tungod sa mga ideya ug mga sugyot nga gihatag, mipasabut si Elder Scott.

“Susama nga panalangin ang moabut sa mga panimalay sa mga lider sa priesthood” kinsa nagsunod niini nga mga sumbanan tungod kay “kini nga mga lalaki mahimong mas makadayeg sa sagrado nga tahas sa ilang mga asawa diha sa ilang kaugalingong panimalay,” siya midugang.

Siya mitudlo sa kaimportante sa pagtinguha og panaghiusa tali sa mga sakop sa council. Kon kana mabati, ang usa ka lider makaila niini ug motawag alang sa pagboto. Sa mga higayon nga ang mga sakop wala magkahiusa, ang mga lider kinahanglan nga mangayo og tambag gikan sa matag sakop sa ward council, mohatag og pasalamat alang sa mga ideya nga gipakigbahin mohimo og desisyon, ug mohangyo sa mga sakop sa council alang sa hiniusa nga suporta niana nga desisyon. Si Elder Scott mipasabut og maayo sa kaimportante sa pagkakompidensyal sa mga hilisgutan sa ward council.

Gipaabut nga mga Resulta

Si Elder Nelson mitapos sa pagbansay pinaagi sa pagpahayag og tulo ka mga paglaum: nga ang pagpayano makahatag og mas epektibong magamit ang panahon ug mga kapanguhaan sa mga sakop, nga ang gahum sa priesthood molambo sa matag tighupot sa priesthood aron sa pagpanalangin sa matag indibidwal ug sa matag pamilya diha sa Simbahan, ug nga ang matag sakop mas mobati og debosyon ug pagkatinun-an.

Ang mga Panel sa Auxiliary Migamit sa Bag-ong Training Library

Atol sa Pebrero 2011 nga tibuok kalibutan nga pagbansay sa pagpangulo, ang kinatibuk-ang mga presidente sa mga auxiliary sa Simbahan miapil sa sunod-sunod nga mga panel discussion nga naggamit og mga ehemplo nga gikuha gikan sa bag-ong online nga kapanguhaan sa pagbansay.

Ang Leadership Training Library mao ang koleksyon sa mga ehemplo nga tinuod nga nahitabo sa kinabuhi sa mga lider nga nagserbisyo sa tibuok kalibutan nga nagmodelo sa mga baruganan nga makita diha sa Handbook 2. Gikuha [shot] didto sa Brazil, England, Guatemala, ug Korea, ang mga video sa pagkakaron anaa sa paghubad ug maanaa sa internet aron magamit unya sa 2011.

Naggamit niini nga mga video, ang mga kinatibuk-ang mga presidente sa auxiliary, ubos sa direksyon nila ni Elder Robert D. Hales ug Neil L. Andersen sa Korum sa Napulog Duha ka mga Apostoles ug ni Elder Craig C. Christensen sa Seventy, mihisgot og tulo ka importante nga mga baruganan nga makita sa Handbook 2.

1. Pagpangandam sa Espirituhanon nga Paagi

“Kahibulongan gayud kon giunsa sa Ginoo sa paglantaw ug pag-andam og mga paagi sa pagpanalangin kanato,” mipasabut si Rosemary Wixom, kinatibuk-ang presidente sa Primary, human makita ang ehemplo kon giunsa sa usa ka lider sa Relief Society sa South Korea nga matinguhaong nangayo ug nakadawat og inspirasyon samtang siya nagplano og miting.

Si Elder Andersen, nakighisgot uban ni Julie B. Beck, kinatibuk-ang presidente sa Relief Society, ug ni Sister Wixom, miingon, “Kini espirituhanon nga buhat, nga dili nato mahimo kon wala ang panabang sa Ginoo.” Ang mga sakop sa panel mihisgot kon sa unsang paagi nga ang pagpangandam sa espirituhanon nga paagi makahimo sa mga lider sa pag-focus sa mga indibidwal, mopahiangay sa mga kalihokan, mga leksyon, ug mga buluhaton aron matubag sa ilang mga panginahanglan. “Ang pagpadayag gisabwag tali kanato,” mipamatuod si Elder Andersen.

2. Pag-apil sa mga Council

Usa ka tinuod nga istorya sa mga sakop sa ward council didto sa Guatemala nga nagtinabangay aron malampusong madapit ang usa ka pamilya sa pagbalik sa hingpit nga pagkaaktibo diha sa Simbahan nakahatag og kahigayunan ni Elder Christensen sa pagdumala og usa ka diskusyon nga magtinabangay ang mga council uban sa tanang lima ka mga presidente sa auxiliary: Sila si Sister Beck; Sister Wixom; Russell T. Osguthorpe, kinatibuk-ang presidente sa Sunday School; Elaine S. Dalton, kinatibuk-ang presidente sa Young Women; ug si David L. Beck, kinatibuk-ang presidente sa Young Men.

Ang panel mihisgot kon giunsa sa hiniusa nga mga paningkamot sa mga sakop sa council makatabang nga molambo ang mga miyembro sa ward, kon sa unsang paagi nga ang aktibo nga mga sakop sa council mopagaan sa buluhaton sa bisop, ug sa unsa nga paagi ang mga lider ug mga miyembro kinahanglan nga maminaw, mopakigbahin, ug magtinguha sa kabubut-on sa Ginoo kalabut sa mga miyembro sa ward.

3. Pag-alagad ngadto sa Uban

Ang focus sa ikatulo nga video mao ang usa ka batan-ong lalaki sa England nga naningkamot nga magpabiling hingpit nga aktibo diha sa Simbahan. Ang panel, nga gidumala ni Elder Hales ug lakip ni Brother Osguthorpe, Brother Beck, ug Sister Dalton, miila sa kaimportante sa mga lider nga makigtambayayong uban sa mga ginikanan, sa council sa Simbahan, ug uban sa mga batan-on.

“Kon tukma lang ninyong buhaton ang inyong nakita karon,” si Elder Hales mitapus, “istoryahi kini [mga ehemplo diha sa video] ug hisguti kini, ipangutana kini sa Ginoo … pagagiyahan ug pagatudloan kamo kon unsaon ninyo sa pagtabang ug paglig-on ug pagtuman sa gikinahanglan ninyo nga buhaton sa mga calling nga gihatag kaninyo.

Sa buhat sa kaluwasan, ang mga lider sa priesthood kinahanglan nga mokonsiderar sa sunod nga mga ordinansa sa mga panginahanglan sa usa ka indibidwal ug unsaon sa pagtabang niana nga pagpangandam.

Ang mga lider sa Simbahan miingon nga ang mga lalaki ug mga babaye kinahanglan nga tugotan aron makasarang ug gawasnon nga makapahayag sa ilang mga ideya diha sa mga miting sa pagpangulo.

GILITRATOHAN NI CRAIG DIMOND