“Ngano man ang akong pamilya adunay mga problema bisan kon kami mosimba, adunay family home evening ug naningkamot sa pagsunod sa ebanghelyo? Unsa pay among buhaton?”

Ang pagsunod sa ebanghelyo makadala og mga panalangin apan kana wala nagpasabut nga dili na ka moatubang og mga hagit. Ang mga pagsulay makalig-on sa imong pagtuo pinaagi sa pagdasig kanimo sa pagtinguha og tabang sa Langitnong Amahan. Ang pagsulbad og mga problema uban sa Iyang tabang nagtudlo kanimo unsaon sa paghimo og sakto nga mga desisyon.

Imo bang nahisgutan kining sitwasyon isip usa ka pamilya? Pinaagi sa pagtinambagay sa usag usa, makakita ka og makatabang nga mga ideya. Ikaw ba nagpuasa ug nag-ampo para sa mga solusyon isip usa ka pamilya? Ikaw ba nakasiksik sa mga kasulatan ug mga pakigpulong sa kinatibuk-ang komperensya? Tingali ang imong pamilya nagkinahanglan og pipila ka mga kausaban aron mapalambo ang sitwasyon, o tingali nagkinahanglan lang ka nga magmanunuton, mapailubong magpaabut ug magsalig nga ang Ginoo molig-on kaninyo atol niining pagsulay (tan-awa sa Mosiah 24:15).

Kon ang uban nakapasakit sa imong pamilya, sulayi ang pagpasaylo kanila ug dili mobasol kanila. Samtang ang pagpasaylo dili diha-diha dayon makasulbad sa problema, kini makahatag og kalinaw sa imong kasingkasing ug mas makapasayon sa pagdala sa problema.

Ang kaaway nag-atake sa mga pamilya tungod kay ang ilang kalig-on importante kaayo sa Simbahan ug sa komunidad. Busa padayon sa paglahutay. Padayon sa pagsimba, paghimo og family home evening, ug pagsunod sa ebanghelyo. Ang pagkamasulundon makapabati kanimo sa Espiritu Santo, ug ang Iyang paggiya importante kaayo sa pagpangita og mga tubag nga inyong gitinguha. Ang pagpuyo sa usa ka lig-on nga pamilya, bisan kana nagkinahanglan sa pagbuntog og mga problema, mao ang usa sa labing importante nga tumong nga inyong mabatonan.

Gamita ang mga Giya nga Gihatag Kanato

Tingali ang usa ka pamilya dili mapalig-on hangtud nga kini masulayan. Dayag lang, dili kinahanglan nga atong atubangon ang atong mga problema nga mag-inusara; ang Langitnong Amahan gusto nga kita molampus isip mga indibidwal ug mga pamilya. Aron sa pagtabang kanato, Siya naghatag og importante nga mga giya, sama sa mga kasulatan, buhi nga propeta, ubang mga lider sa Simbahan, ug ang Espiritu Santo. Sila makatabang kanato nga makasabut ug magamit ang mga baruganan sa ebanghelyo nga makahatag og hingpit nga kalipay ngari kanato ug sa atong mga pamilya. Dugang niini, ayaw kalimot sa pagsulti sa imong ginikanan nga nakadayeg ug nahigugma ka kanila. Nasayud ko nga ang Ginoo mohatag og paagi alang sa imong pamilya nga magkahiusa, malig-on, ug mabayaw. Nasayud ko nga ang pamilya gi-orden sa Dios.

Jared L., 18 anyos, Mindanao, Philippines

Pagkat-on gikan sa Imong mga Hagit

Bisan unsaon nimo sa pagpaningkamot, kanunay anaa gyuy mga hagit. Kini nga mga pagsulay makatabang aron kita molambo. Kini nagdepende lang kon unsaon nimo sa pag-atubang niadtong mga hagit. Ang yawe mao ang pagkat-on gikan niini. Pamalandungi ug tan-awa unsa gyud ang nanghitabo sa palibut nimo. Pag-ampo sa mga pagsulay nga imong gisagubang ug pagbaton og hugot nga pagtuo nga ang Ginoo motabang kanimo sa pagsulbad niini. Kini mahimong makalig-on kanimo, ug hinoon ikaw pa ang mahimong makalig-on sa uban.

Makenzie C., 18 anyos, Chihuahua, Mexico

Basaha ang Pamahayag sa Pamilya

Ang mga problema moabut bisan kon kita mag-ampo o dili. Kini dili sa pagsilot kanato apan sa paglig-on kanato. Ang mga proble-ma ang atong nasinati sa kinabuhi naghatag og oportunidad alang sa pamilya nga magkahiusa. Samtang ang akong pamilya nagsagubang sa stress, mga problema sa kwarta, ug sa pagpaningkamot sa paggahin og panahaon nga magkauban, kami nahimong mas suod sa usag usa ug sa atong Langitnong Amahan. Usa ka butang nga among buhaton kon ang panahon lisud mao ang pagbasa sa “Ang Pamilya: Usa ka Pamahayag ngadto sa Kalibutan.” Kini nakapahinumdom kanamo sa among balaang kasabutan ug unsa ka importante ang paghupot sa atong mga pakigsaad.

Anna G., 15 anyos, Georgia, USA

Dawata ang Kabubut-on sa Langitnong Amahan

Sa akong hunahuna usa sa paagi nga ang Langitnong Amahan mosulay kanato mao ang pinaagi sa mga problema. Ang dili nato angay nga kalimtan mao nga Siya ang atong Amahan ug sa ingon Siya nahigugma kanato pag-ayo ug gusto kon unsa ang labing ikaayo kanato. Nasayud ko nga ang bugtong paagi nga mabuntog ang mga problema mao ang pinaagi sa pagkamanunuton ug sa pagdawat sa kabubut-on sa Amahan.

José C., 18 anyos, Ancash, Peru

Pagbaton og Hugot nga Pagtuo sa Ginoo

Ang nakatabang nako kon ako magpangutana nganong ang akong pamilya adunay mga problema, bisan kon kami nagbuhat na kutob sa among mahimo, mao ang istorya ni Job ug unsa ka grabe ang iyang nasinati. Mabasa sa Job 19:25–26: “Alang kanako nasayud ako nga ang akong Manluluwas buhi man, ug sa kaulahian nga adlaw siya motindog sa ibabaw sa yuta:ug sa tapus ang akong panit kining lawas ko gayud malaglag, unya sa wala ang akong unod makita ko ang Dios.” Si Job miatubang og pipila sa labing lisud nga mga hagit, apan siya nasayud gihapon nga ang iyang Manluluwas buhi! Kon kita makahunahuna ug mopuyo sama ni Job, nasayud ko nga kita makakita sa nangagi natong mga problema ug makakita nga kita adunay Manunubos, kinsa nagbayaw kanato niining mga pagsulay.

Megan B., 17 anyos, Utah, USA

Atubanga ang mga Problema uban sa Paglaum

Ang mga problema makapalig-on kon sakto nga giatubang. Ang kinahanglan lang nimong buhaton mao ang pag-atubang sa mga problema uban sa paglaum ug kaisug. Tingali imong gibuhat ang imong labing maayo pinaagi sa pagtambong sa simbahan ug sa pagpaningkamot sa pagsunod sa ebanghelyo, busa kinahanglan ninyong ilhon ang tinuod nga ang mga problema anaa aron sa paghashas kaninyo ug paghimo kaninyo nga mas maayo sa katapusan. Sulayi usab ang pag-ila og usa ka butang nga wala nimo buhata sa sakto ug paghimo og paningkamot sa pagkorihir niini. Paningkamuti kanunay ang pagtabang sa uban, ug samtang inyong buhaton ang mao, ang inyong mga problema maingon og mas magaan. Labaw sa tanan, pakigtambag uban sa Ginoo kanunay. Pag-ampo mahitungod sa inyong mga problema ug hangyoa ang Langitnong Amahan sa paggiya kaninyo.

Raymond A., 18 anyos, Accra, Ghana

Paglahutay ngadto sa Katapusan

Ang pamilya sentro sa plano sa Tiglalang, busa dayag nga ang kaaway mobuhat sa tanan nga iyang mahimo sa pagpugong kanato sa pag-uban og puyo isip usa ka malipayon, nag-focus sa ebanghelyo nga pamilya. Nasayud kita nga kita dili magdahum nga ang kinabuhi sayon o nga kon kita mosimba na ug maghimo og family home evening, ang kinabuhi wala nay mga pagtintal. Kon ang mga panghitabo mahimong malisud, pagbasa sa imong mga kasulatan, pag-ampo, ug pag-istorya lamang isip usa ka pamilya.

Elder Dudley, 21 anyos, Indonesia Jakarta Mission