Semana sa Pasko sa Pagkabanhaw [Easter]

Makaandam kamo sa Pasko sa Pagkabanhaw pinaagi sa pagkat-on kon unsa ang nahitabo atol sa usa ka semana sa wala pa ang Paglansang ug Pagkabanhaw ni Jesukristo. Sugod sa walo ka adlaw sa wala pa ang Pasko sa Pagkabanhaw, basaha ang mga panghitabo ug mga bersikulo sa kasulatan nga gilista matag adlaw.

Sabado

Mga unom na lang ka adlaw sa dili pa ang usa ka importante nga adlaw sa pangilin [holiday] nga gitawag og Pagpalabay [Passover]. Daghang mga tawo ang miadto sa Jerusalem aron sila makahalad og mga sakripisyo sa templo nianang adlawa. Si Jesus naglakaw paingon sa Betania, usa ka balangay duol sa Jerusalem. Siya anaa didto sulod sa lima ka gabii uban sa Iyang mga higala nga sila si Lazaro, Maria, ug Marta. Si Maria midihog sa Iyang tiil gamit og lana.

Tan-awa sa Juan 12:1–3.

Dominggo

Si Jesus milakaw gikan sa Betania paingon sa Jerusalem. Siya nagsakay og asno pasulod sa siyudad, sama sa mabasa diha sa Daang Tugon nga Iyang buhaton. Ang mga tawo miila Niya isip ilang hari, nagsinggit, “Hosanna,” ug nagkatag og mga dahon sa palma atubangan sa asno aron dili maabugan ang Manluluwas. Si Jesus mibisita sa templo ug dayon mibalik sa Betania.

Tan-awa sa Zacarias 9:9; Mateo 21:1–11; Marcos 11:1–11.

Lunes

Si Jesus nakakita sa mga tawo nga namalit ug namaligya og mga butang diha sa templo. Tungod kay gusto Niya nga ang templo mahimong usa ka “balay sa pag-ampo,” Iya silang gipapahawa. Dayon Iyang gipang-ayo ang mga tawo nga dili makalakaw o buta. Ang nagselos nga mga pari nasuko Kaniya.

Tan-awa sa Mateo 21:12–17; Marcos 11:15–19.

Martes

Si Jesus nagtudlo sa katawhan sa templo ug diha sa duol nga bungtod nga gitawag og Bungtod sa mga Olivo.

Ang mga pari nagkunsabo sa pagpatay ni Jesus. Usa sa Iyang mga disipulo, si Judas Iscariote, miuyon sa pagtugyan ni Jesus ngadto sa mga pari isip ilis sa 30 ka piraso nga pilak.

Tan-awa sa Mateo 25:31–46; 26:14–16.

Miyerkules

Ang mga kasulatan hilum kon unsa ang gibuhat ni Jesus niining adlawa. Mahimong iyang gigahin ang adlaw uban sa Iyang mga disipulo. Mahimo ninyong basahon ang sambingay sa napulo ka mga dalagang birhin, usa sa istorya nga gisaysay ni Jesus ngadto sa Iyang mga disipulo aron sa pagtabang kanila sa pagpangandam sa Iyang Ikaduhang Pag-anhi.

Tan-awa sa Mateo 25:1–13.

HUWEBES

Ang mga disipulo ni Jesus nangandam alang sa panihapon sa Pagpalabay. Atol sa pagpangaon, si Jesus miingon sa mga disipulo nga usa kanila mobudhi Kaniya. Dayon, sa pagtabang kanila sa paghinumdom Kaniya, Iyang gipahigayon kanila ang sakrament sa unang higayon. Si Jesus miadto sa Tanaman sa Getsemani aron sa pag-antus alang sa atong mga sala ug sa pag-ampo sa Dios. Ang mga tawo miabut nga nagdala og mga espada ug midakop Kaniya. Ang mga disipulo nanagan palayo tungod sa kahadlok.

Tan-awa sa Mateo 26:17–29, 36–56.

Biyernes

Si Jesus gidala ngadto sa halangdong pari, si Caifas. Ang disipulo ni Jesus nga si Pedro milimod nga siya kaila Kaniya. Si Jesus gipangutana sa gobernador, si Pilato, ug ni Herodes. Siya gihukman nga patyon diha sa krus. Si Jesus gilansang. Usa ka datu nga tawo nga ginganlan og Jose ang milubong ni Jesus diha sa iyang lubnganan. Ang inahan ni Jesus, si Maria, ug Maria Magdalena mibisita sa lubnganan.

Tan-awa sa Mateo 26:57–72; 27:1–2, 27–37; Lucas 23:44–46, 50–56.

Sabado

Ang lawas ni Jesus anaa sa lubnganan. Usa ka dako nga bato ang gibutang atubangan sa pultahan. Ang dautang mga pari naghangyo kang Pilato sa pagbutang og mga gwardya nga magbarug gawas sa lubnganan aron makasigurado nga walay tawo ang makasulod.

Tan-awa sa Mateo 27:57–66.

Dominggo sa PASKO SA PAGKABANHAW [EASTER]

Si Jesus nabanhaw! Siya mibangon gikan sa lubnganan. Usa ka anghel mikanaog gikan sa langit ug misibug sa bato.

Si Jesus miingon sa Iyang mga disipulo sa pagtudlo ug sa pagbunyag sa uban ug misaad nga kanunay magauban kanila.

Tan-awa sa Mateo 28.

Gilitratohan ni Matthew Reier; sa ibabaw, gikan sa wala: Si Jesus Migawas sa Betania Pagkagabii, ni James Tissot; Ang Madaugong Pagsulod ni Kristo sa Jerusalem, ni Harry Anderson © IRI; Pag-ayo sa Buta nga Lalaki, ni Harry Anderson, sa maayong kabubut-on sa Pacific Press Publishing, Inc., dili mahimong pakopyahan; Ang Tingog gikan sa Langit, ni James Tissot; detalye gikan sa Lima Kanila mga Maalamon, ni Walter Rane, sa maayong kabubut-on sa Church History Museum; Si Kristo sa Gethsemani, ni Harry Anderson © IRI; detlye gikan sa Ang Paglansang, ni Harry Anderson © IRI; Ang Paglubong ni Kristo, ni Carl Heinrich Bloch, gigamit uban sa pagtugot sa National Historic Museum sa Frederiksborg sa Hillerød, Denmark, dili mahimong pakopyahan; sa ubos: Siya Nabanhaw, ni Del Parson