Ang Tigpataliwala nga si Jesukristo
Gikan sa “The Mediator,” Ensign, Mayo 1977, 54.
Si Jesukristo, ang atong Tigpataliwala, mibayad sa bili nga dili nato mabayran aron kita makabalik sa pagpuyo uban sa atong Langitnong Amahan.
Tuguti ako sa pagsulti kaninyo og usa ka istorya—usa ka sambingay.
Makausa adunay usa ka tawo nga gusto kaayo makaangkon og usa ka butang. Maingon og mas importante pa kini kay sa bisan unsang butang sa iyang kinabuhi. Aron maangkon niya ang iyang gitinguha, [gisudlan] niya ang dakong utang.
Gipasidan-an na siyang daan kabahin sa pagpangutang og ingon niana kadako ug ilabi na mahitungod sa iyang tigpautang, ang tawo nga mopahulam. Apan ingon og importante kaayo kini alang kaniya nga maangkon kon unsay iyang gusto karon dayon. Sigurado siya nga makabayad ra siya niini sa dili madugay.
Mao nga siya mipirma og usa ka kontrata. Siya mobayad gayud niini samtang magdagan ang panahon. Wala kaayo siya mabalaka niini, kay ang tagal sa pagbayad ingon og layo pa kaayo. Iya nang naangkon kon unsay iyang gusto karon, ug ingon og mao ra kana ang mahinungdanon.
Ang iyang giutangan kanunay nga anaa sa iyang hunahuna, ug siya usahay modata og [gamay] matag karon ug unya, uban sa pamasin nga unta ang adlaw sa pagpaningil [ang adlaw nga siya kinahanglan mobayad sa tanan] dili na gayud moabut.
Kaangayan o Kalooy?
Apan sumala sa kanunay nga mahitabo, ang adlaw miabut, ug ang kontrata naabtan sa tagal. Ang utang wala pa matiwas og bayad. Ang iyang giutangan miabut ug naningil sa tibuok nga bayranan.
Diha pa siya nakaamgo nga ang iyang giutangan adunay gahum dili lamang sa pagbawi [pagkuha] sa tanan nga iyang naangkon apan ingon man usab gahum sa pagbalhug kaniya sa bilanggoan.
“Dili ako makabayad kanimo, kay wala akoy ikasarang sa pagbuhat sa ingon,” mitug-an siya.
“‘Dayon,” ang tigpautang miingon, “atong sundon ang kontrata, bawion ang imong mga kabtangan, ug ikaw mabilanggo. Ikaw miuyon niana. Imo kadto nga pagpili. Gipirmahan nimo ang kontrata, ug karon kinahanglan kini nga tumanon.”
“Dili ba mahimong lugwayan nimo ang panahon o pasayloon sa utang?” nagpakilooy ang utangan. “Paghimo og laing paagi alang kanako nga magpabilin kon unsay ania kanako ug dili mabilanggo. Sigurado ba nga ikaw motuo og kalooy? Dili ka ba mopakita og kalooy?”
Ang nagpautang mitubag, “Ang kalooy kanunay nga usa ra ang madapigan. Ikaw lamang ang masilbihan niini. Kon ako mopakita og kalooy kanimo, magpabilin nga ako dili mabayaran. Kaangayan ang akong gipangayo. Motuo ka ba og kaangayan?”
“Mituo ako og kaangayan dihang gipirmahan nako ang kontrata,” ang nangutang miingon. “Kini anaa dapig kanako kaniadto, kay ako nagtuo nga kini manalipod kanako. Ako wala magkinahanglan og kalooy kaniadto, ni maghunahuna nga ako magkinahanglan pa gayud niini.”
“Kaangayan ang nangayo nga imong bayaran ang kontrata o mag-antus sa silot,” mitubag ang nagpautang. “Mao kana ang balaod. Ikaw miuyon niini ug mao gayud kana ang kinahanglang masunod. Ang kalooy dili makapawagtang sa kaangayan”
Anaa sila: Ang usa nagpangita sa kaangayan, ang usa nangaliyupo og kalooy. Walay usa nga matagbaw gawas kon mouyon ang usa.
“Kon ikaw dili mopasaylo sa utang walay mahimo nga kalooy,” nangamuyo ang nangutang.
“Kon ako mohimo, walay kaangayan niana,” mao ang tubag.
Ang duha ka balaod, maingon og, dili maalagaran. Kini duha ka mahangturon nga panghunahuna nga daw nagkasukwahi sa usag usa. Wala bay paagi nga ang hustisya hingpit nga maalagaran ug ang kalooy usab?
Adunay paagi! Ang balaod sa kaangayan mahimong hingpit nga mahatagan sa katagbawan ug ang kalooy mahimong ikahatag sa hingpit—apan nagkinahanglan kini og laing tawo. Ug kini nahitabo niining panahona.
Ang Iyang Tigpataliwala
Ang nangutang adunay higala. Miabut siya aron motabang. Siya nakaila kaayo sa utangan. Siya naghunahuna kaniya nga walay kaalam sa pagsulod sa ingon ka lisud nga sitwasyon. Bisan pa, gusto siyang motabang tungod kay siya nahigugma kaniya. Siya nagpatunga kanila, giatubang ang nagpautang, ug mihimo niini nga tanyag: “Bayaran nako ang utang kon imong ipalingkawas ang nakautang gikan sa iyang kontrata aron magpabilin ang iyang mga kabtangan ug dili mabilanggo.
Samtang ang nagpautang nagtimbang-timbang sa tanyag, ang tigpataliwala midugang, “Gipangayo nimo ang kaangayan. Bisan og siya dili makabayad kanimo, ako ang mobayad niini. Ikaw mabayaran sa husto ug dili makapaningil pa og labaw. Kay kini dili makiangayon.”
Ug busa ang nagpautang miuyon.
Ang tigpataliwala miatubang sa nakautang. “Kon bayaran nako ang imong utang, ikaw modawat ba kanako nga imong tigpautang?’
“O oo, oo,” tuaw sa utangan. “Giluwas mo ako sa pagkabilanggo ug mipakita og kalooy kanako.”
“Unya,” miingon ang mihinabang [ang tawo nga mitabang], “bayaran nimo ang imong utang ngari kanako ug mohimo ako og mga patakaran. Kini dili sayon, apan kini mahimo. Mohatag ako og paagi. Dili na kinahanglan nga mabilanggo ka.”
Ug mao kadto nga ang tigpautang gibayaran sa tanan. Makiangayon ang pagpakigsabut kaniya. Walay kontrata nga gilapas. Ang utangan, sa laing bahin, nahatagan og kalooy. Ang duha ka balaod natuman. Tungod kay dihay usa ka tigpataliwala, ang kaangayan nakaangkon sa hingpit nga bahin ug ang kalooy hingpit nga nahatagan og katagbawan.
Atong Tigpataliwala
Ang matag usa kanato nagpuyo sa usa ka matang sa espirituhanon nga utang. Moabut ang adlaw nga ang utang paninglon na, og mokuha na sa bayad. Hinoon usahay makita nato kini karon, kon kana nga adlaw moabut ug hapit na ang tagal [duol], moaninaw kita sa palibut sa kapait sa tawo, kang bisan kinsa, nga makatabang nato.
Ug pinaagi sa mahangturong balaod, ang kalooy dili ikahatag gawas kon adunay usa ka tawo nga andam ug makahimo sa pagdala sa atong utang ug mobayad sa bili ug mopahimutang sa mga kondisyon alang sa atong katubsanan.
Gawas kon adunay usa ka tigpataliwala, gawas kon kita adunay higala, ang tibuok gibug-aton sa kaangayan ania kanato. Ang hingpit nga bayad sa kada kalapasan, bisan unsa pa ka gamay, bisan unsa pa ka lawom, paninglon [kuhaon] gikan nato ang tanan.
Apan hibaloi kini: Ang kamatuoran, mahimayaon nga kamatuoran, nagpahayag nga adunay usa ka Tigpataliwala. “Kay adunay usa ka Dios, ug adunay usa ra ka tigpataliwala sa Dios ug sa mga tawo, nga si Kristo Jesus” (1 Timoteo 2:5). Pinaagi Kaniya ang kalooy hingpit nga mahatag ngadto sa matag usa kanato nga dili makapasilo sa mahangturong balaod sa kaangayan.
Ang paghatag og kalooy dili awtomatik. Pinaagi kini sa pakigsaad uban Kaniya. Kini ubos sa Iyang mga kondisyon, sa Iyang maloloy-ong mga kondisyon, nga naglakip, isip usa ka kinahanglanon gayud, sa bunyag pinaagi sa pagpaunlod alang sa kapasayloan sa mga sala.
Ang tanang mga tawo mahimong mapanalipdan sa balaod sa hustisya, ug sa makausa ang matag usa kanato mahimong hatagan sa matubsanon ug makaayo nga panalangin sa kalooy.
Paghulagway pinaagi ni Dan Burr