Pagtulun-an human sa usa ka Pagtulun-an
Doktrina ug mga Pakigsaad 76:22–24
Kini nga mga bersikulo nagpahayag sa usa ka moderno nga saksi ni Jesukristo. Siya buhi!
22 Ug karon, human sa daghang mga pagpamatuod nga gihatag mahitungod kaniya kini mao ang pagpamatuod, ang katapusan sa tanan, nga kami naghatag mahitungod kaniya: Nga siya buhi!
23 Kay kami nakakita kaniya, gani sa tuo nga kilid sa Dios; ug kami nakadungog sa tingog nga nagpamatuod nga siya mao ang Bugtong Anak sa Amahan—
24 Nga pinaagi kaniya, ug ngadto kaniya, ug tungod kaniya, ang mga kalibutan nalalang, ug ang mga lumulupyo niana mao ang anak nga mga lalaki ug anak nga mga babaye sa Dios.
Daghang mga Pagpamatuod
Daghang mga pagpamatuod ang gikahatag sa nabanhaw nga Kristo sa wala pa kini nga pagpadayag. Ania ang pipila ka mga ehemplo:
-
Maria Magdalena (tan-awa sa Juan 20:11–18)
-
Ang mga Apostoles sa panahon ni Jesus (tan-awa sa Mateo 28:9–20; Marcos 16:14–20; Lucas 24:36–53; Juan 20:19–29; 21)
-
Ang duha ka mga tinun-an sa dalan sa Emmaus (tan-awa sa Lucas 24:13–35)
-
Esteban (tan-awa sa Mga Buhat 7:55–56)
-
Pablo (tan-awa sa Mga Buhat 9:1–6)
-
Ang mga Nephite (tan-awa sa 3 Nephi 11–28)
-
Moroni (tan-awa sa Ether 12:39)
-
Joseph Smith (tan-awa sa Joseph Smith—Kasaysayan 1:16–20)
Siya Buhi!
“Akong nabasa—ug ako mituo—sa mga pagpamatuod niadtong kinsa nakasinati sa kaguol sa Pagkalansang ni Kristo ug sa kalipay sa Iyang Pagkabanhaw. Ako nakabasa—ug mituo sa—mga pagpamatuod niadtong didto sa Bag-ong Kalibutan kinsa gibisitahan sa samang nabanhaw nga Ginoo.
“Ako nagtuo sa pagpamatuod sa usa kinsa, niini nga dispensasyon, namulong uban sa Amahan ug sa Anak diha sa usa ka kakahoyan nga karon gitawag og sagrado ug kinsa mitugyan sa iyang kinabuhi, misilyo niana nga pagpamatuod sa iyang dugo.
Presidente Thomas S. Monson, “Siya Nabanhaw!” Liahona, Mayo 2010, 89.
Mga Kalibutan Gilalang ug Nalalang
“Ubos sa direksyon sa Amahan, si Kristo mao ang Ginoo sa uniberso kinsa mibuhat sa mga kalibutan nga dili maihap—diin ang ato usa niini (tan-awa sa Mga Taga-Efeso 3:9; Mga Hebreohanon 1:2).
“Pila ka mga planeta ang anaa sa uniberso nga adunay mga tawo diha niini? Wala kita makahibalo, apan kita wala mag-inusara sa uniberso ! Ang Dios dili Dios sa usa lamang ka planeta!”
Elder Neal A. Maxwell (1926–2004) sa Korum sa Napulog Duha ka mga Apostoles, sa “Linain nga mga Saksi ni Kristo,” Liahona, Abr. 2001, 5.
Anak nga mga Lalaki ug Anak nga mga Babaye ngadto sa Dios
“Dili kamo ordinaryo nga mga binuhat, akong minahal nga batan-ong mga higala sa tibuok kalibutan. Mahimayaon ug mahangturon kamo. …
“Mao kini ang akong pag-ampo ug panalangin nga kon kamo motan-aw sa inyong kaugalingon sa samin, makakita kamo lapas sa mga pagkulang ug mga pagduha-duha sa kaugalingon ug makaila kinsa gayud kamo: mahimayaon nga anak nga mga lalaki ug anak nga mga babaye sa Makagagahum nga Dios.”
Presidente Dieter F. Uchtdorf, Ikaduhang Magtatambag sa Unang Kapangulohan , “The Reflection in the Water” (Church Educational System fireside alang sa mga young adults, Nob. 1, 2009); anaa sa CESfiresides.lds.org.
Detalye gikan saSiya Nabanhaw, ni Del Parson