Ang Gahum sa Kasulatan

Ni Adam C. Olson

Mga Magasin sa Simbahan

Sa dihang ang duha ka mga tin-edyer nga taga-Tahiti mihatag og higayon sa mga kasulatan, nausab ang ilang mga kinabuhi.

Si Rooma dili gayud ganahan nga magtuon sa mga kasulatan. Si Vaitiare dili gayud ganahan nga moadto sa seminary. Ug dili nila kinahanglan. Apan sa dihang mipili sila, nausab ang ilang mga kinabuhi.

Nganong Dili?

Nganong ang usa ka tin-edyer mopili sa paggahin og duha ka oras kada Huwebes sa gabii nga magtuon sa mga kasulatan uban sa iyang mama? Usa ka tuig na ang milabay si Rooma Terooatea sa Tahiti tingali naghunahuna sa sama nga butang.

Karon siya tingali makapangutana ngano ang usa ka tin-edyer mopili nga dili.

Sa tulo ka tuig sa seminary, si Rooma wala gayud magtagad kon ang iyang mga magtutudlo mohatag og mga kasulatan nga basahon alang sa sunod nga leksyon. “Dili ko gusto nga mobasa niini,” miingon siya. “Ang mga kasulatan wala ganahi nako.”

Apan siya natingala ngano nga ang mga lider sa Simbahan sa iyang ward ug sa stake mogamit kanunay sa kasulatan sa ilang mga pakigpulong ug sa mga leksyon. Nagtan-aw siya sa iyang mga lider. Nakamatikod siya nga sayon kaayo sa iyang presidente sa stake sa pagkutlo gikan sa mga kasulatan.

Mao nga sa dihang gibahin ang Faaa Tahiti Stake ang mga estudyante sa seminary gibahin ngadto sa mga team aron maghimo og mga kompetisyon sa pagkahanas sa kasulatan [scripture mastery] sa iyang katapusang tuig sa seminary, si Rooma nakahukom sa paghatag sa mga kasulatan og higayon.

Mao nga didto nagsugod ang iyang senimana nga sesyon sa pagtuon uban sa iyang inahan. Kada Huwebes sa gabii magtuon sila alang sa kompetisyon sa klase sa sunod adlaw, nagkat-on asa ang importante nga mga bersikulo ug gani misag-ulo sa kadaghanan niini.

Ug didto nagsugod ang kausaban alang ni Rooma. Ang iyang pagtuon sa kasulatan nakapalig-on sa iyang relasyon uban sa iyang mama. Nagsugod siya sa pagkakita sa mga pagkasusama tali sa unsa ang gitudlo sa mga kasulatan ug unsa ang nahitabo sa kalibutan karon. Samtang siya nag-ampo mahitungod kon unsay iyang nabasa, nakaamgo siya nga kini iya sa Dios.

Nakatabang usab kini kaniya sa pagpangulo sa iyang team sa pagdaog sa pagkakampiyon sa pagkahanas sa kasulatan diha sa stake.

Si Rooma nakaila sa mga panalangin nga iyang nadawat sa usa ka leksyon nga iyang nakat-unan sa iyang pagtuon. “Sa Mosiah 2:24 si Haring Benjamin mitudlo nga kon kita mopili sa pagbuhat unsa ang gusto sa Ginoo, panalanginan dayon kita,” miingon si Rooma. Usa sa labing importante nga mga panalangin nga iyang nadawat mao nga “human sa pagtuon sa mga kasulatan niining tuiga, nasayud ako nga ang Basahon ni Mormon tinuod.

Ayaw Akog Sultihi Unsay Buhaton

Sa sinugdanan sa tuig ting-eskwela, si Vaitiare Pito dili gani miyembro sa Simbahan. Mao nga sa unsa nga paagi nga ang usa ka bag-ong miyembro kinsa wala gayud makaapil sa seminary kaniadto nakatabang sa iyang team sa pagdaog sa pagkakampiyon sa pagkahanas sa kasulatan diha sa stake?

“Wala ako mabalaka nga walay daghang kasinatian,” miingon siya. “Akong nakat-unan kadtong mga bersikulo panahon sa mga leksyon sa misyonaryo.”

Kadaghanan sa pamilya ni Vaitiare nagpamiyembro sa Simbahan human mamatay ang iyang amahan nga wala damha ug ang lider sa ward mission midala sa mga misyonaryo sa balay ni Vaitiare. Nakigsulti sila mahitungod sa panaghiusa sa pamilya ug pagkahiusa sa kahangturan. “Nakahatag gayud kini og kausaban sa among pamilya,” siya miingon.

Hinoon, wala kini makapausab sa independente nga kinaiya sa 17 anyos. “Human ako mabunyagi, ang tanan misulti kanako nga motambong sa seminary,” miingon siya. “Dili ko ganahan nga sultihan unsay buhaton, mao nga dugay-dugay gayud ko mitambong.

Sa katapusan nakahukom siya nga motambong ug nalingaw niini. Gitudlo siya nga mahimong kabahin sa samang team ni Rooma sa pagkahanas sa kasulatan.

Sa sinugdanan wala siya maningkamot sa pagbasa sa mga assignment sa kasulatan. Apan sa dihang nakahukom siya, sa wala madugay nakamatikod siya og daghang mga panalangin.

“Ang mga kasulatan dako og ikatabang,” miingon siya. “Ako nakakat-on og daghang mga butang gikan sa mga kasulatan,” lakip na ang ka importante sa pag-ampo ug nga ang Langitnong Amahan motubag niadtong mga pag-ampo.

Nakat-on usab siya nga kon siya mohukom sa pagbuhat og butang, sama sa pagtambong sa seminary o pagbasa sa mga kasulatan, ang pagtuman sa pasalig mas sayon kay sa siya mohimo niini tungod kay kinahanglan niyang buhaton o “kinahanglan gayud.”

Karon nga human na ang tuig ting-eskwela, si Vaitiare mapasalamato nga siya mipili sa pagsulod sa seminary ug sa pagtuon sa mga kasulatan: “Nasayud ako nga kon kita mobasa sa mga kasulatan, kita mapanalanginan.”

Sa dihang si Rooma Terooatea (ubos) ug ang iyang mga kauban sa seminary mibyahe ngadto sa silinganang Moorea (wala) sa pagtesting sa ilang kahibalo sa ilang kasulatan, dili na igsapayan ang sangputanan—si Rooma usa na ka mananaog.

Sa dihang si Vaitiare Pito sa Tahiti nakahukom sa pagtuon sa mga kasula-tan, nagsugod siya sa pag-ila sa mga panalangin.