Si Jesukristo Ang Akong Manluluwas ug Manunubos

Nila ni Ana Maria Coburn ug Cristina Franco

Inyong magamit kini nga leksyon ug kalihokan sa pagkat-on og dugang mahitungod sa tema sa Primary karong bulana.

“Kami nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3),

Unsay inyong andam nga ihatag alang sa tawo nga inyong gimahal pag-ayo? Ang atong Manluluwas, si Jesukristo, nahigugma kanato pag-ayo nga Siya mihatag sa Iyang kinabuhi alang kanato.

Ang Langitnong Amahan nasayud nga kon kita makasala ug makahimo og mga sayop, dili kita makapuyo uban Kaniya pag-usab. Mao nga ang Iyang Anak, si Jesukristo, mitanyag nga mahimo natong Manluluwas. Ang Langitnong Amahan mipili Kaniya sa pagluwas nato tungod kay Siya mao ang bugtong tawo nga nakapuyo og kinabuhi nga walay sala.

Si Jesus nag-antus ug namatay aron sa pagluwas kanato gikan sa kamatayon ug sa atong mga sala. Kini nga buhat sa gugma gitawag og Pag-ula. Tungod sa Pag-ula, kita makahinulsol sa atong mga sala, mapasaylo, ug mahimong limpyo ug putli sama ni Jesus.

Gilansang si Jesus ug namatay, apan human sa tulo ka mga adlaw Siya nabanhaw. Siya nabuhi pag-usab! Tungod kay Siya nabanhaw, kita mabanhaw usab. Kini nagpasabut nga ang atong mga lawas ug mga espiritu mahiusa pag-usab sa kahangturan.

Sa tinuod, si Jesukristo mao ang atong Manluluwas ug Manunubos. Siya ang hingpit nga ehemplo alang natong tanan. Siya mitudlo nato unsaon sa pagtagad ang usag usa uban sa kamabination. Siya mitudlo nato unsaon sa pagserbisyo sa usag usa. Siya mitudlo nato unsaon nga mahimong mas maayo. Dili kita makahimo sa pagpuyo og hingpit nga kinabuhi sama Kaniya, apan kita makabalik sa pagpuyo uban ni Jesus ug sa Langitnong Amahan pinaagi sa pagsunod sa mga sugo ug paghimo sa atong labing maayo. Kinahanglan kita nga mosunod ni Jesukristo kada adlaw.