Anaa sa mga Balita

Si Elder Perry Mitukod sa Unang Stake sa Guam

Si Elder L. Tom Perry sa Korum sa Napulog Duha ka mga Apostoles mibisita sa Guam niadtong Disyembre 2010 aron sa pagtukod sa Barrigada Guam Stake, ang unang stake sa teritoryo sa Guam. Samtang didto, si Elder Perry, kinsa miserbisyo sa United States Marine Corps dihang dapita atol sa Ikaduhang Gubat sa Kalibutan, mibisita usab sa Pacific War Museum ug sa kasilinganang isla sa Saipan. Adunay 1,971 ka mga miyembro sa Simbahan nga nagpuyo sa Guam. Ang teritoryo sa Guam kabahin sa Asia North Area sa Simbahan.

Ang LDS nga mga Doktor Nanambal og Kolera sa Papua New Guinea

Usa ka grupo sa LDS nga mga doktor gikan sa Australia migahin og panahon sa pagpanambal sa mga biktima sa nagdagsang nga kolera sa hilit nga mga balangay sa amihanan-kasadpan sa Papua New Guinea sa hinapos sa 2010.

Ang mga doktor miatiman sa gatusan ka mga pasyente, nagluwas sa usa ka tawo kinsa hapit na gayud mamatay sa dihang miabut siya sa ospital ug sa uban kinsa dili na unta molungtad og 24 ka oras kon dili matambalan.

Ang mga tawo nagpanon nga naglakaw ug nagsakay og bangka paingon sa mga doktor. Si David Williams sa Brisbane ug si Anthony Mahler sa Cairns miingon nga sulod sa usa ka adlaw sa pag-abut nila sa balangay sa Sogere, sila nakapanambal og labaw pa sa 200 ka mga kaso sa kolera. Nagpasabut sa kinatibuk-ang kasinatian, si Dr. Mahler miingon, “[Kini] mao ang labing magantihon sa propesyonal nga kasinatian sa akong kinabuhi,” bisan pa man sa mga kalisud ug makapaluya nga kabug-at sa trabaho.

Agig dugang sa pagpadala og mga doktor, ang Simbahan mihatag og mga relief supply, lakip ang medikal nga tabang ug mga water purifier. Mga kargamento sa pagkaon ug mga sabon gipadala usab ngadto sa naglisud nga mga dapit gikan sa Simbahan sa Port Moresby, ug mga kargamento sa personal nga mga hygiene kit gipadala gikan sa Port Moresby ug Brisbane. Usa ka magtiayon nga misyonaryo nga eksperto sa pagpalimpyo sa tubig miadto sa Papua New Guinea aron motabang sa pagpakigtambayayong sa mga paningkamot sa kahupayan.

Ang DVD Mipaila sa Tema sa Mutual sa 2011

Niadtong Enero, ang Simbahan misugod sa pagpang-apud-apud sa 2011 DVD nga Alang sa Kalig-on sa Kabatan-onan, Kami Nagtuo, ngadto sa mga unit sa Simbahan sa tibuok kalibutan aron magamit sa pagsuporta sa 2011 nga tema sa Mutual.

Ang DVD puno sa multimedia nga desinyo aron sa pagtabang sa mga batan-on nga makahimo sa tema, Mga Artikulo sa Hugot nga Pagtuo 1:13, usa ka importante nga bahin sa ilang kinabuhi. Ang mga segment nagpakita nila ni Presidente Thomas S. Monson, mga kinatibuk-ang presidente sa Young Men ug Young Women, musika, mga pagpamatuod sa mga batan-on, ug daghan pa.

Kadaghanan sa mga sulod naglangkob sa mga pagpamatuod sa mga batan-on ug makapadasig nga mga kasinatian.

Ang musika, mga mensahe, ug mga pagpamatuod magamit aron sa pagpalambo sa mga klase sa mga batan-on, mga miting, ug mga kalihokan sa tibuok tuig.

Ang tanang materyal anaa sa internet aron ma-download sa youth.lds.org.

DVD naglakip usab sa hubad sa mosunod nga mga pinulongan: Chinese, English, French, German, Italian, Japanese, Korean, Portuguese, Russian, ug Spanish.