Dili Ko Interesado sa Simbahan
Tanintoa Sexton, Marshall Islands
Dili ko gusto nga makiglambigit sa Simbahan sa dihang ang akong asawa mihangyo kon ang mga misyonaryo makatudlo ba sa among anak nga mga lalaki. Apan wala ko makabalibad tungod kay siya usa na ka miyembro.
Sa dihang ang mga misyonaryo nagsugod sa pag-adto sa among balay kaduha sa usa ka semana, moadto ko sa balay sa akong amigo nga naa sa tapad. Ang akong amigo usa ka lig-on nga miyembro sa laing Kristiyano nga simbahan. Kada higayon nga ako mobisita kaniya, gusto siyang makigsulti mahitungod sa Biblia. Giingnan nako siya nga dili ko gusto nianang mga butanga ug dili ko gusto nga magtuon og relihiyon. Apan nagsige siya og kombinser nako, ug sa katapusan ako miingon og oo. Mao nga sulod sa taas nga panahon sa akong pagtuon sa Biblia uban sa akong amigo samtang ang mga misyonaryo nagtudlo sa akong anak nga mga lalaki.
Usa ka adlaw niana oras na nga moanha ang mga misyonaryo sa among balay. Apan imbis mobiya, ako nakahukom nga magpabilin sa pikas kwarto. Samtang ang mga misyonaryo nagsugod sa pagtudlo sa akong anak nga mga lalaki, akong namatikdan ang akong kaugalingon nga gusto pang maminaw og dugang. Nag-anam ko og paduol sa pultahan aron mas makadungog pa. Nagtudlo sila sa akong anak nga mga lalaki mahitungod sa mga apostoles ug mga propeta.
Sa wala madugay ako nakaamgo nga ako gusto pang makat-on og dugang. Nakigsulti ko sa mga misyonaryo ug nakahukom nga maminaw sa mga panaghisgutan gikan kanila—sa pribado nga paagi. Ang akong asawa diha kanunay, apan walay usa nga nakahibalo bahin niini.
Mao nga kon ang mga misyonaryo moabut aron sa pagtudlo sa akong anak nga mga lalaki kaduha sa usa ka semana, moadto ko sa balay sa akong amigo. Dayon, sa laing adlaw, sila motudlo kanako.
Usa ka adlaw niana sa dihang ang akong amigo misulti og dautan mahitungod sa Simbahan, nanalipod ako niini. Sama sa daghang mga tawo sa Marshall Islands, wala siyay daghang nahibaloan mahitungod sa Simbahan ug wala makasabut sa pipila ka mga butang nga gituohan sa mga Santos sa Ulahing mga Adlaw. Sa dihang misulti siya og laing negatibo nga mga butang, nanalipod ako pag-usab sa Simbahan.
Mao kadto ang nahitabo sulod sa pito ka bulan. Dayon sa usa ka adlaw ako nakaamgo nga ang Espiritu Santo mikumpirmar nako nga ang tanan nga gitudlo sa mga misyonaryo tinuod. Ako nakaamgo nga ako kinahanglan nga magpabunyag, bisan gamay pa ang akong nahibaloan mahitungod sa ebanghelyo.
Human sa akong bunyag niadtong 2007, ako malipayon kaayo. Nagsugod kami sa pagtigum og kwarta aron makaadto sa templo sa Hawaii, diin ang akong asawa, among tulo ka mga anak, ug ako nabugkos niadtong Disyembre 2008.
Ang pagkamiyembro sa Simbahan nakahimo og dakong kausaban sa akong kinabuhi. Nakahukom ko nga mohunong sa akong ikaduhang trabaho nga tiglingaw sa usa ka restawran tungod kay gabii na kaayo kong makauli ug ang mga garment manimahong sigarilyo. Bisan pa sa pagkawala nianang dugang nga kinitaan, ang Ginoo miatiman ra namo.
Ako nasayud nga ang Simbahan tinuod ug nga si Joseph Smith usa ka propeta sa Dios tungod kay gibati nako ang Espiritu ug sa mga panalangin nga akong nadawat.