Kami Namulong kang Kristo

Maghinulsol, Mobalik ngadto sa Ginoo, ug Mamaayo

Ni David L. Frischknecht

Departamento sa Kurikulum

“Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila.” (D&P 58:42).

Bag-ohay lang usa ka buotan ug matinud-anong babaye nga akong kaila grabeng naangol sa aksidente sa sakyanan. Lakip sa iyang pagkaangol mao ang pagkabali sa gusok ug dugukan [vertebrae]. Apil sa iyang pagpakaayo nagkinahangalan nga siya mag-sul-ob og brace sa iyang likod ug li-og aron dili niya kini malihok. Ang brace dili gayud komportable. Apan kini gikinahanglan. Kini nakahatag og kondisyon nga pinaagi niini ang iyang likod ug li-og mamaayo.

Ang paghinulsol sama niana nga brace. Kon kita makasala, atong gipasakitan ang atong kalag, ug balaanong pagtambal ang gikinahanglan aron kita mamaayo pag-usab. Ang paghinulsol naghatag og kondisyon nga nagtugot sa Manluluwas, pinaagi sa gahum sa Pag-ula, sa pag-ayo kanato (tan-awa sa 3 Nephi 9:13). Kon ang ubang parte sa paghinulsol dili komportable—sama sa usa ka brace diha sa nabali nga likod—sa gihapon kita kinahanglang maghinulsol.

Si Presidente Dieter F. Uchtdorf, Ikaduhang Magtatambag sa Unang Kapangulohan, mitudlo: “Ang tinuod nga paghinulsol magdala kanato balik ngadto sa pagbuhat kon unsay matarung. Sa tininuod nga paghinulsol kinahanglan kitang moila sa atong mga sala ug mobati og kahasol, o diosnon nga kasubo, ug mokumpisal niadto nga mga sala ngadto sa Dios. Kon ang atong mga sala bug-at, kinahanglan usab nato kining ikumpisal ngadto sa atong gitugutan nga lider sa priesthood. Kinahanglan kitang mangayo sa Dios og kapasayloan ug mobuhat sa tanan natong mahimo aron sa pagkorihir sa bisan unsa nga kadaut nga misangput tungod sa atong mga binuhatan. Ang paghinulsol nagpasabut og kausaban sa hunahuna ug kasingkasing—mohunong kita sa pagbuhat sa mga butang nga sayop, ug mosugod kita sa pagbuhat sa mga butang nga matarung. Nagdala kini kanato og usa ka bag-o nga kinaiya ngadto sa Dios, sa kaugalingon, ug sa kinabuhi sa kinatibuk-an.”¹

Kon kita malampusong makakompleto sa proseso sa paghinulsol, ang resulta mao ang pagkaayo, kahupay, ug kalipay. Si Dorothy J. R. White misulat:

Hunahunaa ang mga luha nga natagak sa gawas,

Apan kini naglimpyo sa sulod.²

Ang Ginoo naghangyo uban sa walay puas, gugma, ug pag-awhag nga kita maghinulsol, tungod kay gusto Niya nga moayo kanato. Siya nag-antus sa Iyang lawas ug espiritu aron sa pagbayad sa atong mga sala kon kita maghinulsol. Siya mipasabut:

“Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol;

“Apan kon dili sila maghinulsol sila kinahanglan gayud nga mag-antus sama kanako;

“Kansang pag-antus nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya—

“Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan” (D&P 19:16–19).

“Busa, Ako magsugo kanimo pag-usab sa paghinulsol” (D&P 19:16–20).

Unta kita maghinulsol karon, mobalik ngadto sa Ginoo, ug mamaayo.

Mubo nga mga sulat

1. Dieter F. Uchtdorf, “Punto sa Luwas nga Pagbalik,” Liahona, Mayo 2007, 100.

2. Dorothy J. R. White, “Repentance,” Ensign, Hulyo 1996, 27.

Unsa ang mga panalangin sa paghinulsol ug pagpasaylo?

• Ang Espiritu Santo mopamatuod kanato nga kita napasaylo.

• Ang Dios mokuha sa palas-anon sa kahasol sa konsensya tungod sa atong mga sala.

• Kita mas makatagamtam pag-ayo sa impluwensya sa Espiritu Santo.

Alang sa dugang impormasyon niini nga hilisgutan, tan-awa sa Ezequiel 33:15–16; Alma 12:33–34; 36:13, 17–20; ug Boyd K. Packer, “The Brilliant Morning of Forgiveness,” Ensign, Nob. 1995, 18–21.

Ang mga Panalangin sa Paghinulsol

“Ang sala mao ang tinuyo nga paglapas sa balaan nga balaod. Ang Pag-ula ni Jesukristo mao ang gasa sa Dios ngadto sa Iyang mga anak sa paghusto ug sa pagbuntog sa mga sangputanan sa sala. …

“Ang gasa sa Pag-ula ni Jesukristo naghatag kanato sa tanang mga higayon ug sa tanang mga dapit sa mga panalangin sa paghinulsol ug kapasayloan.”

Presidente Dieter F. Uchtdorf, Ikaduhang Magtatambag sa Unang Kapangulohan, “Punto sa Luwas nga Pagbalik,” Liahona, Mayo 2007, 99, 101.

Nganong ang Paghinulsol Makaayo Kanato?

Si Elder Neil L. Andersen sa Korum sa Napulog Duha ka mga Apostoles nagtabang sa pagtubag niining pangutana sa iyang pakigpulong sa kinatibuk-ang komperensya “Paghinulsol … Aron Ako Moayo Kaninyo” (Liahona, Nob. 2009, 40–43). Si propetang Alma nagtabang usab kanato nga kita makasabut sa paghinulsol ug sa Pag-ula (tan-awa sa Alma 42).

1. Ang atong paghinulsol nagtugot kanato nga magamit ang Pag-ula ni Kristo ug mamaayo. Ang pag-antus ni Kristo sa Getsemani ug sa Golgota nag-ula sa tanan natong mga sala. Siya makahimo ug matinguhaon gayud sa pagpasaylo sa atong mga sala.

2. Kon kita makasala, kita nagpalayo sa Dios. Kini nakapasakit sa atong espiritu.

3. Kon kita maghinulsol, kita “mobalik” sa Dios. Kini makatabang sa paghupay sa atong pagbasol. Ang pagpasaylo makapawala usab sa “kasaypanan gikan sa atong mga kasingkasing” (Alma 24:10) ug makadala og “kalinaw sa tanlag” (Mosiah 4:3), busa nag-ayo kanato.

Ikonsiderar ang pagpakigbahin ngadto sa usa ka tawo sa inyong pagpamatuod sa mga panalangin nga miabut kaninyo isip resulta sa paghinulsol.

Ang anak nga nawala mapainubsanong mibalik sa iyang amahan ug miingon, “Amahan, nakasala ako batok sa langit, ug sa imong atubangan, ug dili na ako takus pagatawgon pa nga imong anak” (Lucas 15:21). Ang iyang amahan midawat kaniya sa panimalay. Mao usab ang atong Langitnong Amahan modawat kanato kon kita maghinulsol.

AngPagbalik sa Nawala nga Anak, ni James Tissot