Gikan sa Natad sa Misyon
Ang Timaan diha sa Akong Panalangin
Nagserbisyo ako sa Texas Houston South Mission isip usa ka elder nga ang pinulongan Spanish. Usa ka adlaw ang akong kompanyon ug ako nanuktok sa mga pultahan, naningkamot sa pagpangita og tawo nga tudloan. Kami miabut sa usa ka balay nga may dako kaayong buslot sa gubaon, kahoy nga balkon.
Usa ka tigulang nga babaye ang miabli sa pultahan ug mipasulod kanamo. Dili ko sigurado kon kahibalo siya kon si kinsa kami ug unsa ang among gibuhat, apan siya matinahuron kaayo. Kami misugod sa pagtudlo kaniya sa unang leksyon, ug ang mga butang mora og maayo ra. Sa wala madugay ako nang turno sa pagtudlo kabahin ni Joseph Smith ug sa Unang Panan-awon. Nagtan-aw ko samtang ang nawong sa babaye nagpakita nga mora og nagkaanam og kalibug. Klaro kaayo nga siya sa tinuoray wala magsunod kon unsa ang akong gipaningkamutan nga ipasabut ngadto kaniya.
Human sa pagpangutana og pipila ka pangutana kon unsa na ang among nahisgutan ug asa kutob niini ang iyang nasabtan, mibati ko sa akong kaugalingon nga nasagmuyo nga wala niya masabti ang konsepto sa Unang Panan-awon. Gikapoy na ko, ug ang katapusang butang nga gusto sa usa ka misyonaryo mao ang usa ka tawo nga dili makasabut sa unsay gusto kaayo niya nga mahibaloan sa tawo nga tinuod.
Nianang segundo nga mibati ko nga ang akong mga emosyon nagsugod pag-ingon sa kasuko, usa ka mubong tudling gikan sa akong patriyarkal nga panalangin ang akong nahinumduman. Kini usa ka seksyon kabahin sa akong pamilya sa umaabot nga nagtambag kanako sa pagtudlo sa akong mga anak sa umaabot sa mga konsepto sa ebanghelyo. Samtang nakahinumdom ko niadto nga paragraph, nasayud ko ang Espiritu nagsulti kanako sa pagtudlo niining mapainubsanong babaye sa samang paagi nga akong tudloan ang usa ka bata.
Gisugdan nako siya sa pagtudlo uban sa mas yano ug mahigugmaong paagi. Naghanduraw ko sa akong kaugalingong mga anak nga naglingkod palibut sa sala nga nagtan-aw kanako, ilang amahan, samtang nagtudlo ko kanila kabahin ni Propetang Joseph Smith. Hilabihan kanindot nga makita ang kausaban diha sa iyang nawong. Ang iyang kilay misaka, ug ang iyang mga mata misugod sa pagsanag. Ang iyang nawong nga mora og naglibog nahimong interesado ug talagsaon. Samtang akong gisaysay ang istorya sa Langitnong Amahan ug ni Jesukristo nga nagpakita kang Joseph Smith, ang mga luha mipuno sa iyang mga mata ug midagayday sa iyang aping. Ang Espiritu mipuno sa kwarto ug ang akong kasagmuyo nahimong usa ka dako nga kalipay.
Dli gayud nako makalimtan kini nga kasinatian. Karon naghinam-hinam na ko sa pagtudlo sa samang mga baruganan ngadto sa akong mga anak sa umaabot ug mobati og dako nga kalipay pag-usab.
Paghulagway pinaagi ni Brian Call