Ang Katuyoan sa Relief Society

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo • Pamilya • Kahupayan

Sa dihang ang among kapangulohan unang gitawag, kami gihatagan og pipila ka mga kapanguhaan kabahin sa kasaysayan sa Relief Society. Kami mainampuong nagtuon niini, gusto nga masayud kon unsa ang katuyoan sa Relief Society ug unsa ang gusto sa Ginoo nga among buhaton. Kami nakakat-on nga ang katuyoan sa Relief Society nga giestablisar sa Ginoo mao ang pag-organisar, pagtudlo, ug pagdasig sa Iyang anak nga mga babaye sa pag-andam kanila alang sa mga panalangin sa kinabuhi nga dayon.

Sa pagtuman niini nga katuyoan sa Relief Society, ang Ginoo misugo sa kada sister ug sa organisasyon mismo sa:

Pagdugang sa hugot nga pagtuo ug personal nga pagkamatarung.

Paglig-on sa mga pamilya ug mga panimalay.

Paghatag og kahupayan pinaagi sa pagserbisyo sa Ginoo ug sa Iyang mga anak.

Mahimo nato kini nga buhat sa paagi sa Ginoo lamang kon kita magtinguha, modawat, ug molihok sa personal nga pagpadayag. Kon wala ang personal nga pagpadayag, dili kita molampos. Kon kita maminaw sa personal nga pagpadayag, dili kita mapakyas. Si propeta Nephi mitudlo nato nga ang Espiritu Santo mopakita nato sa “tanan nga mga butang unsay [atong] buhaton” (2 Nephi 32:5). Kinahanglan nga maminaw kita pag-ayo ug maghilom aron sa pagpaminaw sa tingog sa Espiritu.

Mga igsoong babaye, kita adunay importante nga tahas nga buhaton sa pagtabang nga matukod ang gingharian sa Dios ug sa pag-andam alang sa pag-anhi sa Ginoo. Gani, ang buhat sa Ginoo dili matuman kon wala ang tabang sa Iyang anak nga mga babaye. Tungod niana, ang Ginoo nagpaabut nga atong dugangan ang atong halad. Nagpaabut Siya nga atong tumanon ang katuyoan sa Relief Society nga wala pa sukad mahimo kaniadto.

Julie B. Beck, kinatibuk-ang presidente sa Relief Society.

Gikan sa mga Kasulatan

Deuteronomio 6:5–7; Lucas 10:30–37; Santiago 1:27; 2 Nephi 25:26; Mosiah 3:12–13

Gikan sa Atong Kasaysayan

Niadtong Hunyo 9, 1842, nga miting sa Relief Society, si Propeta Joseph Smith mitudlo sa igsoon nga mga babaye nga ang ilang kapunongan “dili lamang paghupay sa kabus, apan sa pagluwas sa mga kalag.”¹ Kini nga pamahayag sa usa ka espirituhanon ingon man usab sa temporal nga katuyoan nakahatag og timaan sa Relief Society sa tibuok kasaysayan. Niadtong 1906 si Presidente F. Smith (1838–1918) mitudlo: “Ang [Relief Society] dili lamang moatiman sa mga panginahanglanon sa kabus, sa masakiton ug sa mga timawa, apan kabahin sa iyang katungdanan—ug ang dakong bahin, usab—mao ang pagtan-aw sa espirituhanong kaayohan ug kaluwasan sa mga inahan ug sa anak nga mga babaye sa Zion; sa pagsiguro nga walay usa nga napasagdan, apan nga ang tanan nabantayan batok sa katalagman, kalamidad, sa mga gahum sa kangitngit, ug sa mga dautan nga naghulga kanila sa kalibutan.”² Niadtong 2001 si Elder M. Russell Ballard sa Korum sa Napulog Duha ka mga Apostoles mibalik-balik, “Ang matag igsoon nga babaye niini nga Simbahan kinsa nakahimo og mga pakigsaad uban sa Ginoo adunay balaan nga sugo sa pagtabang sa mga tawo, sa paggiya sa mga babaye sa kalibutan, sa paglig-on sa mga panimalay sa Zion, ug sa pagtukod sa gingharian sa Dios.”³

Paghulagway sa litrato pinaagi ni Christina Smith