Ua faaho‘i faahou mai Iesu Mesia i Ta’na Ekalesia i te mau mahana hopea nei.

E nehenehe ta outou e faaohipa i teie haapiiraa ei faaoaoaraa no te haapii atu â no ni‘a i te parau tumu a te Paraimere no teie ava‘e.

A feruri na te haere ra oe e imi haere i te hoê tao‘a. I hea oe e hi‘ohi‘o ai no te tao‘a ? Nahea oe e ite mai ai i te reira ? E afata anei ? Eaha ïa to roto ?

Te vai ra te tahi mau afata tei roto te tahi mau tao‘a piru e te moni. Tatou nei râ ei melo o Te Ekalesia a Iesu Mesia i te Feia Mo‘a i te Mau Mahana Hopea Nei, e tao‘a ta tatou tei rahi atu â te faufaa : o te evanelia a Iesu Mesia.

E rave rahi taata aita e ite nei no ni‘a i teie tao‘a, no reira te hoê o ta tatou ma hopoi‘a, o te faaiteraa ïa i te reira i te taata atoa e roaa ia tatou.

I muri mai te pohe o Iesu e o Ta’na mau aposetolo, ua mo‘e e aore râ, ua taui te tahi mau haapiiraa o te evanelia e te mau oro‘a faufaa mau.

Ua faaho‘i-faahou-hia mai teie mau tao‘a evanelia na roto i te peropheta Iosepha Semita. Ua fâ te Metua i te Ao ra e o Iesu Mesia ia Iosepha Semita i roto i te Uru Raau Mo‘a i to’na pureraa no te ite i te parau mau.

I muri iho, ua farii Iosepha i te mau papaa auro e ua iriti oia i te reira ei Buka a Moromona. Tei roto i te Buka a Moromona te mau haapiiraa e haafaufaa nei tatou no te mea, te faataa nei te reira i te mau parau mau i mo‘e na. E rave rahi haamaitairaa e farii nei tatou no te mea tei ia tatou nei te mau parau mau.

Auê ïa tao‘a faufaa mau teie !

Faahoho‘araa na Bryan Beach