I hea e roaa ai ia’u te hoê ve‘a mai teie ?
Sharon Rather, Nevada, te mau Hau Amui no Marite
I ni‘a te hoê tere to matou te utuafare mai Nevada, te mau Hau Amui no Marite, haere i Alaska, te mau Hau Amui no Marite, ua haamata vau i te hoê paraparauraa e te hoê vahine rahi e te nehenehe e te au i te parahiraa tapiri noa mai.
Ua ani mai oia e, te haere ra vau i hea, e ua pahono atu vau ia’na e, te haere ra matou i Juneau, i Alaska, no te farerei i ta maua tamaiti e to’na utuafare. Ua parau mai oia no Las Vegas oia. E i reira, ô mai nei te aau mihi, ua faaite mai oia e, te haere ra oia i Juneau no te farerei i to’na fetii hoovai e no te faatupu i te hoê pureraa haamana‘oraa no ta’na tane, ta’na i faaipoipo a 20 matahiti te maoro. No pohe noa mai oia i te ma‘i mariri aitaata.
Ua hi‘o noa vau ia’na ma te mana‘o e, e mea fana‘o roa ïa vau ua ite au i te opuaraa no te faaoraraa e ua riro vau ei rave ohipa i roto i te hiero no Las Vegas Nevada. Ua feruri au eaha râ ta’u e nehenehe e rave no te faateitei i to’na mana‘o.
I tera ra taime, mai te ta‘iraa oê, ua haamana‘o atura vau i te hoê faahitiraa a te peropheta Iosepha Semita ta’u i opere i roto i te Sotaiete Tauturu. I to’na faanahoraa i te Sotaiete Tauturu, ua faaite oia e e « ma‘ue atu ïa ratou no te tauturu i te taata ĕê ; e manii ratou i te hinu e te uaina i ni‘a i te mafatu mamae o te taata hepohepo ; e e tamaro ratou i te mau roimata o te otare e e faaoaoa ratou i te aau o te vahine ivi » (Te Mau Haapiiraa a te Mau Peresideni o te Ekalesia : Iosepha Semita [2007], 514).
Ua hi‘o faahou atura vau ia’na. Ua ite atura vau taua taata ĕê ra i roto i te oto, taua vahine ivi ra e te aau mauiui. Ua haamana‘o a‘era vau ua tai‘o vau i te Ensign i na mua a‘e i tera ra mahana. Tei roto te tahi mau parau ve‘a faateitei mau ta’u i mana‘o e horo‘a ia’na i te tahi faaitoitoraa e tamahanahanaraa.
Ua faaitoito vau, ua hohora i te ve‘a i te hoê parau pia ma te ani ia’na ia tai‘o i te reira. Ua hi‘o noa vau ia’na e ua maere au i te mea ua tai‘o oia i te mau reni tata‘itahi – ma te hinaaro mau. I te otiraa, ua tai‘o oia i te tahi faahou parau.
E au ra e, ua haaputapu ihoa te mea ta’na i tai‘o i to’na aau. Ua tuu oia i te ve‘a i to’na mafatu e ua tamărô i te pape mata.
« I hea e roaa ai ia’u te hoê ve‘a mai teie ? » Ua ani mai oia. Parau atura vau ia’na e, e nehenehe ta’na e tape‘a na’na te reira. E ua tai‘o faahou â oia.
I to matou taeraa i Juneau, ua haru mai oia i to’u rima, ua hi‘o i roto i to’u mata e ua parau mai, « Mauruuru ia oe ».
E haapiiraa rahi ta’u i haapii na roto i tera ohipa. Te faaatihia nei tatou e te taata ĕê ma te aau mauiui te hinaaro i te hoê parau mărû faaitoito e o te hinaaro ia ite mai i te mea ua ite tatou te Feia Mo‘a i te Mau Mahana Hopea Nei.