Te niuniu tei tupohehia
Seda Meliksetyan, Armenia
I te ava‘e mati 1997, a noho ai au i te oire ra no Rusia, o Rostov-on-Don, ua bapetizohia maua ta’u tane i roto i Te Ekalesia a Iesu Mesia i te Feia Mo‘a i te Mau Mahana Hopea Nei.
A tuatapapa noa ai au i te mau haapiiraa tumu o te Ekalesia, rahi roa o ta’u mau uiraa tei pahonohia. Ua faahiahia roa te haapiiraa no ni‘a i te opuaraa no te faaoraraa, na reira atoa te raveraa i te bapetizoraa no te feia pohe. Ua maere roa vau i te haapiiraa e, ua nehenehe ta tatou e bapetizohia no to tatou mau tupuna pohe.
Hoê matahiti i muri mai to maua bapetizoraa, ua titau te peresideni misioni ia maua ia faaineine no te haere i te hiero. Ei tuhaa faaineineraa no maua, ua haamata maua i te rave i te tuatapaparaa aamu matahiti. I te hoê mahana te feruri ra vau e rave i te reira ohipa, ta‘i mai nei te niuniu. O to’u metua hoovai. Ua ani au ia’na ua nehenehe anei ta’na e hapono mai i te hoê tapura no te hui tupuna pohe i te pae no ta’u tane. Ua maere roa oia e ua parau mai e, e ere te bapetizoraa no te feia pohe i te haapiiraa tumu na te Mesia, e mea râ ua hamani mai te mau Momoni. Aita vau i papû maitai nahea e pahono ia’na, aita ho‘i au i matau maitai i te mau papa‘iraa mo‘a e turu ra i teie haapiiraa tumu.
A feruri noa ai au nahea ia pahono, ua mutu atura te paraparauraa. Faaea maere noa vau hoê minuti ma papû ore e, eaha tei tupu, faaho‘i atura vau i te niuniu e haere a‘era i to’u piha. Ua rave atura vau i te Faufaa Apî i roto i to’u rima, ua tuturi no te pure e ua ani i te Metua i te Ao ra ia faaite mai tei hea te pahonoraa.
I te otiraa ta’u pure, ua iriti au i te Bibilia. E au, te parau nei te tahi taata ia’u ia tai‘o i te irava 29 i tera apî ta’u i iriti. Tei roto vau i te pene 15 no te Korinetia 1, te parau nei no ni‘a i te haapiiraa tumu no te bapetizoraa i te feia pohe.
Ua putapu e ua maere atoa vau i te mea e, ua pahono mai te Metua i te Ao ra i ta’u pure i tera ra taime. E mana‘o faahiahia mau.
Te feruri hohonu noa ra vau i teie ohipa e ta‘i faahou mai nei te niuniu. O to’u metua hoovai, ua ani mai oia no te aha te niuniu i mutu ai. Parau atura vau e, aita ta’u pahonoraa, ei reira, ani a‘era vau ia’na ia iriti i ta’na Bibilia e ia tai‘o i roto i te 1 Korinetia 15:29.
Maa mahana noa i muri mai, ua tae mai te hoê tapura o te fetii pohe i ni‘a i ta’u airaa maa. Ua tai‘o to’u metua hoovai i te papa‘iraa e i teie nei, te tiaturi ra oia e, ua haapii te Faaora, na roto i te aposetolo Paulo, i te haapiiraa tumu no te bapetizoraa o te feia pohe.
Ua fafau te Atua e rave rahi haamaitairaa faahiahia e rave i teie ohipa faaoraraa. Ua ite au e parau mau te reira.