Nahea vau i te iteraa
Ta’u titauraa no te faaoraraa
Faahoho‘araa na Roger Motzkus
Ei taure‘are‘a tamaroa, ua hahaere au na roto e rave rahi faaroo e ua tapitapi roa to’u mana‘o no to ratou haapiiraa taa ê, tera haapa‘oraa ta’na tatararaa o te papa‘iraa mo‘a. Aita vau i au i te faatura ore ua ite au i roto te tahi o ratou, e ua vaiho vau i te tamataraa ia ite mai i te pureraa e haere atu.
Tau matahiti i muri mai, te bapetizohia ra te hoê hoa no’u, o Cleiton Lima, i roto i Te Ekalesia a Iesu Mesia i te Feia Mo‘a i te Mau Mahana Hopea Nei. Aita oia i faaara mai noa’tu â, e hoa rahi maua, teie râ, a tere noa ai te tau, ua haamata vau i te ite mai i te mau tauiraa i roto ia’na. I te mau Sabati, e haere noa vau i to’na fare i te po‘ipo‘i ia ha‘uti maua i te ha‘uti tu‘e popo, aita faahou ïa oia i te fare ia haere atu vau. Piti e aore râ toru Sabati teie i te tupuraa. E i te hopea, ua parau mai Cleiton e, eita faahou e ti‘a ia’na e ha‘uti i te ha‘uti tu‘e popo i te mahana sabati no te mea te faatura ra oia i te mahana o te Fatu. Ua parau vau ia’na, « Te tû‘ino ra teie ekalesia i to oe feruriraa ».
E ua titau Cleiton ia’u ia haere mai i te pureraa. Ua haavare noa vau i te tahi ohipa no te mea te vai noa râ to’u au ore i te ohipa faaroo. 10 ava‘e to Cleiton afa‘iraa mai i te mau misionare no te haapii ia’u, ua ape noa râ vau e aore râ ua parau vau e ohipa ta’u. Aita râ oia i faaru‘e.
I te hoê mahana i te ava‘e tiunu, ua titau oia ia’u ia haere i te hoê oriraa a te Ekalesia. Ua ha‘uti au ia’na, « E pu‘e râ te maa e te tamahine ? » Ma te ata mai, ua parau mai oia e !
E ti‘a roa ia faaite e, ua horo te opu. Ua haere au i te fare pureraa e ua au roa vau. Fariihia mai na te taata atoa, e maa rahi ta’u i amu e ua anaanatae atura vau i te haere i te hoê pureraa. I to’u taeraa i te pureraa i te Sabati, e taata rahi ta’u i farerei e ua faaroo vau i to ratou mau iteraa papû. Aita roa vau i mâtau i te Buka a Moromona, ua putapu râ vau i te Varua o te Fatu a faaite papû noa ai te mau melo o te Ekalesia e, « Ua ite au e, e parau mau te Buka a Moromona, o teie te Ekalesia a Iesu Mesia, e e peropheta Iosepha Semita tei piihia e te Atua ». Aita a‘enei to’u mana‘o au mai te reira. Aita â vau i hinaaro roa ia farerei i te mau misionare, ua putapu roa râ vau i te iteraa papû i tera pureraa.
Te hepetoma no muri iho, ua titau faahou mai Cleiton ia’u ia haere i te pureraa. Aita ta’u i nehenehe, e titauraa ê ta’u. Ite roa vau i te oto i ni‘a i to’na mata a parau ai au ia’na e, aita i papû e nehenehe anei ta’u e haere.
Atira noa’tu, po‘ipo‘i Sabati, ua ara vau e te hiaai ia haere i te pureraa. Ua ara vau i hora 6:50, auê ïa fifi rahi no’u, e ua faaineine e ua tia‘i ia Cleiton ia haere mai. Ua hitimahuta oia i te iteraa ia’u e to’u ahu, te tia‘i noa ra. I tera Sabati, ua haapii te episekopo no ni‘a i te autahu‘araa. Puai to’u putapuraa i te Varua e ua tae te mana‘o e e ti‘a ia’u ia rave i te mau haapiiraa misionare. I te hopearaa o te pureraa Feia Apî Tamaroa, ua papû ia’u e, e bapetizohia vau.
I te otiraa te pureraa, ua parau vau ia Cleiton, « Ua hinaaro vau ia bapetizo ! »
Ua mana‘o oia te ha‘uti ra vau. E parau mai nei oia, « Ia pii atu vau i te mau misionare, e farerei oe ia raua ? » Ua pahono vau e.
Ua haapiihia vau e na misionare maitai mau. I to’u faarooraa i te parau no te Faaho‘i-faahou-raa mai, omua roa’tu te haapapûraa e, e ti‘a ia’u ia bapetizo. Ua hinaaro râ vau e ite no’u iho i te parau mau o te Buka a Moromona. Ua tapa‘opa‘o te mau misionare ia Moroni 10:3–5 i roto i ta’u Buka a Moromona ma te titau manihini ia’u ia pure e ia ani i te Atua e parau mau anei.
I te mahana no muri iho, i te pô, te haamana‘o ra vau e, aita â vau i tai‘o i te Buka a Moromona. Te haamatara ra ia tai‘o, puai roa te varua i roto ia’u. Ua pure au, e na mua vau i faaoti ai, ua ite au e, e parau mau te Buka a Moromona. Ua mauruuru roa vau i te Atua no to’na pahonoraa mai i ta’u pure. Ua bapetizohia vau i te ava‘e tiurai 2006.
I muri iho, ua tavini au au ei misionare i roto i te misioni no Brazil Cuiabá, e to’u hoa Cleiton, ua tavini ïa oia i roto i te misioni no Brazil Santa Maria. Ua rave maua maua te mea ta Cleiton i rave no’u : titau manihini i te taata ia haere mai i te Mesia ra ma te tauturu ia ratou ia farii i te evanelia i faaho‘i-faahou-hia ma te faaohipa i te faaroo ia Iesu Mesia, ma te tatarahapa, ma te bapetizoraa e ma te fariiraa i te horo‘araa i te Varua Maitai. Teie mau te e‘a i te faaoraraa.
E titau manihini na tatou i to tatou mau hoa e fetii ia haapii i teie evanelia, no te mea ua titau manihini te Faaora i te taata atoa a parau ai Oia e, « E haere mai outou ia’u nei » (Mataio 11:28). Ua ite au e, o teie te Ekalesia a Iesu Mesia e i teie nei te taime no te titau manihini i te mau taata atoa ia haere mai Ia’na ra.