Ua ite te mau misionare totauturu hou (feia apî) a te Ekalesia i te popou i roto i te taviniraa
Ua tamau o Elder Ernesto Sarabia i te hoê tareta misionare ereere i te mau mahana atoa o ta’na misioni. Ua taa ê roa râ ta’na piiraa misionare ia faaauhia i te tahi atu mau pu‘eraa—Ua tavini o Elder Sarabia ei misionare totauturu hou a te Ekalesia (MTHE) i te piha toro‘a misioni no Mexico Hermosillo.
« E inaha, ua ite tatou e, e ere paha i te mea paari no te tahi o ta tatou feia apî tamaroa e tamahine ia faaruru i te mau titauraa paari o te hoê misioni rave tamau », te parau ïa a Elder M. Russell Ballard no te Pŭpŭ no te Tino Ahuru Ma Piti Aposetolo. E ere râ, ia au i ta’na parau, te tumu eita’tura ta ratou e nehenehe e rave i te taviniraa misionare (« Hoê a‘e toe », Liahona, Me 2005, 69).
Ua parau o Elder Russell M. Nelson no te Pŭpŭ no te Tino Ahuru Ma Piti Aposetolo, « Ua riro te misioni ei ohipa taviniraa i te Atua e i te taata na roto i to oe iho hinaaro » (« A ani i te mau misionare ! E nehenehe ta ratou e tauturu ia outou ! » Liahona, Novema 2012, 18), e e rave rahi rave‘a no te pûpû i teie taviniraa.
No ratou tei haapaehia no te misioni rave tamau e ere no te hoê hape, e aore râ no ratou e ti‘a ia ho‘i oioi i te fare, e nehenehe i te faanahoraa no te MTHE e horo‘a ia ratou i te rave‘a no te tahi ohipa misionare.
Te mau titauraa no te tavini
E ti‘a i te mau MTHE ia vai maitai i te pae o te tino, te feruriraa, te varua e te manava no te rave i te mau hopoi‘a e au i ta ratou piiraa, e piiraa tu‘ati maitai ia ratou.
E haere te piiraa o te MTHE mai te 6 ava‘e i te 24 ava‘e e te mau taime taviniraa, e haere mai te piti mahana i te hepetoma hoê haere i te hepetoma taatoa. E rave‘a e vai ra no te tavini i rotopu i te huiraatira e aore râ i te fare. Teie te tahi mau tonoraa na te MTHE, te ma‘imiraa aamu utuafare, te tiaauraa roro uira, te tautururaa i te piha toro‘a o te misioni, te fare haaputuraa a te episekopo e te vai atu ra.
Te paturu a te utuafare e a te Autahu‘araa
E nehenehe i te mau metua, te feia faatere o te autahu‘araa e te mau melo o te Ekalesia e tauturu i te mau taata e tano ei MTHE ia faaineine no te tavini i te hoê misioni.
Ua riro te utuafare a Eliza Joy Young ei paturu rahi no’na, no te faahoro ia’na no te haere e no te ho‘i mai i te mau piha toro‘a a te Ekalesia i Sydney, Auteraria.
No Elder Michael Hillam e ohipa nei i te pû opereraa no Hong Kong, ua parau oia, « Na to’u mau orometua no te haapiiraa evaneliae te feia faatere no te Feia Apî Tamaroa i tauturu ia’u ia faaineine ».
Na te tusia e faatae mai i te mau haamaitairaa
No te tuahine Young, ua faatusia oia i ta’na mau mahana vata i ta’na ohipa afa mahana no te tavini i te hoê misioni totauturu na te Ekalesia. Ua parau oia, « Mea fatata a‘e vau i to’u Metua i te Ao ra no to’u iteraa e, te tauturu nei au Ia’na ».
Hau atu i te mau haamaitairaa pae varua, e horo‘a te misioni totauturu na te Ekalesia i taua na misionare hou i te tahi mau rave‘a i te pae no te sotiare e no te ohipa. « Na ta’u misioni i faaite mai ia’u e, ua nehenehe ia’u ia ohipa hope i ni‘a i te hoê toro‘a », ua parau te tuahine Young. (Na mua a‘e, ua rave noa oia i te toro‘a ma te tahi taata pee).
Noa’tu â e ere te feia apî paari atoa tei hinaaro i te tavini te fana‘o mai, ua rahi te tautooraa no te faafaana‘o i te feia apî paari atoa. Te feia apî tamaroa e tamahine tei hinaaro i te tavini i reira, e nehenehe ta ratou e paraparau i ta ratou episekopo e aore râ peresideni amaa, e na’na e hi‘o i te rave‘a tano no ratou.
A tai‘o rahi atu â i ni‘a i te news.lds.org ma te imi i te parau « young church-service missionaries ».