Tauturu i te mau tamarii ia faaineine no te bapetizoraa
E taime popouraa matamua te taime tamariiraa. Te taime matamua a taahi ai te pereoo, a haere ai i te haapiiraa e aore râ a tamatamata ai i te maa apî, te tahi noa ïa o te mau ohipa anaanatae e hamani nei i te oraraa tamarii. Ei taata paari, e rave‘a ta tatou no te tauturu i te mau tamarii i ni‘a i teie tere fâfâraa ta ratou. Ei taata paari i roto i te Ekalesia, e rave‘a atoa ta tatou no te tauturu ia ratou ia tupu i roto i te evanelia (hi‘o PH&PF 68:25). Eaha ta tatou e nehenehe e rave no te haapapû mai e, e riro te bapetizoraa o te hoê tamarii – te fafauraa matamua te hoê taata e rave i mua i to tatou Metua here i te Ao ra – ei ohipa nehenehe ma te auraa mau ?
« O te fâ tumu o teie Ekalesia te haapiiraa i te feia apî : na mua roa i te fare e i muri iho i te ekalesia », te haapii ra te peresideni Boyd K. Packer.1
I roto i te mau hi‘oraa i muri nei, te faaite ra te tahi mau metua nahea ratou i faaineine ai i ta ratou mau tamarii no te mau oro‘a mo‘a e te mau fafauraa mo‘a no te bapetizoraa e te haamauraa.
Ua haamata oioi maua
« Te matahiti e ti‘a te tamarii i te 7 matahiti, e taime faanahanaharaa te reira », te na reira ra Lori, e maha tamarii. No raua ta’na tane, e haapii raua i ta raua mau tamarii no ni‘a i te bapetizoraa mai te mahana matamua a fanauhia ai ratou. Noa’tu râ, ia ti‘a to te tamarii matahiti i te hituraa, e haamata ïa te utuafare i te tahi faaineineraa taa ê. E faatupu ratou, hoê taime i te ava‘e, i te hoê pureraa pô utuafare e te haapiiraa no ni‘a ïa i te hoê tumu parau e tu‘ati i te bapetizoraa, mai te mau fafauraa e te hi‘oraa a Iesu.
Te parau nei Lori e, te mea putapu roa, o te mau haapiiraa ïa no te ava‘e hopea e ti‘a atu ai te va‘uraa o te matahiti o te tamarii. E faaite oia i te mau tamarii te ahu i ni‘a ia ratou a topa ai ratou i te i‘oa e te haamaitairaa, e e parau oia no tera mahana ua tupu teie oro‘a.
« E taime tano roa no te tutonu i ni‘a i te mau fafauraa o te hiero », te faataa ra o Lori. « E haapa‘o taa ê ihoa matou e, ia haapiihia e, ua riro te ma‘itiraa e bapetizoraa ei taahiraa matamua no te faaineine no te mau haamaitairaa o te hiero ».
E faariro matou i te reira ei ohipa na te utuafare
Teie o Monica, e metua vahine e maha tamarii, te faaitoito nei oia ia faaô-atoa-hia mai te mau tamarii paari a‘e, ua ti‘a ana‘e, no te tauturu i te mau teina no te faaineineraa. « E riro te faarooraa i to ratou mau tuaana i te faaiteraa mai i to ratou iteraa papû e te mau ohipa i tupu i te faatae mai i te puai rahi a‘e », Te parau faahou nei Lori e, te tahi mau taime e ani ratou i te mau tamarii e faaineine ra no te bapetizoraa ia haapii atu ta ratou i apo mai i to ratou teina.
E faaohipa matou i te reira ei mauhaa misionare
I to te tamahine a Daniel ra‘eraa i te va‘u matahiti, ua ite oia e, e hinaaro oia e faaite atu i to’na mahana bapetizoraa i te tahi hoa e ere i te melo o te Ekalesia. No reira, ua faaoti to’na utuafare e faatae atu i te mau titauraa no to Allison bapetizoraa i te mau hoa haapiiraa e tera e ora ra i piha‘i iho i to ratou fare. Ua anihia i teie mau hoa e afa‘i mai i ta ratou mau irava au roa a‘e i roto i te Bibilia no te bapetizoraa. I muri mai i te bapetizoraa, ua reni Allison i taua mau irava ra i roto i ta’na mau papa‘iraa mo‘a apî ma te papa‘i atoa i te i‘oa o te hoa i te hiti.
« Parau mau ihoa ïa, no te utuafare, pauroa matou i te taeraa i taua mahana ra. Noa’tu râ, ua vai iho atoa matou ia’na ia haere e to’na mau hoa te tahi taime no te paraparauraa ia ratou i te mea ta’na i putapu », te na ô ra Daniel. « E taime haaputapu mau te hi‘oraa i ta maua tamarii e faaite ra i te hi‘oraa maitai ».
E faahoho‘a matou i te uiuiraa e te episekopo
Teie o Kimberly, e metua vahine o te tahi mau tamarii e fatata ra i te matahiti bapetizoraa, te haamana‘o ra oia a tomo ai oia i roto i te piha toro‘a a te episekopo no ta’na uiuiraa bapetizoraa i te va‘uraa o to’na matahiti. « Aita to’u feturiraa i hau roa ! » Te parau nei o Kimberley.
I teie nei râ, na’na ïa te tamataraa i te hi‘o e, eita ta’na mau tamarii e tupu i taua pe‘ape‘a ra. Na raua ta’na tane ïa te paraparauraa i ta raua na tamarii no ni‘a i te uiuiraa e te episekopo ma te ui atoa ia ratou i te mau uiraa no te bapetizoraa mai te huru ra e uiuiraa mau. Hau roa’tu â teie mau uiuiraa i te hoê noa haamâtauraa i te tamarii i te tereraa o te uiuiraa – e faaitoitoraa atoa râ i te mau tamarii ia feruri hohonu i ni‘a i te auraa mau o te fafauraa no te bapetizoraa.
E rave‘a faahiahia mau ta tatou
Oioi roa teie nau metua i te haapapû mai e, aita roa ratou i rave i te tahi ohipa tura‘i rahi roa i roto i te faaineineraa i ta ratou mau tamarii no te bapetizoraa e te haamauraa, teie râ ta ratou e faahiti, te parau no te « rave-maite-raa » e no te « rave-tamau-raa » ei faahoho‘araa no te mau haapiiraa ta ratou i horo‘a i tera na matahiti. « Ua haapapû maua e, ua taa maitai i ta maua nau tamarii e, e taahiraa rahi teie i roto i to ratou oraraa, e e ohipa rahi mau », te parau nei o Kimberly. « Ua hinaaro maua e haapapû e, na maua iho e faaineine ia ratou, eiaha pai te tiaturiraa noa e, na ta ratou mau orometua Paraimere e haapii atu ia ratou ».
Auê ïa taime faahiahia tei horo‘ahia mai no te tauturu atu i te mau tamarii ua here maua e faaineine no te bapetizoraa e i te haamauraa ! A rave ai matou i te reira ma te pure, e parahi mai te Fatu ia matou ra no te tarai i teie ohipa matamua rave fafauraa ei hoê niu papû no te tupuraa pae varua ananahi.
Te mau hoho‘a faahoho‘araa na John Luke, Craig Dimond, e Cody Bell