Te mau fafauraa o te hiero

A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org.

Te Faaroo, Te Utuafare, Te Totauturu

« E faufaahia te mau tusia atoa e te mau tautooraa atoa no te mau oro‘a faaoraraa e fariihia i roto i te hiero o te faati‘a ia tatou ia ho‘i i te hoê mahana i piha‘i iho i to tatou Metua i te Ao ra i roto i te hoê autaatiraa utuafare mure ore, e ia farii i te mau haamaitairaa e te mana no te ra‘i mai »,¹ ua na reira te peresideni Thomas S. Monson. Mai te peu aita â outou i haere i te hiero, e nehenehe ta outou e faaineine no te farii i te mau oro‘a mo‘a o te hiero, oia ho‘i ia :

Ti‘aturi i te Metua i te Ao Ra, ia Iesu Mesia e i te Varua Maitai.
Faatupu i te hoê iteraa papû no ni‘a i te Taraehara a Iesu Mesia e te evanelia tei faaho‘ihia mai.
Paturu e ia pee i te peropheta ora.
Titau i te hoê parau faati‘a no te hiero na roto i te vai viivii-ore-raa i te pae morare, te haapa‘oraa i te Ture no te Parau Paari, te aufauraa i te hoê tufaa ahuru ti‘a, e te oraraa mai te au i te mau haapiiraa a te Ekalesia.
Horo‘a i te taime, te mau taleni e te mau rave‘a no te tauturu i te patu i te basileia o te Fatu.
Rave i te ohipa aamu utuafare.²

Ua parau te peresideni Monson i muri iho, « Mai te mea e, e haamana‘o tatou i te mau fafauraa ta tatou e rave i roto [i te hiero], e ti‘a ïa ia tatou ia amo i te mau tamataraa atoa e ia upooti‘a i te faahemaraa tata‘itahi ».³

No roto mai i te mau papa‘iraa mo‘a

Te Parau Haapiiraa e te Mau Parau Fafau 14:7 ; 25:13 ; 109:22

No roto mai i to tatou aamu

« Hau atu i te 5.000 Feia mo‘a tei tomo atu i roto i te Hiero no Nauvoo i muri a‘e i te haamo‘araa…

Na te puai, te mana, e te mau haamaitairaa o te mau fafauraa no te hiero e paturu i te Feia Mo‘a i te mau Mahana Hopea nei i roto i to ratou tere, i te taime e faaruru ai ratou i te to‘eto‘e, te ve‘ave‘a, te po‘ia, te vêvê, te ma‘i, te mau ati, e te pohe.⁴

Mai te rahiraa o te mau tuahine no te Sotaiete Tauturu, ua tavini o Sarah Rich ei rave ohipa no te hiero. Te faati‘a ra oia i ta’na i ite : « Ahani e ere no te faaroo e te iteraa tei horo‘ahia mai i ni‘a ia matou i roto i taua hiero ra e… te Varua o te Fatu, ua riro ïa to matou tere mai te hoê ou‘araa i roto i te pouri … E faaroo râ to matou i to matou Metua i te Ao ra… to matou ti‘aturiraa… e e nunaa ma‘itihia matou… e ma te oto ore, ua hinaaro matou i te oaoa e, ua tae mai te mahana no to matou faaoraraa ».⁵

E ere te faaru‘eraa i te hoê « ou‘araa i roto i te pouri » no te mau tuahine faaroo a te Feia Mo‘a. Ua paturu ta ratou mau fafauraa hiero ia ratou.

The End of Parley Street, na Glen S. Hopkinson, eiaha e tapiti i te hoho‘a