Haapiipiiraa na te feia faatere o te ao nei—te hoê reni arata‘i apî

I te mau ava‘e i muri nei, e farii te mau melo o te Ekalesia na te ao atoa nei i te hoê reni arata‘i apî e te faaûru no te Haapiipiiraa na te feia faatere o te ao nei.

Te vahi taa ê ia faaauhia i te tahi atu mau haapiipiiraa, eita teie Haapiipiiraa na te feia faatere o te ao nei no teie matahiti e haapurorohia hoê noa a‘e haapiipiiraa na te feia faatere o te paroisa e te tĭtĭ. Tera râ, e tapûpûhia te reira ei iva tuhaa poto—i ni‘a i te hoê DVD e i ni‘a atoa ia LDS.org—no te faaitoito i te tauaraa parau i rotopu i te feia faatere atoa, te mau melo e te mau utuafare i te roaraa o te matahiti e haere mai nei e a muri atu.

Te tutonuraa o te haapiipiiraa, oia ho‘i te « Haapuairaa i te utuafare e te Ekalesia na roto i te Autahu‘araa » I roto i te haapiipiiraa, e horo‘a mai te mau melo no te Peresideniraa Matamua e te Pŭpŭ no te Tino Ahuru Ma Piti Aposetolo, na reira atoa te tahi atu mau Hui mana faatere e te mau ti‘a rahi, i te tahi arata‘iraa faaûru no ni‘a :

Nahea e itehia ai i te mau utuafare te puai e te hau i roto i te mana o te autahu‘araa.
Nahea i te tauturu i te mau utuafare atoa ia farii i te mau haamaitairaa no te autahu‘araa.
Nahea te feia e mau nei i te mau taviri no te autahu‘araa e haapuai ai i te mau fare e te mau utuafare.
Nahea i te tavini atu ia au i te huru Mesia.
Nahea i te atuatu i te mau tamarii i roto i te maramarama e te parau mau.

E farii te mau amuiraa atoa o te Ekalesia i te hoê DVD, e e titauhia te mau apooraa paroisa e te tĭtĭ ia hi‘o i te taatoaraa o te reira. Ei reira, e feruri amui ratou nahea i te tauturu i te mau melo o te paroisa e o te tĭtĭ ia fana‘o i teie arata‘iraa.

I roto i taua mau apooraa ra e taua mau piha haapiiraa ra, e nehenehe i te mau melo e mata‘ita‘i e e tauaparau i te mau tuhaa o te DVD. E nehenehe i te mau utuafare e i te taata hoê atoa ia mata‘ita‘i i teie mau tuhaa, na reira atoa te mau materia tauturu no te haamaitai i ta ratou tuatapaparaa, tei ni‘a ia wwlt.lds.org.

Noa’tu te vahi tuatapaparaa, te taime puai a‘e i roto i te haapiipiiraa, e tupu mai ïa ia oti te tuhaa i te mata‘ita‘ihia e ia haamata te tauaraa parau. A feruri noa ai te feia faatere, te mau melo e te mau utuafare ma te paraparau e ma te faaite papû i ta ratou i faaroo e i putapû, e faaûru te Varua Maitai ia ratou ma te haapii ia ratou nahea i te faaohipa i te arata‘iraa i roto i to ratou oraraa. Na roto i teie mau ohipa, e tauturu te Haapiipiiraa na te feia faatere o te ao nei i te haapuai i te mau utuafare e te Ekalesia na te ao atoa nei.

Te arata‘i ra o Elder L. Tom Perry, Elder Donald L. Hallstrom, e te episekopo Dean M. Davies i te hoê tauaraa parau no ni‘a i te faufaa ia faaohipa i te mau taviri no te autahu‘araa.

I rapae mai i te fare o Mary Fielding Smith i ni‘a i te mahora This Is the Place Heritage Park, te paraparau ra o Elder M. Russell Ballard, Linda K. Burton, Elder Ronald A. Rasband, Elaine S. Dalton, Rosemary M. Wixom e te episekopo Gary E. Stevenson no ni‘a i te mau haamaitairaa ia vai te autahu‘araa i roto i te mau fare atoa.