Eaha ta tatou e tiaturi nei
Na te Varua Maitai e tamahanahana, e faaûru e e faaite papû
Ua riro te horo‘araa i te Varua Maitai i te hoê o te mau haamaitairaa rahi roa a‘e ta tatou e nehenehe e farii i roto i te oraraa, i te mea ho‘i na te Varua Maitai e tamahanahana, e faaûru, e faaara, e tamâ e e arata‘i ia tatou. E ti‘a Ia’na « i te faaî ia tatou i te tia‘i e te aroha mau » (Moroni 8:26). Te haapii mai nei Oia i « te parau mau i te mau mea atoa ra » (Moroni 10:5). E mea na roto i te Varua Maitai tatou e farii ai i te heheuraa e te mau horo‘a pae varua no ô mai i te Atua ra. E hau atu â, e mea na rato i te Varua Maitai tatou e farii ai i ta tatou mau iteraa papû no te Metua i te Ao ra e no Iesu Mesia.
Na mua a‘e i to outou bapetizoraa, ua nehenehe ia outou i te putapu i te Varua Maitai i tera e tera taime. E mea na roto ana‘e râ i te fariiraa i te horo‘araa i te Varua Maitai i muri mai to outou bapetizoraa outou e nehenehe ai e fana‘o i te hoaraa tamau o te Varua Maitai, ia vai ti‘amâ outou. Mea horo‘ahia mai teie horo‘a na roto i te hoê taea‘e e mau nei i te Autahu‘araa a Melehizedeka na roto i te tuuraa rima (hi‘o Te Ohipa 19:6 ; PH&PF 33:15). Mai te reira â mahana, i te mau Sabati atoa, ua nehenehe ia outou e faaapî i ta outou mau fafauraa no te bapetizoraa a rave ai outou i te oro‘a mo‘a, e a farii ai i te haamaitairaa a te Fatu e, e « vai noa To’na Varua » i roto ia outou (PH&PF 20:77).
Te Varua Maitai, tei pii-pinepine-noa-hia te Varua, o te melo toru ïa no te Atuaraa. Ua haapii te peropheta Iosepha Semita e : « E tino i‘o e te ivi to te Metua mai te au iho i to te taata nei te huru ; e te Tamaiti atoa hoi ; area râ o te Varua Maitai râ, aore ïa to’na e tino i‘o e te ivi, tera râ e tino varua oia. Ahiri aita ra, e ore roa ïa e ti‘a i te Varua Maitai ia parahi i roto ia tatou nei » (PH&PF 130:22).
« No te mea e ore te Varua o te Fatu e vai i roto i te hiero viivii ra » (Helamana 4:24), e mea ti‘a roa ïa ia vai ti‘amâ tatou no To’na hoaraa. E na reira tatou na roto i te mau mana‘o paieti, te oraraa parau-ti‘a e te imiraa ia haapa‘o i te mau faaueraa, teie rii ïa te tahi mau mea.
I muri mai i te fariiraa i te horo‘araa i te Varua Maitai, e rave rahi ohipa ta tatou e nehenehe e rave no te titau i Ta’na faaûruraa i roto i to nei oraraa :
-
E pure.
-
E tuatapapa i te mau papa‘iraa mo‘a.
-
E rave i te oro‘a ma te ti‘amâ.
-
E haamori i roto i te hiero.
-
E mata‘ita‘i i te mau haapareraa maitai, e reo i te parau mâ e e tape‘a i te mau mana‘o paieti.
Hoho‘a faahoho‘araa na Christina Smith, Eve Tuft, Cody Bell e Matthew Reier