Ite mai i te oaoa i roto i te oraraa
Karen Rockwood, Idaho, te mau Hau Amui no Marite
I te hoê taime, te tai‘o ra vau i te hoê a‘oraa no te amuiraa rahi na Elder Richard G. Scott no te Pŭpŭ no te Tino Ahuru Ma Piti Aposetolo. Noa’tu â ïa ua faaroo e ua tai‘o vau i te reira a‘oraa na mua’tu, ua haru mai to’u feruriraa i te hoê pereota e ua vai noa te reira i roto i to’u mana‘o.
Maa hora i muri mai, teie ta’u tamaiti, te ora ra oia i roto i te hoê piha tarahu e te tahi mau hoa, ua haere mai e hi‘o ia matou. Ua tavini oia i te hoê misioni rave tamau e ua haere i te haapiiraa tuatoru no te tahi maa ava‘e. Aita oia i papû i te avei‘a e rave no ta’na haapiiraa na reira atoa i te toro‘a e titau atu. No to’na mauruuru ore e te mana‘o e, ma‘ua te haapiiraa i teie nei, e ma‘ua atoa te taime e te moni, ua haapae oia i ta’na haapiiraa e ua rave i te ohipa.
Ua parau mai oia e, ua tuu mai te tahi hoa to’na i te mana‘o e haere i te hoê motu no Bahamas e aore râ no te Caraïbes, e rave i te ohipa e e arearea no te tahi maa ava‘e. Anaanatae maitai ta’u tamaiti i teie opuaraa. Ua taa maitai ia’u e, e mea faahinaaro mau teie huru ohipa faaohie na te hoê taure‘are‘a tamaroa.
I reira, ua puta mai to’u mana‘o i te poro‘i faaûru a Elder Scott. Rave atura vau i te Ensign e ua tai‘o i te mea i muri nei i ta’u tamaiti : « Tei ô nei outou i ni‘a i te fenua nei no te hoê opuaraa hanahana. E ere no te faaarearea-noa-raa e aore râ no te imi-tamau-noa-raa i te hinaaro o te tino. Tei ô nei outou ia tamatahia, ia faaite i to outou faito ia ti‘a ia outou ia farii i te mau haamaitairaa hau ta te Atua e tape‘a ra no outou. E mea ti‘a roa te ohipa tamărû a te faaoromai » (« Finding Joy in Life », Ensign, Me 1996, 25).
Aita oia i parau faahou, ua rave ta’u tamaiti i te ve‘a, ua haere atu e ua tai‘o i te a‘oraa taatoa. I muri mai, ua parau noa mai oia e, eita oia e tomo atu i roto i te tere-ori-raa na te mau motu.
E i te hoê mahana, ua tomo oia i roto i te aua faaineineraa muto‘i, e na te reira e‘a to’na iteraa i ta’na vahine no muri iho. Ua faaipoipo raua i roto i te hiero no Mesa Arizona e i teie mahana, e toru tamarii maitai ta raua. I te matahiti 2010, ua faaoti ta’u tamaiti i ta’na parau tu‘ite « bachelor » ma te « ite mai i te oaoa i roto i te oraraa ».
Ahani pai, e riro ihoa paha ïa ta’na tere ori ei ohipa anaanatae ; i te tahi pae, ua nehenehe atoa i te reira ia riro ei haamata‘uraa pae varua. Te taime atoa e feruri au i teie ohipa, e haaputapu noa te Varua i to’u aau.
Ua maruuru roa vau no te mau parau a te mau peropheta e te mea atoa, ua faaûruhia vau no te haamana‘o i te hoê a‘oraa tei tauturu ia’u ia horo‘a i te tahi arata‘iraa. Ua mauruuru atoa vau e, ua farii ta’u tamaiti i te poro‘i a te Fatu ma te faati‘a i te Varua ia faaûru ia’na. Ua ite au e, e rave rahi haamaitairaa e rave‘a aroha tamărû e tae mai ia faaroo tatou e ia pee ho‘i i te mau haapiiraa a te Faaora e a Ta’na mau tavini.