Inu i te pihaaraa vai

Na Aaron L. West

Papa‘i ve‘a faatere, te pû Publishing Services a te Ekalesia

O Iesu Mesia te pihaaraa vai o te pape ora.

Ia paraparau tatou no te nehenehe o te mau hiero, e faahiti tatou i te mau pou, te mau maramarama e te mau papa‘i. E parau tura tatou no te mau vahi bapetizoraa, te mau piha oro‘a, te mau piha taatiraa e te mau piha tiretiera.

Ia haamo‘a râ te hoê peropheta i te hoê hiero o te Fatu, e haamo‘a oia i te paturaa atoa, eiaha noa te mau mea nehenehe ta te mau taata e ite mata ra. I roto i te pure haamo‘araa no te hiero no Kansas City Missouri, ua parau te peresideni Thomas S. Monson : « Te haamo‘a nei matou i te tahua e ti‘a nei teie hiero. Te haamo‘a nei matou i te mau tuhaa atoa o teie paturaa nehenehe, mai te papa tumu te ite-ore-hia nei e tae atu i te hoho‘a no Moroni i ni‘a roa ».¹ I to te peresideni Joseph Fielding Smith faahitiraa i te pure haamo‘araa o te hiero no Ogden Utah, ua haamo‘a oia i « te papa tumu, te mau papa‘i, te mau tahua, to ni‘a, te pare e te mau vahi atoa o te fare », e ua pure oia no te paruru i ni‘a i « te mau tuhaa matini, te mau apoo mori e te mau tamauraa, te mau puhiraa matai e te mau pai‘umaraa, e te mau mea atoa i roto i te fare ».²

Ua mauruuru vau i te mea ua faaûru te Fatu i Ta’na mau peropheta ia haamo‘a i te mau tuhaa atoa o te mau hiero. Noa’tu â pai, aita te hinere uputa e aore râ te tamauraa mori i te mea faufaa roa mai te hoê fata i roto i te piha taatiraa, e tauturu noa ra teie mau ohipa rii hu‘ahu‘a i te opuaraa hopea e te faateitei o te hiero.

Hoê o teie mau ohipa rii hu‘ahu‘a tei tauturu ia’u ia haapii mai i te hoê haapiiraa mure ore. I te hoê mahana, tei roto vau i te hiero no Roto Miti, te faaineine ra ia faaru‘e i te piha tauiraa, ua oti te hoê oro‘a no te feia pohe. Ua mau to’u mata i ni‘a i te pihaaraa vai, e ua tae mai te mana‘o poiha, e no reira, ua pi‘o atu vau no te inu. Ua tae mai te hoê poro‘i i roto i to’u feruriraa :

Te inu ra oe i teie pape i roto i te hiero, teie nei râ, te inu mau nei anei oe i te pape ora e vai ra i ô nei ?

Aita te reira i riro ei tama‘iraa teimaha – e faahaparaa mărû rii noa e te uiraa tei puta i roto i to’u aau.

Ta’u pahono i teie uiraa, e aita ïa. Aita vau e inu hoê ra i te pape ora o te hiero. E tano ihoa ia faî e, tei te vahi ê roa to’u mana‘o tahi minuti rii noa na mua’tu a farii ai au i te mau oro‘a no te feia pohe. Noa’tu â, ua rave au i te hoê ohipa maitai no te feia i hinaaro i ta’u tauturu, aita râ vau i tuu ia’u ia farii i te tauturu ti‘a no’u.

I teie nei, i te mau taime atoa e haere au i te hiero, e hi‘o vau i te hoê pihaaraa vai e e tape‘a vau no te inu. E ui au ia’u iho eaha te hohonuraa no to’u inuraa i te pape ora mai te pihaaraa vai ra. Ta’u pahonoraa : aita â to’na hohonuraa mau. Noa’tu râ, te rahi noa nei to’u poiha.