Te mana o te Taraehara

Ioriti Taburuea, Kiribati

I to te mau misionare haapiiraa ia’u, te tumu parau rahi no ta ratou mau haapiiraa, no ni‘a noa ïa ia Iesu Mesia e Ta’na Taraehara. Ua tatara mai ratou e, e tao‘a horo‘a te Taraehara na Iesu Mesia no tatou paatoa. E tao‘a horo‘a ta tatou e nehenehe e faaohipa i roto i to tatou oraraa o te mau mahana atoa ia faaruru tatou i te mau tamataraa e aore râ ia hara tatou. Na te mana o te Taraehara e faateitei, e rapaau e e tauturu ia tatou no te ho‘i mai i te e‘a afaro e te pirihao e arata‘i nei i te ora mure ore.

A faaite noa mai ai te mau misionare i te reira, e mana‘o puai tei faaite mai ia’u e, e parau mau te reira, e ua faaoti au e tomo i roto i te Ekalesia.

I muri iho, ua faaoti atoa vau e tavini i te hoê misioni no te mea ua hinaaro vau e tauturu i te tahi mau pu‘eraa no ni‘a i taua tao‘a horo‘a faahiahia ra. Na roto i te haapiiraa e te faaiteraa i te Taraehara, ua ite au ia vetahi ê i te tauiraa i te huru oraraa apî. Ua tae mai te tauiraa hope, eiaha noa na roto i te faarooraa no ni‘a i te Taraehara, na roto atoa râ i te faaohiparaa i te reira i roto i to’u oraraa.

Ua ite au e, e parau papû te Taraehara. Ia titau tatou i te reira mana i roto i to tatou oraraa, noa’tu te ohipa e faaruruhia nei, e haapa‘ohia te mau mea atoa e e tupu mai te oaoa.