No te aha to tatou hinaaro i te Buka a Moromona
Faahoho‘araa na Bryan Beach ; video capture © 2001 IRI
E ani paha te tahi mau taata ia outou e, no te aha to tatou hinaaro i te Buka a Moromona, te vai nei ho‘i te Bibilia. Te parau mau, ua faaite papû Iesu Mesia e, e tupu mai te reira (hi‘o 2 Nephi 29:3). E rave rahi tumu no te aha e mea faufaa te Buka a Moromona i to tatou anotau (ei hi‘oraa, hi‘o 2 Nephi 29:7–11). Teie rii noa te tahi maa tumu no te aha e mea faufaa mau.
Te tahi faahou ite no Iesu Mesia
Te faaite ra te mau papa‘iraa mo‘a ia tatou i te hoê hoho‘a faanahoraa no te faaohiparaa i te mau ite rau no te faati‘a i te parau mau i roto i te Ekalesia a te Mesia. E afa‘i mai te Buka a Moromona i te ite piti tapiri i te Bibilia ei iteraa papû no ni‘a i te Mesia. No Elder Mark E. Petersen (1900–84) no te Pŭpŭ no te Tino Ahuru Ma Piti Aposetolo, ua parau oia e, « Te tumu matamua roa no te fana‘oraa i te Buka a Moromona, oia ho‘i ïa, mea na roto i te reo o na ite e piti e aore râ toru te mau mea atoa e faati‘ahia ai. (Hi‘o 2 Kor 13:1.) Te vai nei te Bibilia ; te vai atoara te Buka a Moromona. Ua riro raua na reo toopiti – e piti buka papa‘iraa – no roto mai e piti nunaa tahito e te taa ê, toopiti atoa e faaite papû nei no te huru atua o te Fatu ia Iesu Mesia ».1 Ua parau faahou mai te peresideni Ezra Taft Benson (1899–1994), « Eiaha e mo‘ehia ia tatou e, na te Fatu Iho i horo‘a mai i te Buka a Moromona ei ite matamua No’na ».2
Te îraa o te Evanelia
Ua ite tatou e, « te reira mau mea papû ra e te faufaa, o tei iriti-ê-hia mai roto i te » Bibilia na roto i te mau tau (1 Nephi 13:40). Te haapapû nei te Buka a Moromona i te haapiiraa tumu a te Mesia ma te afa‘i faahou mai te îraa o te evanelia i ni‘a i te fenua nei (hi‘o 1 Nephi 13:38–41). Ei hi‘oraa, te tauturu nei te Buka a Moromona ia tatou ia ite e, e ti‘a i te bapetizoraa ia ravehia ma utuhi i raro i te pape (hi‘o 3 Nephi 11:26) na reira atoa, aita e titauhia ia bapetizohia te mau tamarii rii (hi‘o Moroni 8:4–26).
E papa nui no te Ekalesia tei faaho‘i-faahou-hia mai
Ua haapapû Iosepha Semita e, o te Buka a Moromona te « ofa‘i fana no to tatou faaroo ».3 Ua ite ana‘e tatou i te reira, eita atura ïa tatou e tapitapi te mana‘o i te tu‘atiraa o te faanahoraa o Te Ekalesia a Iesu Mesia i te Feia Mo‘a i te Mau Mahana Hopea Nei i te 6 no eperera 1830, 11 noa mahana i muri mai te puhara-matamua-raa te Buka a Moromona ei buka hoo i te 26 no mati 1830. Aita te Ekalesia i faanahohia e tae roa mai te ineineraa o te papa‘iraa ofa‘i fana no ta’na mau melo.
E haamaitairaa i roto i to tatou oraraa
No ni‘a i Buka a Moromona, ua haapii Iosepha Semita e, « e haafatata’tu te hoê taata i te Atua na roto i te haapa‘oraa i ta’na mau faaueraa i te tahi noa’tu buka ».4 E mana to te reira no te taui i te oraraa – i to outou atoa e i to te feia ua horo‘a outou i te Buka a Moromona. No te peresideni Henry B. Eyring, Tauturu Matamua i roto i te Peresideniraa Matamua, ua faaite papû oia e, « E mea papû râ te mana o te Buka a Moromona i ni‘a i to outou huru taata, to outou mana e to outou itoito ia riro ei ite no te Atua. E faateitei, e arata‘i e e faaitoito te haapiiraa tumu e te mau hi‘oraa itoito i roto i taua buka ra ia outou … E faatupu ïa te tai‘oraa i te Buka a Moromona na roto i te pure i te faaroo i te Atua te Metua, i Ta’na ra Tamaiti Here, e i Ta’na ra evanelia. E faatupu ïa te reira i to outou faaroo i te mau peropheta a te Atua, no mutaa ihora e no teie anotau … E nehenehe te reira e haafatata’tu ia outou i te Atua hau atu i te tahi atu buka. E nehenehe te reira e haamaitai atu â i te hoê oraraa ».5
Te mau haapiiraa no te Sabati
Te parau tumu no teie ava‘e : Te Taivaraa e te Faaho‘i-faahou-raa mai