Haro‘aro‘a i te bapetizoraa

Na Marissa Widdison

Te mau ve‘a a te Ekalesia

Na vai e bapetizo ia’u ?

Noa’tu te taata e bapetizo ia oe, e ti‘a ia mau ia’na te autahu‘araa – te mana no te rave i te ohipa na roto i te i‘oa o te Atua. I to Iesu hinaaroraa ia bapetizohia Oia, ua haere Oia ia Ioane Bapetizo ra, tei ia’na ra ho‘i te autahu‘araa (hi‘o Mataio 3:13).

Te taata e bapetizo ia oe, e faati‘araa ta’na mai to oe espisekopo e aore râ peresideni amaa.

E mea titau anei ia tomo vau i raro i te pape no te bapetizoraa ?

Ua bapetizo-utuhi-hia Iesu, te auraa ra, ua tomo roa Oia i raro i te pape e ua ti‘a faahou mai (hi‘o Mataio 3:16). Mai te reira atoa oe ia bapetizohia. Ia bapetizohia ana‘e tatou mai teie te huru, e haamana‘o tatou e, te faaru‘e ra tatou i to tatou oraraa tahito i muri ia tatou ma te haamata i te hoê oraraa apî pûpûhia i te taviniraa i te Atua e i Ta’na tamarii.

Eaha te mau fafauraa ta’u e rave nei ia bapetizo vau ?

Ia bapetizohia ana‘e oe, e fafauraa ta oe e rave, oia ho‘i e faaauraa piti pae, e te Metua i te Ao ra. E fafau oe Ia’na e rave oe i te tahi mau ohipa, e e fafau Oia ia oe i te haamaitairaa. Te vai ra te tatararaa no teie fafauraa i roto i te mau pure oro‘a te faahitihia nei i te mau Sabati atoa (hi‘o PH&PF 20:77–79). Ta oe fafauraa :

Haamana‘o ia Iesu Mesia.
Haapa‘o i Ta’na mau faaueraa.
Rave i ni‘a ia oe i te i‘oa o te Mesia, te auraa ra, e faariro i Ta’na ohipa ei numera hoê i roto i to oe oraraa e e rave i Ta’na hinaaro eiaha râ i to teie nei ao.

A haapa‘o noa ai oe i teie fafauraa, e fafau mai te Metua i te Ao ra e, e parahi te Varua Maitai ia oe ra e e faaorehia ta oe mau hara.

Eaha te Varua Maitai ?

Te horo‘araa i te Varua Maitai, o te hoê ïa horo‘a tao‘a rahi roa a te Metua i te Ao ra. Eita ta oe bapetizoraa pape e oti roa maori râ e horo‘a te mau taea‘e e mau nei i te Autahu‘araa a Melehizedeka i te hoê haamaitairaa no te farii i te Varua Maitai (hi‘o Ioane 3:5).

E tino te Varua Maitai no te Atuaraa. E faaite papû Oia no te Metua i te Ao ra e no Iesu Mesia e e tauturu Oia ia tatou ia ite i te parau mau. E tauturu Oia ia tatou ia haapuai i te pae varua. E faaara Oia ia tatou no te mau ohipa ino. E tauturu Oia ia tatou ia haapii mai. E nehenehe i te Varua Maitai ia tauturu ia tatou ia putapu i te here o te Atua.

Ua haamauhia ana‘e oe ei melo o te Ekalesia, e nehenehe atura i te Varua Maitai e parahi noa ia oe ra mai te peu e ma‘iti oe i te maitai.

No te aha e ti‘a i to’u matahiti ia ra‘ehia te va‘u matahiti ?

Te haapii nei te Fatu e, eiaha te mau tamarii ia bapetizohia e tae roa ua nava‘i to ratou paari no te maramarama i te taa-ê-raa i rotopu i te maitai e te ino, e i roto i te mau papa‘iraa mo‘a, o te va‘u matahiti ïa (hi‘o Moroni 8:11–12 ; PH&PF 29:46–47 ; 68:27).