E fifi i roto i to’u manureva
Craig Willie, Utah, te mau Hau Amui no Marite
I te hoê pô, te faatere ra vau i to’u manureva, ua î te horopatete, te tomo ra matou i ni‘a i te reni faarevaraa, ua puta mai te mana‘o e, e fifi te vai ra i roto i te rave‘a faatipuuraa o te manureva. No te haapapû i te faaûruraa o to’u varua, ua faaatea vau mai te reni tereraa e ua faatipuu vau i te manureva, e faaohu roa (360 degrés). E au ra e, aita e ohipa ino.
Ua feruri au, « E faareva anei no te faauta ti‘a i te mau horopatete i to ratou tapaeraa, e aore râ e ho‘i anei i te vahi pouraa ? » Ua ite roa vau e, ia ho‘i matou e taere rahi ïa te hopea. Hoê noa ho‘i avei‘a i ni‘a i te reni tereraa ; E tia‘i faahou ïa vau i te fare hi‘opo‘a faarevaraa ia faanaho mai i te hoê taime faarevaraa i roto i te apaparaa manureva. E ia oti, e tia‘i matou i te feia tâtâî no te hi‘opo‘a i te manureva. E riro atura ïa i te taime pau i te faatupu i te fifi i te taiete manureva, e te mau horopatete te reva ra no te tapae i te hoê apooraa e aore râ te tahi atu faarevaraa. Ua feruri atoa vau eaha ra ta te tuhaa tâtâîraa e parau mai ia faaite atu vau e, e fifi i roto i te manureva e aita râ e tapa‘o faaite i te reira maori râ te hoê mana‘o puai.
Ei tomana no te manureva, o vau te ti‘a haapa‘o i to matou nei maitai, no reira ua faaoti au e pee i te faaûruraa e ho‘i mai.
I to matou tapaeraa i te vahi pouraa, ua parau vau i te raatira huira (mécanicien) e, te vai nei to’u mana‘o puai e, e fifi i roto i te manureva aita râ vau i ite eaha ra. Aita oia i tiaturi e, e fifi e vai ra.
« No te puromu rarirari noa paha te fifi », ua parau mai oia. « Ua hee rii noa paha oe i ni‘a i te tâ ». Noa’tu râ, ua farii oia e hi‘opo‘a i te rave‘a tipuuraa o te muaraa. Ua hi‘opo‘a oia i te reira, e ua ani a‘era ia’u ia haapou i te mau horopatete ia nehenehe ia’na ia faahaere i te manureva no te tahi tamatamataraa.
I to’na ho‘iraa mai 30 minuti i muri mai, ua pe‘ape‘a roa oia. I roto i te mau tamatamataraa, ua faaroo oia i te tahi maniania, ta‘i mai e faaea, ta‘i mai e faaea. I to’na taumiraa te « frein » no te tipuu mai e ho‘i i te vahi pouraa, aita i mau te manureva ia’na e fatata i te hee roa atu i rapae i te reni tereraa.
I te faahohonuraahia te hi‘opo‘araa, ua itehia mai e, aita te mau « frein » i hi‘o-maitai-hia i te pô na mua’tu. Ahani e ua faatau vau i te manureva i to matou rereraa, aita ïa te « frein » e mau mai e aita atura ïa te manureva e mau mai ia’u.
Ua horo‘ahia mai te tahi manureva no te faatere, e ua faatae au i ta’u mau horopatete i to ratou tapaeraa e toru hora te taere.
Ua oaoa roa vau e, ua faaroo vau i te muhumuhu o te Varua. Ua ite au e, e arata‘i mai te Varua ia tatou mai te peu e imi tatou i te arata‘iraa a te Fatu e e faaroo tatou i te mau faaûruraa e tae mai.