Te pahonoraa i te piiraa no te tahi atu â mau misionare : Aupuru i te feruriraa misioniare i te fare e i te fare pure
Teie te episekopo Victor Nogales no te paroisa no Parque Chacabuco, i roto i te tĭtĭ no Buenos Aires Argentina Congreso, te parahi ra i mua i te tabula piaraa parau, ua po‘i i na hoho‘a 37 o te feia apî tamaroa e tamahine no ta’na paroisa. Ia reva te hoê o ratou i te misioni, e tuu oia i te tahi parau i piha‘i iho i te hoho‘a.
« Anaanatae roa ta’u feia apî ia tomo mai ratou i roto i ta’u piha toro‘a e ia ite ratou i te mau hoho‘a e te mau parau », ta’na ïa i parau. « Ua faaitoito te reira ia ratou ia faaineine no ta ratou misioni ».
E hi‘oraa mau teie paroisa no Buenos Aires no te varua o te ohipa misionare. I roto i na ava‘e matamua e ono no 2012, 19 taure‘are‘a—14 melo faafariu—tei faaru‘e i to ratou fare no te tavini i te misioni i roto e va‘u fenua. Hau i te 80 i ni‘a i te hanere o te taure‘are‘a e tano no te misioni tei fafau ia ratou iho ia tavini i te hoê misioni.
I roto i te mau matahiti i ma‘iri, ua tuu te feia faatere o te Ekalesia e rave rahi titauraa ia tavini te hoê numera rahi o te feia apî i te misioni.
I te amuiraa rahi no eperera 2005, no tuu noa mai ra te Ekalesia i te buka Ia Poro Haere i Ta‘u nei Evanelia: Te hoê arata‘i no te ohipa misionare, ua a‘o o Elder M. Russell Ballard no te Pŭpŭ no te Tino Ahuru Ma Piti Aposetolo i te mau utuafare e te feia faatere ia aupuru i te hoê varua misionare ma te faaineine rahi a‘e i te feia apî tamaroa e tamahine ia tavini maitai a‘e na roto i te tautururaa ia ratou ia maramarama o vai ratou e na roto i te haapiiraa ia ratou i te haapiiraa tumu (hi‘o « Hoê a‘e toe », Liahona, Me 2005, 69).
Ua riro te parau faaara a te Peresideni Thomas S. Monson i te amuiraa rahi no atopa 2012 ia faatopahia te matahiti ti‘a no te misionare, ei faahaamana‘oraa e, te haapeepee nei te Fatu i Ta’na ohipa.
I teie mahana, e rave rahi utuafare e feia faatere o te Ekalesia e tape‘a nei i teie mau parau i to ratou aau ma te faati‘a i te taviniraa misionare ei peu i to ratou mau vahi.
Tauturu i te feia apî ia maramarama o vai ratou
Ei pahonoraa i te uiraa, « Nahea outou i te manuiaraa i te faaineine i na feia apî iti rahi no te faatupu i te hinaaro ia tavini ? » Ua pahono te episekopo Nogales, « I to’u pii-raa-hia ei episekopo, o te feia apî no ta’u paroisa ta’u mana‘ona‘oraa matamua, e ua faaara papû vau i te tahi atu mau feia faatere o te paroisa e, e ti‘a ia matou ia riro ei tuhaa no to ratou oraraa ».
Te hoê hi‘oraa, pauroa te mau misionare no Chacabuco, e piiraa to ratou i roto i te paroisa na mua a‘e i to ratou revaraa. Pinepine roa te mau melo faafariu apî e te mau melo paruparu i te anihia ia tavini ei orometua, na te reira i tauturu ia ratou ia faaineine no te haapii i te evanelia.
Ua faanaho atoa te episekopo Nogales ia faaineine te feia apî i te pae varua no te hoê misioni na roto i te haereraa na muri i te mau misionare rave tamau i to ratou vahi.
A fafau noa ai te feia faatere e te mau melo ia ratou iho i te feia apî o te paroisa, ua haamaitaihia ratou na roto i te iteraa i te varua misionare i te tupuraa i te rahi roa ino.
Te hoê utuafare feruriraa misionare
Ua taa maitai ia Garth raua o Eloise Andrus no Draper, Utah, i te mau Hau Amui no Marite te auraa no te utuafare feruriraa misionare. E 17 mootua tamaroa ta raua tei tavini i te hoê misioni, e ua tavini atoa raua e ono misioni.
Te aupururaa i te varua no te taviniraa misionare i roto i to outou utuafare, o te hoê mea ïa e haamata mai te taime mai â ua apî te mau tamarii, te parau nei te taea‘e Andrus.
Hoê â mana‘o to te tuahine Andrus. « Eita oe e reva no te hoê misioni mai te hoê tia‘iraa mu noa, e paraparau oe i ta oe mau tamarii e mootua no ni‘a i te reira mai te huru ra e, e ere faahou i te hoê uiraa—afea oe e reva ai i ta oe misioni, e aore râ e reva anei, » te parau ra oia.
E mea faufaa atoa te haapiiraa i te feia apî e, o vai ratou na roto i te faaiteraa i te hi‘oraa no te taviniraa misionare. Ua farii te taea‘e e te tuahine Andrus i ta raua piiraa matamua i te matahiti 1980, i te taime te reva ra ta raua tamaiti hopea i ta’na misioni.
Ua papa‘i te hoê mootua a raua i muri iho i to’na fariiraa i te hoê tao‘a horo‘a ta raua i hapono no te tauturu ia’na ia faaineine no ta’na misioni. « Ua haamauruuru oia ia maua [no te tao‘a horo‘a], ua parau mai râ, ‘Hau atu râ, mauruuru no te hi‘oraa ta orua i tuu mai’ », te parau ra te tuahine Andrus.
Haapii i te haapiiraa tumu
« E ti‘araa to ta tatou feia apî ia titau i to ratou mau metua e i te feia faatere o te Ekalesia ia hi‘opo‘a e, ua maramarama ratou i te evanelia a Iesu Mesia », te parau ra Elder Ballard. « Na te Varua Maitai e haapapû i te parau-mau i to ratou aau e ia ninii i te Maramarama o te Mesia i roto i to ratou varua. E i reira, e roaa faahou mai ïa hoê a‘e toe misionare tei ineine maitai » (M. Russell Ballard, « Hoê a‘e toe », 71).
6 000 maile (9 600 km) i te atea ia Buenos Aires, te vai nei te amaa no Horseshoe Bend piri ia Boise, Idaho i te mau Hau Amui no Marite, ua ite atoa ratou i te hoê maraaraa rahi i roto i te taviniraa misionare a tura‘i faahou ai te mau utuafare e te feia faatere i te tutavaraa no te haapii i te evanelia i ta ratou feia apî.
I roto i teie amaa iti 75 melo, e iva taata tera e tavini ra i te misioni.
Ua haapapû o Elder Russell M. Nelson no te Pŭpŭ no te Tino Ahuru Ma Piti Aposetolo i te mau tumu e te mau maitai no te taviniraa. « E tavini te mau misionare atoa… ma te ti‘aturiraa hoê roa ia faatupu i te hoê oraraa maitai a‘e no te tahi atu mau taata », ua parau oia. « Na te faaotiraa ia tavini i te hoê misioni e haamau i te hoê haere‘a varua no te misionare, no to’na hoa faaipoipo, e no to raua huaai i roto i te mau u‘i a muri a‘e. No roto mai te hinaaro e tavini i te faafariuraa, te ti‘amâraa e te faaineineraa o te hoê taata » (« A ani i te mau misionare ! E nehenehe ta ratou e tauturu ia outou ! » Liahona, Novema 2012, 18).
Tera atoa te mana‘o o te peresideni Martin Walker, peresideni no te tĭtĭ no Emmett Idaho. « E tuu te taviniraa i te hoê misioni i te hoê taure‘are‘a i ni‘a i te hoê e‘a e haamaitai atu e rave rahi u‘i », te na reira ra oia. « Ei tĭtĭ, e imi tatou i te mau rave‘a atoa no te faaineine i te taure‘are‘a no te taviniraa misionare ».
Te hoê tuhaa o taua faaineineraa ra, o te haapiiraa ïa i te feia apî te haapiiraa tumu. Ua fana‘o te feia apî no te amaa no Horseshoe Bend i te hoê piha haapiiraa misionare, hoê taime i te hepetoma, o te haapiihia nei e te hoê peresideni misioni tahito—e haapiipiiraa te faananea atu â i te haapiipiiraa misionare tei horo‘ahia e te tĭtĭ hoê taime i te ava‘e, i te taime no te mau apooraa haapiipiiraa misionare e no te puhaparaa a te Autahu‘araa a Aarona.
No LaRene Adam—hoê o na tamarii e ono a te taea‘e e te tuahine Andrus—ua tavini oia i piha‘i iho i ta’na tane, o Jim, i roto i te misioni no Copenhague Danemark mai te matahiti 2007 e tae atu i te matahiti 2009. Ua faaite papû mai oia no te faufaa ia haapii i te tamarii i te evanelia i te fare.
« Te hoê o te mau mea rahi a‘e ta outou e nehenehe e rave no te tauturu i ta outou mau tamarii ia patu i te hoê iteraa papû no te ohipa misionare, o te faatupuraa ïa i ta outou mau pureraa pô utuafare e ta outou tuatapaparaa papa‘iraa mo‘a e te utuafare », te na reira ra oia. « Ia horo‘a outou ia ratou i teie niu puai no te tuatapaparaa evanelia e no te ite i te evanelia, ua ineine roa a‘e ïa ratou e ua ite roa a‘e ïa i te evanelia ».
Te ti‘a ra te episekopo Victor Nogales i mua i te tabula piaraa parau e faaite ra i te feia apî atoa no ta’na paroisa, na reira atoa ia ratou e tavini ra i te hoê misioni.
Hoho‘a tuuhia mai e Paul L. Garvin