Tere a te feia faatere rahi no te Feia Apî Tamahine e no te Sotaiete Tauturu i te Area no Asia

Na Brenda Frandsen, taata aravihi ohipa haaparareraa no te Area no Asia

Tauturuhia e David O. Heaps, Paul Stevens e o Linda Rae Pond Smith

E iva mahana i te ava‘e no novema 2012, ua haapii e ua faaûru o Mary N. Cook, tauturu matamua i roto i te peresideniraa rahi no te Feia Apî Tamahine, e o Linda S. Reeves, tauturu piti i roto i te peresideniraa rahi no te Sotaiete Tauturu, i te mau tuahine, te mea apî e te paari, i te mau fenua no te Area no Asia.

Tua‘ti teie tere i te parau faaara no ni‘a i te faanahoraa haapiiraa apî na te feia apî, Viens et suis moi, ta te Feia Apî Tamaroa, te Feia Apî Tamahine e te mau piha no te Haapiiraa Sabati e haamata i te faaohipa i te ava‘e no tenuare 2013. Ua hamanihia teie faanahoraa haapiiraa apî no te tauturu i te mau orometua ia haapii a‘e mai ta te Faaora i rave ma te faatupu i te auraa puai a‘e e te mau melo o te piha haapiiraa.

I muri mai i te tere o na tuahine Cook e Reeves i te Area no Asia, rave rahi feia apî no te Asia na reira atoa to ratou mau metua tei feruri e, ua anaanatae a‘e ratou i teie nei no te tamâ e no te faaafaro faahou i to ratou oraraa no te riro mai ei hi‘oraa i mua i te huiraatira.

I Hong Kong, ua fafau te tuahine Reeves i te feia apî, « Ia vai mâ outou i roto i to outou oraraa, e nehenehe ai ia outou ia ti‘a papû i mua i te taata atoa ! »

No te faaûru o ta’na mau parau, ua parau roa mai o Tang Kak Kei, 12 matahiti, « Ua ite au e, e mea ti‘a ia tai‘o vau i te Buka a Moromona i te mau mahana atoa. Te haapiiraa ia tatarahapa e te ora parau-ti‘a, o te reira ta te buka iti No te Puai o te Feia Apî i haapii mai ia’u ia rave ia anaana’tu te Maramarama o te Mesia e te oaoa mau na roto ia’u ».

I te fenua Initia, ua farerei te tuahine Cook i te mau melo i roto i te fare pureraa apî i te mataeinaa no Chennai India e ua tae atoa mai te mau melo no te tĭtĭ no Hyderabad India e ua a‘o atu i te feia apî paari ia faaineine no ananahi. « A faati‘a i to outou ite », ua a‘o oia, « i tera e tera aravihi no te tauturu ia outou ia patu i te basileia. A tutonu i ni‘a i to outou utuafare e i ni‘a i te mea ua nehenehe ta outou ia rave no te haamaitai i te mau melo o to outou utuafare, e i ni‘a atoa i to outou faaineineraa pae varua ia ti‘amâ outou no te mau muhumuhu pae varua ia ite ho‘i outou i hea e haere e eaha te rave ».

I Idonesia, ua haere te tuahine Reeves i te amuiraa tĭtĭ matamua no te tĭtĭ no Surakarta Inidonesia. « Ua putapû matou i to ratou varua haehaa e te here. Auê ïa melo faaroo ! » ua parau oia.

I reira, ua tere te tuahine na te fenua Malaisie, e ua paraparau oia e te hoê pŭpŭ tuahine no te Sotaiete Tauturu no ni‘a i te mau fifi rahi o te faanahoraa no te Sotaiete Tauturu i Malaisie e nahea ta te Ekalesia e nehenehe e tuu mai i te arata‘iraa e te faaûruraa.

I Taiwan, ua faahiahia te tuahine Reeves i te puai e te itoito rahi o te mau melo i reira. « Ua oaoa roa ho‘i matou i te iteraa i to ratou oraraa faaroo e to ratou haere-pinepine-raa i te hiero … e hi‘oraa te mau melo no te here i mua i to ratou mau hoa e taata tupu », te na reira ra oia.

I Taiwan, ua farerei na Mary N. Cook e Linda S. Reeves i te feia faatere o te area na reira atoa te feia faatere no te autahu‘araa e te mau melo no Taiwan.

Hoho‘a na Yang Chieh-wen