Tuatapapa amui i te mau a‘oraa no te amuiraa

Na Greg Batty

Te ora ra Greg Batty i Utah, te mau Hau Amui no Marite.

Ua riro te tauiraa i ta matou faanahoraa tuatapaparaa i te amuiraa ei rave‘a faananearaa i ta matou paraparauraa evanelia e te utuafare.

Tau matahiti to matou anaanataeraa i te tai‘o i te vea no ni‘a i te amuiraa e te utuafare, te hoê tuhaa i muri mai te tahi. A haamata ai matou, e haaputuputu menemene noa matou i ni‘a i te amuraa maa ei reira e tai‘o puai matou, te taata ta’na paratarafa. Teie noa râ, te ite ra matou e, ta matou nei tai‘oraa, no te rave faaoti noa ïa, aita e faafaaearaa no te apo roa mai i te mau poro‘i.

No te apo rahi a‘e mai roto mai i ta matou tai‘oraa, ua hoo maua ta’u vahine i te hoê nene‘iraa o te amuiraa na te melo hoê o te utuafare ei reira, ua faanaho maua i te rahiraa a‘oraa ta matou e tuatapapa i te hepetoma hoê ia pau ia matou i te tai‘o pauroa mai na mua a‘e te amuiraa rahi no muri iho. Te tahi mau hepetoma, hoê noa ïa a‘oraa, e te tahi mau pu‘eraa, e piti ïa, e na te taata tata‘itahi e tuatapapa i te a‘oraa e faateatea i te mau tuhaa au na ratou. I muri iho, i te pureraa pô utuafare, e haapii matou te tahi i te tahi i te mau tuhaa ta matou iho i faateatea.

Pinepine roa na ta maua mau tamarii e tuu i te uiraa no te iriti i ta matou tauaraa parau, aita ana‘e, na maua to’u hoa e tuu i te mau uiraa no roto i ta maua tuatapaparaa. E tao‘a rahi no maua ia faaroo i ta maua nei mau taure‘are‘a e tatara mai i ta ratou pahonoraa i teie mau uiraa, e faaite roa mai ta ratou i haapii i te « Séminaire », i te pureraa e i ta ratou iho nei tuatapaparaa. I riro mai te reira ei rave‘a faahiahia no te faaroo haere e no te faaroo tamau atoa i te mau iteraa papû, e taime au e te rû ore.

Te ite oioi atoa ra matou e, te pee atoa nei ta matou tai‘oraa papa‘iraa mo‘a o te po‘ipo‘i i teie avei‘a. Te tahi mau mahana, maa irava noa e roaa ia matou i te tai‘o e ua pau oioi te taime no te tauaraa parau no ni‘a i teie mau irava e te imiraa ho‘i eaha ra to te reira tu‘atiraa i te ohipa e tupu ra i ni‘a ia matou.

Ua pu‘e noa ïa to matou nei mau po‘ipo‘i i te tauaraa parau, te ata e te tahoê hou matou a reva ai no ta matou mau ohipa taa ê. E iteraa papû puai to matou no ni‘a i te parau a‘o a to tatou peropheta ia tuatapapa amui e ia pure amui i te mau mahana atoa. Ua taui roa to matou nei utuafare ei utuafare haapii mai te tahi e te tahi e te haapuai i te tahi e te tahi. Pauroa te reira, no te hinaaro noa ïa ia apo rahi iti a‘e mai roto mai i te amuiraa rahi.