Te faufaa o te mau hoa maitai

E faaûruraa rahi to te mau hoa i ni‘a i ta tatou mau ohipa, ta te feia apî ihoa râ. « E faaûru ratou i to outou feruriraa e ta outou ohipa e rave, e e tauturu atoa ratou ia faaoti eaha te huru taata e riro atu outou ».¹ E ia ma‘iti outou i te mau hoa maitai, « e riro ratou ei puai e ei haamaitairaa rahi no outou … E tauturu ratou ia outou ia riro mai ei taata maitai a‘e, e e tauturu ho‘i ia outou ia ora i te evanelia a Iesu Mesia ma te ohie ».²

I ni‘a i te mau api 52–53 o teie ve‘a, te haapii nei o Elaine S. Dalton, peresideni rahi no te Feia Apî Tamahine, i te faufaa rahi ia imi e ia riro ei hoa maitai. « Ua riro te imiraa i te faito maitai hau roa a‘e o te hoê taata ei tumu no te hoaraa mau », te na ô nei oia.

Na te paturaa i te mau hoaraa i ni‘a i teie mau parau tumu e tauturu i te feia apî ia faatupu i te auraa maoro e te aravihi pae sotiare hau atu i te riro-noa-raa ei mau « hoa » a te faahoaraa Itenati. Ei metua, e nehenehe ta outou e tauturu i te mau tamarii ia maramarama i te faufaa ia riro ei hoa maitai na reira atoa ia ma‘iti i te mau hoa o te riro i te faaitoito ia ratou ia ora i te evanelia. E riro paha te mau mana‘o i muri nei i te mea tauturu mau.

Te mau mana‘o tauturu no te haapii i te feia apî

I roto i te utuafare, a ma‘imi i te mau papa‘iraa mo‘a no ni‘a i te tahi mau hi‘oraa hoa maitai. A paraparau eaha te mau peu maitai e haapuai nei i teie mau hoaraa. A feruri na ia Davida raua o Ionatana (hi‘o 1 Samuela 18–23), ia Ruta raua o Naomi (hi‘o Ruta 1–2), e ia Alama ratou te mau tamaiti a Mosia (hi‘o Mosia 27–28 ; Alama 17–20).³
Tai‘o faahou i te tuhaa no ni‘a i te mau hoa i roto i te No te Puai o te Feia Apî. Faaite i ta outou mau taure‘are‘a nahea te hoaraa i te faaûru i to outou iho oraraa. A ani manihini ia ratou ia faaite atoa mai ratou nahea ratou i te faaûruraa e i te faaûruhia e te mau hoa.
Tai‘o i te parau a te tuahine Dalton tei roto i teie ve‘a. A paraparau i te opuaraa ta ta’na tamahine, o Emi, i tuu no te imi i te mau hoa maitai. Tauturu i ta outou mau tamarii ia tuu i te opuaraa no ni‘a i te huru hoa e imi atu ratou e aore râ e riro mai ratou.
Feruri na ia faatupu i te hoê pureraa pô utuafare no te faaite i te mana‘o no ni‘a i te paturaa i te hoaraa, teie te tahi hi‘oraa : « No te farii i te mau hoa maitai, ia riro outou iho ei hoa maitai. A faaite i to outou anaanatae mau no vetahi ê ; a ataata e a faaite ia ratou e, te feruri ra outou ia ratou. A faaite i te maitai e te faatura i te mau taata atoa, e eiaha e haavâ e e faaino i te mau taata e haati nei ia outou ».⁴

Te mau mana‘o tauturu no te haapii i te mau tamarii

Te hoê hoa, o te tauturu atoa ïa ia vetahi ê. A tai‘o « Standing Up for Caleb [Défendre Caleb] » i roto i te Liahona no mati 2009 e a paraparau e ta outou mau tamarii i te mau rave‘a e nehenehe ai ta ratou e hamani maitai i te taata atoa e farerei atu ratou.
I roto i te mau ohipa atoa, e titauhia ia tatou ia faaoti i te huru hoa e riro mai tatou. A himene amui i te himene « Jésus-Christ est mon modèle »⁵ ei reira paraparau atu ai e ta outou mau tamarii nahea ratou e ma‘iti ai ia riro ei hoa maitai, mai te Faaora ra te huru, noa’tu te huru ohipa.

Hoho‘a faahoho‘araa na Taia Morley