Mai le Pouliuli i le Malamalama

Taofia le igoa

E mafai ona tatou iloa ma le mautinoa pe a pogisa o tatou olaga ma e mafai e Iesu Keriso ona suia lena pogisa i le malamalama pe a tatou salamo ma le faamaoni.

Na i ai ni taimi i lo’u olaga na ou lagona ai le pei ua leai sou faamoemoe e maua ai le fiafia po o le toe foi atu i lo tatou Tama o i le Lagi. I le tele o tausaga ua mavae, sa taofia ai au mai le Ekalesia. Sa ou ola i se olaga o le faamaualuga ma le agasala ma sa matua mafatia ona o au amioga. Sa lei manuia la’u faamau i se tamaitai sa ou alofa i ai, sa afaina au sootaga ma isi, ma sa ou le fiafia.

E ui lava sa ou moomoo maimau pe ana ou filifili e lotomaualalo i se taimi ua leva, ae sa faamalosia au ia lotomaualalo ma ia saili e fai le finagalo o le Alii. Sa amata ona ou faitau soo i tusitusiga paia, tatalo soo, ma saili e auauna atu i isi. Sa ou taumafai e faaleleia ni sootaga sa ou faatamala i ai mo se taimi umi lava, e aofia ai le ma sootaga ma le Tama Faalelagi. Sa ou faanaunau moni lava i se liuga o le loto.

O le taeao po lava ao ou tietie atu i se tasi aso i le aoga, ma e lei oso ae le la. Sa susulu le tafailagi i sasae, ae na pogisa le tafailagi i sisifo, ma na amata ona goto ifo i ona tua atu le masina ua atoa. Na ou atinaeina se mausa o le talanoa ma lo’u Tama Faalelagi a o aveina le taavale. Ao faia sau tatalo i le taimi o lenei malaga, na faamalamalamaina lo’u mafaufau, ma sa tuuina i totonu o lou loto se faamoemoe fou.

Sa ou iloaina le susulu o lo’u olaga ma na amata ona faateleina le malamalama, e pei lava o le tafailagi i sasae. Na amata ona mouese atu le pogisa, ma o au agasala, lea na tele e pei o lena masina ua atoa, na goto ifo i lalo. E lei faapea ua o ese, ae sa ou iloaina e le toe umi pe afai e faaauau pea ona ou salamo faamaoni. Sa ou faamoemoe o le a i ai se aso o le a faamalamalama ai lou olaga e pei o le aoauli.

I le aluga o taimi ma ao ou tatalo mo le alofa mo lo’u Tama Faalelagi ma isi, sa amata ona ou maua atili le lotomaualalo. O le faateleina o le lotomaualalo na taitaiina atu ai au ia auauna atu i le Atua ma isi e aunoa ma le manatu faapito, ma sa faafouina ma toe faatumuina lou faamoemoe mo le ola e faavavau ma se lumanai sili atu ona lelei. A o tuputupu ae lena faamoemoe, sa faapena foi lo’u faatuatua i lo’u Faaola, o Iesu Keriso, e ona le mana e laveai ma faamama ai au mai amioletonu uma. Ou te iloa e moni upu a Mamona: “Tou te faamoemoe e ala i le togiola a Keriso ma le mana o lona toetu, ia faatutu mai outou i le ola faavavau” (Moronae 7:41).

O Le Fiafia e ala i le Salamo

Ata

Elder Neil L. Andersen

“O tatou malamalama ea i le [naunautaiga] o lo tatou Tama Faalelagi ia tatou taumafaiga uma e toe foi atu ia te ia? E tusa lava pe tele se vaega o le ala ua tatou se ese ai, na te talia lo tatou toe foi mai. Tatou te lagonaina le olioli a o faamautinoa mai e le alofa o lo tatou Faaola ia i tatou e mafai lava ona tatou mama, o le a i ai se aso o le a tatou toe foi atu ai i le aiga. O lenei fiafia e nao le salamo e oo mai ai.

“A tatou tuua ia mea sese na faia ma faaaoga le faatuatua ia Iesu Keriso, tatou te mauaina se faamagaloga o a tatou agasala. Tatou te lagonaina o loo faia e lo tatou Faaola mo i tatou mea e le mafai ona faia e i tatou lava.”

Elder Neil L. Andersen of the Quorum of the Twelve Apostles, “The Joy of Becoming Clean,” Ensign, Apr. 1995, 51.