Alu e Lipea Lana Laau Pese
Kent A. Russell, Florida, ISA
O lo matou tuaoi o le faifeau a le autalavou a se ekalesia i le lotoifale, ma e masani ona asiasi atu le autalavou o lana ekalesia ia te ia. Sa le o se vaaiga masani le tele o ni taavale e paka i luma o lona fale i le ao ma le po.
O nisi o nei talavou e taina ni musika malomaloa i laau a o latou taavale i taimi uma. E mafai ona matou faalogoina mai le tele o poloka, ma ao latou latalata mai, e luluina faamalama o lo matou fale. E masani ona fafaguina au i le po i le leotele o le musika. Na tuputupu ae lo’u faagaulemalie, ma sa amata ona ou vaaia nei tupulaga talavou o ni o’u fili.
I se tasi aso a o ou saluina ia lau laau, sa ou faalogo i le malomaloa mai o le taina o le laau taavale mai le tele o poloka o mamao ese atu. E lei umi ae ua amata ona faasolosolo ona latalata mai ma leotele mai le leo. E oo atu i le taimi na afe mai ai i le pioga ma agai mai i le fale a lou tuaoi, ua ou ita ma tatalo ina ia faaleagaina e le Tama Faalelagi le laau taavale.
Na liua lau tatalo naunautai i se tasi o viiga ma le agaga faafetai ina ua faafuasei lava ona pe le laau taavale ao tu le taavale i luma o le fale. Na ou galue i laau taavale ma iloa ai i le leo e lei tapeina—ua leaga.
Na le fiafia le alii talavou i le pe o lana laau taavale, ma sa faapotopoto atu ana uo e faafiafia ia te ia. Ia te au, i le isi itu, na ou lagona se tulaga o le faamalieina i le molimauina o mea sa ou manatu o le aao o le Atua o taina le laau taavale.
Peitai ao faaauau pea ona ou vaavaai atu, sa ou iloaina ai o loo ou tilotilo atu ia te au lava ia e pei ona ou amio ai i le tele o tausaga ua mavae. Na faamaluluina lo’u loto, ma amata ona ou mafaufau faapea atonu o lenei alii e le o so’u fili. Ona musumusu mai lea o le Agaga, “Alu e lipea lana laau taavale.”
Sa ou ofo i le uunaiga ma taumafai ina ia aveesea. Aisea e tatau ai ona ou lipeaina se mea o loo fai ma faasoesa i lo’u olaga? Peitai na toe oo mai le uunaiga, ma sa ou mulimuli i ai.
Ina ua uma ona ou ofoina atu la’u fesoasoani, sa vave ona ou iloaina le fofo o le faafitauli. Sa vave le lipeaina. E lei umi ae toe leotele foi le taina o le laau taavale.
Na faaalia e le alii talavou lona agaga faafetai ma fesili mai pe i ai se mea e mafai ona ia faia mo au. Sa ou fai atu ia te ia e tatau ona ou alapo mo le galuega, ma pe mafai ona ia kiina i lalo lana musika i afiafi, ou te matua fiafia lava. Sa ataata o ia ma faamautinoa mai ia te au o le a ia faia lena mea.
E le gata i le kiina i lalo o lana laau i le po, ae na avea foi o ia ma au leoleo faapitoa o laau taavale ma e na te faamautinoaina ua kiina foi i lalo e ana uo a latou laau taavale. Mai lena taimi, ma te lei toe mauaina lava se faafitauli i le leotele o musika pe a pogisa.
Na faafofoga moni mai lava le Tama faalelagi ma tali mai i lau tatalo. O Lana tali na tuuina mai ai le toafilemu ma le filemu, o se lesona taua e uiga i le mulimuli i le Agaga, ma se malamalama sili atu ona lelei o le uiga o le “ia alofa atu i e o fai outou mo latou fili” (Luka 6:27).